Ikus Sai dahuluk, dahuluk Sai ikus

Nuneʼe mak sira neʼebé ikus sei sai dahuluk no sira neʼebé dahuluk sei sai ikus.” Mateus 20:16

Ema Jentiu sira inklui ita ema Timór, ita hatene Evanjellu ikus ona kompara hó ema Judeu sira.

Sai dahuluk- Ema Jentiu sira ne'e, bainhira sira rona liafuan di'ak, Na'i Jesus hatete katak sira prontu liu no barak liu atu simu mensajen Maromak nian, moris santu,  kompara hó ema Judeu sira.

Kestaun atu hola parte iha reiñu Lalehan, la'os problema rona liafuan di'ak uluk ka ikus. Se ita rona no hatene Maromak Nia futarlia uluk, la garantia ita tama Reiñu Lalehan. Tanba Karik ita rona no hatene uluk maibé la halo tuir, ita ema ne'ebé bosok teen.

Maromak Nia liafuan dehan nune'e "Se ita halo tuir ninia ukun-fuan sira, neʼe katak ita hatene ona nia.  Ema neʼebé dehan: “Haʼu hatene ona Nia”, maibé la halo tuir ninia ukun-fuan sira, ema neʼe bosok-teen, no lia-loos la hela iha ema neʼe. 1 João 2:3-4

Pelo kontrariu, ema balu iha nia moris loronloron halo buat ne'ebé la loos, maibé bainhira nia hatene Lia Loos iha eskritura, nia arepende hosi hahalok aat sira no halo tuir Maromak Nia ukunfuan sira, ema ne'e sei merese ba Reiñu Lalehan liu kompara hó ita sira ne'ebé hatene Maromak Nia liafuan maibé la prátika.

Pastor, misionsriu no sira ne'ebé serbisu iha igreja, misaun etc hanesan ema Farizeu sira iha Na'i Jesus Nia tempu,  sira konserteza  estuda no hatene liu ema sarani baibain. Tan ne'e sira hanorin sarani sira kona-ba fiar ba Maromak Nia Lia Loos. Ne'e di'ak, maibé sira ne'e mós hanesan ita sarani baibain tenki prátika saida mak sira hatene no  hanorin. Tanba fiar de'it la akonpaña hó prátika la sufisiente.

Maromak Nia liafuan iha Tiago 2:19 dehan nune'e "Ó fiar katak iha Maromak ida deʼit ka? Se nuneʼe, ó halo buat neʼebé diʼak. Maibé, anju aat sira (Demonia) mós fiar no nakdedar". Maromak Nia futarlia iha Tiago 2:26 mós dehan nune'e "Neʼe duni, hanesan isin neʼebé la hamutuk ho iis mak mate, nuneʼe mós fiar neʼebé la hamutuk ho hahalok mak mate"

Tanba ne'e mak Maromak Nia liafuan hatete katak ema barak mak Nia bolu, ka ita bele dehan Na'i Maromak bolu ema hotu, tanba Na'i Jesus mai mate ba ema hotu iha mundu ne'e (João 1:29) ida ne'e hanesan grasa (Efeso 2:8) maibé la'os ema hotu hotu ne'ebé Maromak bolu ka ema hotu hotu ne'ebé Na'i Jesus sakrifika an atu salva sei hetan salvasaun.Tanba Saida?

Tanba Maromak Nia liafuan iha Mateus 7:21-23 dehan nune'e "Laʼós ema hotu neʼebé dehan mai haʼu: ‘Naʼi, Naʼi’, sei tama Reiñu lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Reiñu neʼe. Iha loron neʼebá ema barak sei dehan mai haʼu: ‘Naʼi, Naʼi, ami fó sai profesia no duni sai Demonia sira, no ami mós halo milagre barak hodi Ita-Boot nia naran, loos ka lae?’ Maibé haʼu sei hatete ba sira: ‘Haʼu la hatene imi! Hadok an tiha husi haʼu, imi neʼebé la halo tuir Hau ukunfuan sira"

Maun-alin sira iha Kristu, mai ita prátika Lia Loos Maromak nian la'os rona de'it. Hili buat ne'ebé loos mesmu ema uitoan de'it mak tuir, tanba saida?  Tanba Maromak Nia futarlia iha Mateus 7:13-14 dehan "Laʼo liuhusi odamatan kloot bá, tanba odamatan boot no dalan luan mak lori ema ba mate, no ema barak laʼo liuhusi dalan neʼe. Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan dalan neʼe.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 20:16