Na'i Jesus sei fó kolen ba ema ida-idak tuir sira-nia hahalok.

Tanba Oan-Mane sei mai iha ninia Aman nia glória hamutuk ho ninia anju sira, no nia sei fó kolen ba ema ida-idak tuir sira-nia hahalok. Mateus 16:27

Iha versu iha leten, Na'i Jesus dehan bainhira Nia fila-fali mai Nia sei fó kolen ba ema ida-idak tuir sira-nia hahalok. Hahalok saida de'it mak ema Kristaun tenki halo?

Statement ida ne'e, Sn. Paulo halo klaru liutan iha 2 Korinto 5:10 ne'ebé hatete "Tanba ita hotu tenke hamriik iha Kristu nia kadeira julgamentu oin, atu nuneʼe ema ida-idak simu kolen tuir buat neʼebé nia halo ona, maski nia halo buat neʼebé diʼak ka aat"

Bíblia ko'alia mai ita hahalok ka serbisu ida ne'ebé Maromak simu. Serbisu ne'ebé hanesan rezultadu hosi podér Espiritusantu.  Na'i Jesus esplika mai ita katak ita tenki fó fuan (Lee João 15:1-16).

Fuan saida mak ita tenki prodús? Fuan espiritu no fuan hosi isin/mundu nian deskrebe iha   Galatia 5:19-23.

HAHALOK ISIN/MUNDU NIAN:
Ema bele haree ho momoos hahalok sira neʼebé hosi isin, neʼe mak sala seksuál/adultériu, hahalok la moos, halo hahalok aat toʼo la sente moe,  adora estátua (idolatry), halo espiritizmu, odi malu, istori malu, laran-moras malu, hirus toʼo la kontrola an, buka atu manán deʼit, haketak malu, laran-moras ba buat neʼebé ema seluk nian, lanu-teen,  festa arbiru, no buat sira seluk neʼebé hanesan neʼe. Haʼu fó hanoin ba imi kona-ba buat sira-neʼe, hanesan haʼu fó hatene nanis ona ba imi, katak sira neʼebé halo buat sira-neʼe sei la simu Maromak nia Reiñu nuʼudar liman-rohan. Galatia 5:19-21

Hahalok ka serbisu ne'ebé hanesan FUAN HOSI ESPIRITUSANTU:
Maibé, hahalok sira neʼebé mai husi Maromak nia espíritu mak domin, ksolok, dame, pasiénsia, laran-diʼak, hahalok diʼak, fiar,  laran-maus no kontrola an. La iha ukun-fuan ida mak kontra buat sira-neʼe. Galatia 5:22-23

Serbisu ka fuan hosi isin nian mak serbisu ka Hahalok sira ne'ebé kontra Maromak Nia Lei maibé fuan hosi espiritu mak obedese ba Maromak Nia lei. Paulo ko'alia ba ita atu hadook an hosi  hahalok  isin ka mundu nian. Efeso 5:7.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 16:27