Li'ur Bonita, laran nakonu hó buat fo'er

Susar ba imi eskriba no Farizeu sira, imi ema laran-makerek!  Imi hanesan rate neʼebé pinta mutin. Maski iha liʼur haree furak, maibé iha laran nakonu ho mate-ruin no buat foʼer oioin. Nuneʼe mós ho imi. Husi liʼur ema haree imi hanesan ema laran-loos, maibé iha imi-nia laran nakonu ho hahalok laran-makerek no hahalok aat. Mateus 23:27-28

Hanesan Ema Timór, tradisaun ema Judeu sira mak tinan-tinan sira hamoos rate. Iha Timór, ema hamoos atu Kari aifunan, balu halo rituál fó han, etc. Maibé iha Israel, ema hamoos no pinta mutin atu evita ema halo kontaktu ka kaer sala bainhira sira atu halo seremonia ruma liuliu bainhira sira atu ba reza iha sidade santa, Jeruzalen. Toman sira ne'e sira sei halo to'o ohin loron.

Tanbasá mak ema Judeu sira evita rate bainhira sira atu konsagra sira nia an iha templu iha Jeruzalen? Tanba tuir lei Moses nian katak ema sira ne'ebé kaer  sala saida de'it mak partensi ba ema mate sira sei fo'er seremonialmente. Purezemplu ita lee iha libru Numeru 19:16 "Ema neʼebé laʼo iha rai-luan no kona ema neʼebé mate tanba surik ka kona mate-isin ka mate-ruin ka rate, nia sei sai la moos durante loron hitu"

Tanba ne'e mak rate sira, ema Judeu sira hamoos no  pinta mutin atu ema Haree moos no evita atu labele sai fo'er (Seremonialmente).

Rate sira ne'e, ema Judeu sira hamoos beibeik no pinta mutin no haree furak los. Rate sira ne'e mesmu haree furak hosi li'ur maibé iha laran nakonu hó buat fo'er.

Na'i Jesus kompara rate sira ne'e hó ema Farizeu sira neebé  finje halo di'ak  atu ema gaba maibé sira nia laran nakonu hó hanoin fo'er hanesan laran makerek, laran moras ba ema, loko an, kan teen, etc.

Oinsá hó ita? Ita mós dalaruma finje halo di'ak, "tampil beda" atu ema gaba ita. Maibé Maromak hatene ita nia laran makerek sira ne'e tanba Maromak hatene ita nia laran "....... Dalan neʼebé ema haree la hanesan ho dalan neʼebé Maromak haree, tanba ema haree deʼit buat neʼebé iha liʼur, maibé Na'i haree ema nia laran. 1Samuel 16:7

Mai ita husu nafatin ba Aman Maromak atu ita moris hó haraikan no hadok an hosi hahalok ka hanoin aat hotu.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 23:27