Na’i Jesus toba ka hader hela iha ita nia vero moris nian?

Iha evanjellu saun Lukas 8:22-25, Marku 4:35-40 no Mateus 8:23-26 ita lee katak Na’i Jesus ho nia eskolante sira iha vero laran bainhira anin no laloran boot doko vero ne’ebé sira uza.

Tuir mai ita lee istoria ne'e tuir Sn Mateus haktuir:
"Tuirmai Jesus no ninia dixípulu sira saʼe veró. Iha tempu neʼebá, tasi hahú sai siʼak tebes, no laloran baku makaʼas toʼo bee tama ba ró laran, MAIBÉ JESUS TOBA HELA. Nuneʼe dixípulu SIRA FANUN JESUS, hodi dehan: “Naʼi, salva ami! Ita hotu besik atu mate ona!” Maibé nia hatete ba sira: “Imi neʼebé fiar kiʼik, tanbasá mak imi sai taʼuk?”  Tuirmai nia hamriik hodi koʼalia makaʼas ba anin no tasi, no buat hotu sai hakmatek. Mateus 8:23-26

Sorti sira fanun Na’i Jesus se lae sira nia vero  atu mout dadauk ona no bainhira Nia hader nia hasé anin boot no laloran no tasi sai hakmatek kedas.

Nune’e mós iha ita nia moris kristaun nian, iha problema oin-oin mak ita hasoru. Ita hatete katak ita fiar Na’i Jesus no ita fiar katak Na’i Jesus iha ita nia laran maibé dala ruma ita husik nia toba hela karik. No Na’i Jesus dehan ba ita “Imi nia fé iha ne’ebé?” (Lukas 8:25).

Mai ita haburas fé bá Na’i Jesus no fanun Nia bainhira ita hasoru anin no Laloran boot moris nian atu bele iha pas no dame iha ita nia moris loron-loron.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 8:25