Na'i Jesus hatete "Mai tuir Hau" ba Pedro no Andre. Na'i Jesus Nia bolu "Mai tuir Hau" mós uza ba Levi ka Mateus iha Mark 2:14, no ba ema lubun boot iha Mark 8:34, no ba ema mane joven riku ida iha Mark 10:21.
Na'i Jesus xamada mós hetan iha Mateus 11:28 bainhira Na'i Jesus dehan, "Mai ba haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi"
Na'i Jesus mós bolu ita. La'os ita hotu-hotu sei hatán Na'i Jesus Nia xamada/bolu, maibé ba ita sira ne'ebé responde sei esperansa transformasaun iha moris hanesan ita bele haree iha Simão Pedro, Andre, Mateus Tiago no João (Mark 1:19–20), ne'ebé hola parte ka serbí hanesan dixípulu.
Apostolu sira hanesan "Peskadór" kompriende Ida ne'e. Sira peska hó redi ka dai ne'ebé sira soe/tuda ba vero nia sorin. Dai ne'e sei kapta kriatura oinoin maibé la'os hotu-hotu di'ak ba ai-haan. Iha dalan hanesan, Na'i Jesus promete ba Simão Pedro no Andre katak sira sei "kaer" ka alkansa ema barak hó liafuan di'ak Kona-ba Na'i Jesus.
Na'i Jesus esplika liutan kona-ba ida ne'e bainhira nia ko'alia kona-ba ai-knanoik dai nian iha (Mateus 13:47–50). Reiñu Lalehan hanesan dai ida ne'ebé kaer ema barak maibé balu la fiar no sei la tama ba Reiñu Lalehan tanba rejeita Lia Loos.
Na'i Jesus bolu Andre no Simão Pedro no Tiago no João atu sakrifika sira nia estilu moris, sira nia business ikan atu muda mundu nia hahalok, nia rezultadu mak ema balu nia moris sei transforma hosi aat ba di'ak ba Maromak Nia Gloria no ba moris Rohan-laek.
Mai ita rona Na'i Jesus Nia bolu no responde no halo tuir atu manan Reiñu Lalehan.
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Marco 1:17 |
0 comments:
Post a Comment