Ó sei laʼo uluk iha Na'i nia oin atu prepara dalan ba nia

Maibé kona-ba ó, haʼu-nia oan, ó sei sai profeta ba Maromak neʼebé Aas Liu Hotu, ó sei laʼo uluk iha Na'i nia oin atu prepara dalan ba nia. Lukas 1:76

Zacharias ko'alia iha ne'e la'os hanesan aman ba oan, maibé  hanesan profeta ida nia halo profesia ba buat ne'ebé sei akontese tinan 30 tuir mai, tanba João Batista hahú nia serbisu molok Na'i komesa nia Ministériu. João Batista hahú nia serbisu atu loke dalan ba Kristu ne'ebé seidauk hahú nia Ministériu. Lukas 3:23.

"Jesus tinan 30  bainhira nia hahú ninia serbisu. No tuir ema barak nia hanoin, nia mak José nia oan-mane José mak Heli nia oan-mane" Lukas 3:23

Ó sei sai profeta ba Maromak - ida ne'e signifika João Batista ne'e sei sai profeta hanesan hakerek iha Mateus 5:9  no João 1:12; ka ema nata ka haree hanesan profeta ida ne'ebé aas liu. Reklamasaun rua ne'e  loos hotu tuir evanjellu João. João Batista ne'e profeta ida   (la'os profeta bainbain, João 1:21), maibé liutan hosi profeta, Na'i Maksoin hatete,  Mateus 11:9.

Ó sei laʼo uluk iha Na'i nia oin atu prepara dalan ba nia. Ida ne'e tuir profesia Isaias  40:3, Malaquias 4:5: no tuir saida mak João Batista hatete kona-ba nia an, Mateus 3:3,  Marco 1:3.

Hanesan João Batista ne'ebé loke dalan ba Na'i Maksoin atu lori liafuan di'ak no salvasaun ba mundu nakukun ne'e, ita mós iha tempu ikus ne'e, tuir Na'i Maksoin nia haruka iha Mateus 28:18-20, ita mós presiza sai ajente ida atu loke dalan liuhosi Haklaken Na'i Jesus Nia evanjellu atu ema barak hatene Lia Loos antes Na'i Jesus fila fali mai ba daruak tuir nia promesa iha João 14:1-3

"Keta husik imi-nia laran taridu. Fiar ba Maromak, no fiar mós ba haʼu. Iha haʼu-nia Aman nia uma iha fatin barak atu hela. Se lae karik, haʼu sei la dehan neʼe ba imi. Maibé agora haʼu bá atu prepara fatin ba imi. No mós se haʼu bá hodi prepara fatin ba imi, haʼu sei mai fali no lori imi ba haʼu-nia fatin, atu nuneʼe iha fatin neʼebé haʼu hela, imi mós sei hela bá" João 14:1-3

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

João 1:76