HAKSOLOK BA SIRA NEBEE LARAN MOOS

Haksolok ba sira nebee laran moos, tanba sira sei haree Maromak. Mateus 5:8 BK

Iha versíkulu ne'e, Na'i Jesus hatete katak ema ne'ebé laran moos sei hetan bénsaun. Liafuan "HAKSOLOK" ne'ebé tradus iha lian Ingles "blessed" maihosi lian-gregu "makarios", ne'ebé signifika kontente ne'ebé loos, kontente ne'ebé kle'an, no hetan Maromak nia favor. Bénsaun ne'ebe temi iha ne'e la'ós husi osan ka komfortu, maibé husi relasaun di'ak ho Maromak. 

Liafuan "moos ka puru" ne'ebé tradus ba Ingles "pure" maihosi lian-gregu "katharos". Ne'ebé signifika katak moos, livre husi fo'er, no mós livre husi motivu ka hahalok-aat sira. Laran ne'ebé moos mak laran ne'ebé hakarak halo Maromak kontente no la'ós hahalok sira ne'ebé taka falta de'it ka finje. Hahalok ne'ebé moos mak: onestu, sinseru ka hatudu laran-moos, no hadomi buat ne'ebé loos no di'ak. 

Liafuan "laran" iha lian-gregu mak "kardia". Iha Biblia, ita-nia laran la'ós de'it ita-nia emosaun ka sentimentu, maibé hanesan sentru ba ita-nia hanoin, dezezu ka hakarak sira no ita-nia hili ka desizaun. Tan ne'e, "laran ne'ebé moos" katak hanoin ne'ebé moos, hakarak ne'ebé moos, no dalan moris ne'ebé moos. 

Na'i Jesus promete katak ema ne'ebé iha laran moos sei haree Maromak. Liafuan "haree" iha lian-gregu mak "optanomai", ne'ebé signifika haree ho ita-nia matan, maibé mós hatene no esperiénsia rasik. Ema ne'ebé iha laran-moos sei esperiensia ka sente besik ba Maromak agora no loron ida sira sei haree nia oin iha lalehan (lee 1 Korinto 13:12).

Iha Isaias (Yesaya) 1:18 Maromak hatete: "Maski imi-nia sala sira hanesan mean, maibé sira sei sai mutin hanesan jelu-rahun. “Maski imi nia sala sira kór mean, sira sei sai mutin fali hanesan neve, maski sala sira nee hanesan hena mean, sira sei sai hanesan bibi malae nia fulun" Isaias 1:18 BK. Maromak prontu atu halo ita-nia laran sai moos se ita fila fali ba nia, bainhira ita konfesa ita-nia sala (1João 1:9).

Mai ita husu Maromak atu hamoos ita-nia laran. Mai ita hasai tiha lia-bosok, odi no sala sira, no moris ho lia-loos no domin tuir Biblia nia hanorin.

Orasaun: Nai Maromak, hamoos ami-nia laran husi sala. Ajuda ami atu hadomi Ita ho loos no la'o tuir Ita-nia dalan sira ne'ebé hakerek iha Sagrada Eskritura. Ami hakarak haree Ita no esperiensia ka sente Ita-nia prezensa loroloron. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏