Maibé ema sona borus nia tanba ita-nia hahalok aat; Nia hetan terus boot tanba ita-nia sala sira. Nia simu kastigu atu ita bele hetan dame, No tanba ninia kanek sira mak ita hetan kura. Isaias 53:5 TL
Isaias 53 mak kapítulu furak ida iha Biblia, iha parte hosi Biblia ne'ebé ema hanaran "testamentu antigu".
Maizumenus tinan 700 antes Jesus la'o iha rai, Isaias fó-hatene nanis kona-ba atan ida-ne'ebé hetan terus, ne'ebé ikus mai sei tane aas. Atan ne'e mak Salvadór no Mesias ne'ebé kleur ema hein, ne'ebé sei fo moris ba ita ema maksalak.
Parte balu hosi Isaias 53 dehan nune'e:
"Maibé ema sona borus nia tanba ita-nia hahalok aat; Nia hetan terus boot tanba ita-nia sala sira. Nia simu kastigu atu ita bele hetan dame, No tanba ninia kanek sira mak ita hetan kura" Isaias 53:5 TL
Entaun, se mak mane ne'e ne'ebé sei hetan sona, hanehan rahun no kanek tanba ema seluk nia sala? Ne'ebé sei hetan kastigu boot hodi kura ema? Ne'ebé fó moris nu'udar sakrifísiu atu ema seluk bele moris?
Jesus Kristu la'ós de'it fit ba deskrisaun kona-ba atan ne'ebé hetan terus hodi selu fali Ninia povu, fo redensaun ba sira, no fó liberdade ba sira - maibé Nia mós fit deskrisaun kona-ba prediksaun barak seluk iha Sagrada Eskritura. Purezemplu:
Mesias sei mai husi David nia liña (Isaias 9:7) no moris husi feto virjen ida (Isaias 7:14) iha Belein (Mika 5: 2). Nia sei halo milagre ne'ebé furak tebes (Isaias 35:5-6). Maski Nia inosente (Isaias 53:8), nia belun ne'ebé besik liu sei halo traisaun ba Nia (Salmo 41:9), ema baku no tafui ba nia (Isaias 50:6), ema prega nia liman no ain (Salmo 22:16), no ikus mai oho nia (Daniel 9:26). Maibé tanba Nia halo interasaun ba rebeldes ka Ninia inimigu sira (Isaias 53: 12), ema barak sei hetan salvasaun (Isaias 53: 11).
Hanesan soldadu ida fó ninia moris ba ninia maluk sira, Jesus mós fó Ninia moris ba mundu.
Ohin loron, hanoin to'ok kona-ba konsekuénsia husi Jesus nia desizaun. Hanoin to'ok kona-ba moris ne'ebé ita bele goza ohin loron tanba Jesus Ninia terus no moe Iha kruz. Refleta kona-ba Jesus Nia krusifikasaun bainhira ita halo ita-nia atividade ohin loron.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment