Se imi moris hi'as ona hamutuk ho Kristu, buka buat sira ne'ebé iha leten, iha fatin ne'ebé Kristu tuur iha Maromak Nia liman loos. Kolose 3:1 BK
Bainhira ita fiar ba Jesus, buat importante ida akontese - ita unidu ho Jesus. Hanesan Jesus mate no moris hi'as fali hosi mate, ita mós mate ba ita-nia hahalok tuan nu'udar pekador ba moris foun iha Kristu. Apóstolu Paulo fó-hanoin ba ema kristaun sira iha Koloso 3: 1 katak tanba sira moris hi'as hamutuk ho Kristu ona, sira-nia fokus moris nian tenke muda.
Apóstolu Paulo hatete: "Buka buat sira ne'ebé iha leten". Ida-ne'e signifika katak ita-nia dezezu, ita-nia hanoin, no ita-nia prioridade tenke fokus ba Maromak nia reiñu, la'ós de'it kona-ba buat ne'ebé iha mundu. Mundu haruka ita atu buka osan, famozu ka naran-boot, no komfortu. Maibé buat sira-ne'e la permanente. Buat ne'ebé sei permanese ba nafatin mak buat ne'ebé Maromak nian hanesan: fé, domin, santidade, no esperansa moris rohan-laek.
Tau ita-nia fuan atu "buka buat sira ne'ebé iha leten" mak hanesan fixa ita-nia hanoin kona-ba ita-nia ojetivu ida. Ne'e signifika ita intensionalmente ka hakarak duni atu halo buat ida. Loron-loron ita iha desizaun atu halo: ita hakarak moris ba ksolok ne'ebé temporariu ka ba rikusoin rohan-laek? Jesus rasik hatete: "Maibee haloot riku-soin ba o nia aan rasik iha lalehan. Tanba iha lalehan ular no ferujen la halo aat, no naok-teen sira la bele tama no naok. Tanba iha fatin nebee o rai o nia riku-soin, o nia fuan laran mos iha nebaa" Mateus 6:20-21
Ida-ne'e la signifika katak ita tenke husik ita-nia servisu ka para atu tau matan ba ita-nia família. Maibé, ida signifika katak ita halo buat hotu no sempre tau Maromak iha ita-nia neon ka ita-nia hanoin. Karik ita serbisu, estuda, ka tau matan ba ema seluk, ita halo buat sira ne'e ho nia ojetivu atu halo Maromak kontente la'os ema.
Ohin loron, hanoin to'ok kona-ba fatin ne'ebé ita-nia laran fokus ba. Serake Ita-nia laran fokus ba buat mundu nian ka fokus ba Kristu iha Lalehan? Hanoin ba katak Kristu tuur iha Maromak nia liman-loos ho podér tomak. Bainhira ita tau ita-nia laran ba Jesus, ita-nia moris sei iha ojetivu, dame, no esperansa.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment