No ema matenek sira sei sai naroman hanesan loro matan, no sira ne'ebé fila ema barak ba hahalok loos sei sai naroman hanesan fitun sira to'o tinan ba tinan. Daniel 12:3 BK
Profeta Daniel hetan vizaun kona-ba tempu mundu nia rohan. Maromak fó sai katak sei iha resuresaun ka moris-hias: balu sei moris hi'as fali ba moris rohan-laek, no balu sei hetan moe no julgamentu (Daniel 12: 2). Depois ne'e, Maromak promete kedas ba sira ne'ebé moris ho sabedoria no ajuda ema seluk atu la'o tuir Maromak, sira sei nabilan ba nafatin hanesan fitun sira.
Versíkulu ne'e hanorin ita buat rua. Primeiru, Maromak hakarak ita atu moris ho sabedoria/matenek kle'an. Matenek ne'ebé loos la'ós de'it kona-ba koñesementu, maibé kona-ba hamta'uk Maromak no halo tuir ninia Liafuan sira. Segundu, Maromak haraik bénsaun ba ema ne'ebé direji ema atu halo buat ne'ebé loos. Kuandu ita fahe kona-ba Jesus, fó korajen ba ema atu arrepende an, no ajuda ema la'o iha Maromak nia dalan, ita hanesan naroman iha mundu nakukun.
Maromak nia rekompensa/rewards la'ós temporariu ka ba tempu uitoan de'it. Ema ne'ebé moris ba Maromak sei nabilan ba nafatin. Hanesan fitun sira ne'ebé nunka para atu nabilan iha lalehan kalan, nune'e mós Maromak nia oan sira sei sai nabilan iha ninia reiñu ka ukun ba nafatin. Ne'e mak ninia promesa esperansa nian ba ema hotu ne'ebé fiél la'o tuir nia hanorin sira.
Ba ita ohin loron, ida-ne'e signifika katak ita labele moris ba ita-nia aan de'it. Ita tenke moris iha dalan ne'ebé hatudu ema seluk atu moris tuir Maromak Nia hanorin. Hahalok domin nian hotu, liafuan korajen hotu, no esforsu hotu atu fahe Jesus ba ema seluk lori naroman ba mundu.
Se Ita hakarak sai nabilan hanesan fitun ba nafatin, la'o tuir Maromak nia sabedoria/matenek no ajuda ema seluk atu buka dalan no moris ne'ebé loos. Dalan loos ne'e lori ba fatin ida de'it, ne'e mak dalan ba lalehan.
Orasaun: Nai, ajuda ami moris ho matenek no lori ema seluk ba Ita, atu nune'e ami hamutuk bele nabilan ho Ita ba nafatin. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment