Maski ha'u la'o iha foho leet ne'ebé iha lalatak mate nian, ha'u la tauk buat aat, tanba Ó hamutuk ho ha'u; Ó-nia rota no Ó-nia ai tonka mak konsola ha'u. Salmu 23:4 BK
Moris la sempre fasíl. Dala ruma ita la'o liu foho leet nakukun sira: hanesan tempu triste, moras, ta'uk, ka bainhira ita hasoru problema. David, autór ba Salmo 23, hatene oinsá sentimentu bainhira ita hasoru perigu. Nu'udar bibi-atan, dala barak nia tenke proteje ninia bibi-malae sira husi animál fuik iha foho leet nakukun sira. Nu'udar ema, nia hasoru inimigu, traidór no funu barak. Maibé David dehan katak nia sei la ta'uk. Tanbasá? Tanba Maromak hamutuk ho nia.
"Foho leet ne'ebé iha lalatak mate nian" mak imajen ida kona-ba tempu susar liu iha ita-nia moris. Maibé nota saida mak David hatete: "Hau la ta'uk buat ida" Nia la ta'uk no hela iha ne'ebá beibeik. Ho Maromak nia prezensa, foho-leet nakukun la permanese. Maromak lori ita pasa liu foho leet nakukun sira ne'e.
David mós ko'alia kona-ba Maromak nia rota no ai-tonka. Bibi-atan uza rota atu proteje bibi-malae sira husi inimigu. Sira uza ai-tonka atu gia no foti bibi-malae bainhira sira monu. Nune'e mós, Maromak proteje ita husi buat ne'ebé bele estraga ita no gia ita kuandu ita fraku. Ninia prezensa lori komfortu no forsa ba ita.
Ba ita ohin loron, Jesus mak ita-nia Bibi-atan ne'ebé di'ak (João 10: 11). Nia promete katak nia sei nunka husik ita. Maski iha foho-leet sira ne'ebé nakukun liu: maski ta'uk, moras, ka mate, Maromak hamutuk ho ita. Ninia espíritu fó komfortu no Ninia Liafuan fó matadalan ba ita.
Ohin loron, hanoin-ba katak ita la la'o mesak iha foho leet nakukun sira. Tau fiar ba Maromak atu dirije ita, proteje ita, no fó dame ba ita. Karik foho-leet bele nakukun, maibé Ninia prezensa naroman liu fali nakukun sira ne'e.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment