Jesus dehan ba nia, “Ha'u mak dalan, lia loos no moris. Ema ida la bele hakbesik ba Aman, só deit liu hosi Ha'u.” João 14:6 BK
Molok ema hedi Jesus ba krús, Nia ko'alia liafuan sira-ne'e ba ninia dixipulu sira. Sira triste no iha konfuzaun laran tanba Nia hatete ona ba sira katak lakleur tan nia sei husik hela sira. Tomé husu: "Nai, ami la hatene Ita ba ne'ebé, entaun oinsá mak ami bele hatene dalan ne'e?" Jesusfo resposta no dehan: "Hau mak dalan, lia-loos no moris."
Iha versíkulu ne'e, Jesus hatudu ho klaru katak nia la'ós de'it dalan ida, maibé so Nia mesak de'it mak dalan ba Maromak. Tanba sala tama ona iha mundu liuhusi Adão no Eva, nune'e dalan ba lalehan lakon ona. Ema koko atu hakbesik ba Maromak liuhusi sira-nia hahalok di'ak sira, relijiaun, ka tradisaun rasik, maibé buat sira ne'e la bele halakon ita-nia sala ka restaura fali relasaun ne'ebé lakon entre ita ho Maromak.
Tan ne'e mak Jesus mai - atu hatudu dalan fila fali ba Lalehan. Liuhusi Ninia mate iha kruz, Nia selu folin ba ita-nia sala sira. Liuhusi Ninia moris-hias, nia loke odamatan ba moris rohan-laek. Ema se de'it ne'ebé fiar ba Jesus no la'o tuir Nia, agora bele fila fali ba Aman Maromak Nia uma - ita-nia uma ne'ebé loos iha lalehan.
Ita hotu presiza dalan ne'e tanba ita hotu halo ona sala (Roma 3:23). Maibé liafuan di'ak mak ne'e: dalan ne'e nakloke ba ema hotu. Ita la presiza sosa - ita presiza simu de'it Jesus ho fé no halo tuir Nia hanorin sira.
Nia mak dalan atu fila fali ba Lalehan, lia-loos ne'ebé fó liberdade mai ita, no moris ne'ebé sei la iha rohan.
Orasaun: Nai Jesus, obrigadu tanba sai dalan ba ami atu bele fila fali ba Lalehan. Ajuda ami atu la'o hamutuk ho Ita loroloron no lori mós ema seluk atu la'o tuir Ita, dalan úniku ba moris rohan-laek. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment