Haree ba buat ne'ebé ita labele haree

Nune'e ita la hateke ba buat sira ne'ebé ita bele haree maibé ba buat sira ne'ebé ita la bele haree. Tanba buat sira ne'ebé ita bele haree ne'e sei hela to'o tempu nee deit. Maibé buat sira ne'ebé ita la bele haree sei hela too rohan laek. 2 Korinto 4:18 BK

2 Korinto 4:18

Versíkulu ne'e haree hanesan estrañu uitoan - oinsá mak ita bele haree buat ne'ebé ita labele haree? Maibé apóstolu Paulo la ko'alia kona-ba ita-nia matan fiziku, maibé kona-ba matan fiar nian. Nia fó-hanoin ita katak buat sira ne'ebé ita haree iha mundu ne'e hanesan osan, uma, susesu, ka problema sira-ne'e temporariu de'it. Buat sira ne'e hotu sei lakon hotu loron ida. Maibé buat ne'ebé ita la bele haree - hanesan Maromak nia domin, ninia promesa, lalehan, no moris rohan-laek, sei iha ba nafatin. 

Apóstolu Paulo hasoru susar barak hanesan hamlaha, tama komarka, moras, no presegisaun. Maski nune'e, nia la rende, tanba nia la hateke ba problema ne'ebé nia hasoru maibé ba buat ne'ebé Maromak prepara ona ba nia. Nia haree ho fé katak Maromak prepara ona ninia kolen iha Lalehan. Ne'e mak buat ne'ebé fó korajen ba nia atu kontinua la'o ba oin. 

Ita mós hasoru susar no problema barak iha ita-nia moris. Dala ruma ita sente katak mundu ne'e atu rahun ona. Maibé kuandu ita fiksa ita-nia matan ba Jesus no ba esperansa lalehan nian, ita hetan forsa atu tahan. Terus ohin loron sei la iha komparasaun ho ksolok ne'ebé sei mosu mai. 

Haree ba buat ne'ebé ita la haree signifika katak moris ho fé, la'ós ho buat ne'ebé matan bele haree. Ida-ne'e signifika katak fiar ba Maromak maski ita la komprende saida mak nia halo. Ida-ne'e signifika katak fiar katak Maromak nia promesa sira ne'e loos, maski ita-nia matan seidauk haree. 

Tamba ne'e, hateke ba buat ne'ebé eternal - hanesan Jesus, ita-nia Salvador. Nia mak esperansa ne'ebé ita la bele haree ho matan ne'ebé sei gia ita ho seguru iha dalan ba lalehan. 

Orasaun: Nai, ajuda ami atu haree ho matan fiar nian. Hanorin ami atu fokus ba ita-nia promesa sira, la'ós fokus ba ami-nia problema sira, no atu moris loroloron hodi hateke ba dalan ba lalehan. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏