Mate atu bele moris

Ha'u mate tiha ona hamutuk ho Kristu iha krús. La'os ha'u mak moris, maibé Kristu mak moris iha ha'u. No agora ha'u-nia moris iha isin ne'e, ha'u moris liuhosi fiar iha Maromak nia Oan, ne'ebé hadomi ha'u, no fó ona Ninia aan tanba ha'u. Galásia 2:20 BK

Galásia 2:20 

Bainhira apóstolu Paulo hakerek liafuan sira-ne'e, nia esplika lia-loos ida kona-ba moris kristaun nian. Lia loos nee mak: atu bele moris, ulukliu ita tenke mate, la'ós fizikamente maibé espirituálmente. Bainhira ita simu Jesus nu'udar ita-nia Salvador, ita-nia hahalok pekador tuan sira ita "prega ba krús ho Kristu". Ida ne'e signifika katak ita la moris tan atu halo ita-nia an kontente, maibé atu halo Maromak kontente. 

Mate ida hanesan ne'e, la'ós lakon maibé liberdade. Hahalok tuan sala nian ne'ebé ita halo ona no hanoin an de'it lakon ona no moris foun hahú. Jesus la'ós de'it fó perdua ba ita-nia sala sira, maibé nia muda ita-nia laran. Ninia espíritu hahú moris iha ita-nia laran hodi dirije ita-nia hanoin, liafuan no hahalok sira. 

Agora, ita moris liuhusi fé ba Jesus, fiar ba Nia loroloron. Maibé fiar ne'e mós tenke lori ita atu halo tuir Ninia hanorin sira iha Sagrada Eskritura. Se Kristu moris duni iha ita, ita-nia hahalok sei hatudu. Ita sei hasees an husi sala, ita sei hadomi ema seluk, no la'o tuir Ninia lia-loos hotu iha Sagrada Eskritura. Se ita halo ida ne'e, ita-nia moris sei refleta Jesus Ninia karakter di'ak sira. 

"Mate ba ita-nia an rasik" signifika katak ita rende ita-nia hahalok foti-an, hirus, kaan-teen, hakarak hanoin an de'it, no husik Jesus kontrola ita-nia moris. Ida ne'e sei la fasil ba ita, maibé ida ne'e mak dalan uniku ba ita atu hetan ksolok ne'ebé loos, dame no moris rohan-laek. 

Tan ne'e, bainhira ita mate ba ita-nia hahalok aat sira, ita komesa moris espirituálmente, tanba Kristu moris iha ita-nia laran. Ida ne'e mak segredu ba moris foun hodi la'o iha dalan ba lalehan. 

Orasaun: Nai Jesus, obrigadu tanba mate ona ba ami. Ajuda ami atu mate ba ami-nia hahalok aat sira kada loron, nune'e ita bele mai moris iha ami-nia laran. Hanorin ami atu hatudu ami-nia fiar liuhusi halo tuir ita-nia hanorin sira iha Sagrada Eskritura no direji ami atu sempre la'o iha dalan ba lalehan. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏