Fó agradese ba Na'i, tanba Nia di'ak! Tanba Ninia domin metin sei hela to'o tinan ba tinan. 1 Krónikas 16:34 BK
Bainhira liurai David lori fali Arka Aliansa nian ba Jeruzalein, nia fó agradese no hahi'i ba Maromak. Nia hatete ba povu Israel atu hanoin Maromak nia laran-di'ak no kanta knananuk agradese nian. David nia moris la fasil - Nia hasoru problema barak. Liurai Saul duni tuir atu oho nia, nia hetan traisaun husi ninia belun sira, no nia mós luta hasoru ninia pekadu rasik. Maski nune'e, iha ninia problema hotu nia laran, David hili atu fó agradese ba Maromak.
Saida mak ita bele aprende husi David? Primeiru, agradese la signifika moris ne'ebé livre husi problema. Maibé ida-ne'e signifika tau fiar ba Maromak Nia domin iha situasaun hotu-hotu. Liurai David hatene katak maski hasoru susar iha moris, maibé Maromak Nia domin nunka falla ka lakon. Tan ne'e mak nia bele dehan: "Ninia domin metin sei hela to'o tinan ba tinan"
Segundu, fó agradese ba Maromak muda ita-nia laran. Duke fokus de'it kona-ba ita-nia problema sira, ita hanoin Maromak Nia bénsaun sira. Liurai David dala barak halo nia esperiensia ta'uk no matan-been sai knananuk hahi'i nian. Agradesementu foti ninia espiritu no hametin ninia fiar.
Ohin loron, ita mós hasoru susar oioin - hanesan moras, laran-susar, laran-tun, no laran kanek sira. Maibé, hanesan liurai David, ita bele hili atu nafatin agradese ba Maromak. Maromak ne'e di'ak, no Ninia domin la iha rohan. Maski ita hasoru buat saida de'it iha ita-nia moris, ita bele fiar katak Maromak hamutuk ho ita.
Kuandu ita moris ho laran ne'ebé sempre agradese, ita fó Maromak Nia naroman ba ema seluk. Ikusmai, ita-nia moris ne'ebé sempre agradese nafatin halo ita kontinua la'o besik ho Maromak pasu pur pasu la'o ba oin iha dalan ba lalehan.
Orasaun: Nai, ajuda ami atu agradese hanesan David, maski iha tempu susar. Fó-hanoin ami katak Ita-nia domin nunka falla, no dirije ami iha dalan ba lalehan. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment