Maromak huu sai Eskritura hotu, no Eskritura ne'e fó benefísiu hodi hanorin, hatudu sala, koriji no fó treiñu iha moris loos, 2 Timóteo 3:16 BK
Bíblia la'ós livru baibain ida. Bíblia la'ós de'it kolesaun istória ne'ebé ema hakerek ho sira-nia matenek. Bíblia mak Maromak Nia Liafuan. Hanesan 2 Timoteo 3: 16 hatete:"Maromak huu sai Eskritura hotu, no Eskritura ne'e fó benefísiu hodi hanorin, hatudu sala, koriji no fó treiñu iha moris loos". Liuhusi Biblia, Maromak ko'alia ba ita, hanorin ita, korrije ita, no dirije ita iha dalan ne'ebé loos.
Ema barak hakarak rona Maromak ko'alia diretamente ba sira. Lia-loos ne'ebé furak mak Maromak sei ko'alia nafatin ohin loron liuhusi Ninia Liafuan. Kuandu ita loke Biblia ho haraik-an no halo orasaun, ita loke ita-nia laran atu rona ita-nia Kriador nia lian. Bíblia fó sai Maromak Nia karakter, Ninia domin, Ninia promesa, Ninia avizu sira, no Ninia planu atu salva ita liuhusi Jesus Kristu.
Hanesan ita-nia isin presiza hahán loroloron atu nafatin saudavél, ita-nia klamar mós presiza ai-han espirituál husi Maromak Nia Liafuan. Ema ne'ebé ignora Biblia espiritualmente sei sai fraku, fasil atu sente deskorajen no bele vulneravél ba tentasaun. Maibé ema ne'ebé estuda Biblia beibeik sei hetan matenek, forsa, komfortu, no matadalan ba moris loroloron nian.
Lee Biblia la'ós de'it devér ka toman ida. Maibé lee Biblia mak oportunidade ida atu gasta tempu hamutuk ho Maromak personalmente. Kada versíkulu iha kbiit atu muda ita-nia hanoin, forma ita-nia karakter, no halo ita hakbesik liután ba Kristu. Kuandu ita hatene liután Maromak liuhusi Ninia Liafuan, ita sei hadomi liután Nia no hakarak atu halo tuir Ninia hakarak sira.
Iha mundu ne'ebé nakonu ho barullu, ita presiza gasta tempu atu rona ba lian ne'ebé importante liu - mak Maromak Nia lian liuhusi Eskritura. Keta husik loron ida liu leet de'it, sein uza tempu balu atu lee no refleta kona-ba Maromak Nia Liafuan.
Ohin loron, haka'as an atu loke ita-nia Biblia loroloron. Lee ho neineik, halo orasaun kona-ba mensajen ne'ebé ita lee, no husu Maromak atu ajuda ita obedese ba buat ne'ebé Nia hanorin ita.
Kuandu ita rona Maromak Nia lian liuhusi Biblia no husik Ninia Liafuan transforma ita-nia moris, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment