Buat ne'ebé kuda ho isin naturais, moris hias ho isin espirituál. Iha isin naturais, no mos iha isin espirituál. 1 Korinto 15:44 BK
Eskritura referensia: 1 Korinto 15: 35-49
Jesus dehan katak Nia sei fila fali mai ba mundu ida ne'e (João 14:1-3). Bainhira Nia mai fali sira ne'ebé mate ona iha Kristu sei moris hi'as no sira ne'ebé sei moris (moris iha Kristu) momentu Jesus mai fali sei hiit an ba hasoru Nai iha kalohan leten (Lee 1 Tesalonika 4:16-17).
Mazumenus isin-lolon modelu saida mak Maromak sei fo ba sira ne'ebé moris hi'as fali hosi mate no sira ne'ebé sei moris ne'ebé isin nakfilak an ba isin imortal? Biblia fo resposta ne'ebé furak ne'ebé nakonu ho esperansa.
Iha 1 Korinto 15: 35-49, Paulo kompara moris-hias nu'udar kuda fini ida. Kuandu fini ida kuda ba rai, banhira nia moris mai la haree ezatamente hanesan ho fini ne'ebé kuda ona. Fini ne'e krexe sai buat foun ida no haree furak liu. Nune'e mós bainhira ema fiar-na'in ida mate, ema hakoi ninia isin, maibé Maromak sei halo moris fali bainhira nia mai fali ba dala rua no halo isin ne'ebé foun no furak liu.
Ita-nia isin-lolon ne'ebé ita iha agora, hosi loron ba loron sei sai fraku, sai tuan (ferik-katuas), moras, no ikusmai mate. Ita esperiensia moras, kole no terus. Maibé isin-lolon ne'ebé Kristu fo depoisde moris-hias fali sei diferente.
Paulo hatete katak isin-lolon ne'e kuda ho korrupsaun maibé moris fali la ho korrupsaun. Ne'e katak ita-nia isin-lolon foun sei nunka sai ferik-katuas, nunka moras, no nunka mate tan. Mate-isin bainhira hakoi sei dodok no fraku maibé sei moris hi'as ho glória no podér. (1 Korinto 15: 42-43).
Jesus rasik mak sai ita-nia ezemplu. Kuandu Jesus moris hi'as fali, Nia iha isin ne'ebé reál ne'ebé ema bele haree no kaer, maibé la limita ona ho fraku sira iha mundu ne'e nian. Kuandu Maromak Nia emar sira moris hi'as fali, sira sei simu isin hanesan Kristu Nia isin ne'ebé glória.
Versíkulu 49 hatete: "No hanesan ita iha ilas tuir ona mane ida nebee hosi rai rahun, ita sei iha ilas tuir Mane ida nebee hosi lalehan". 1 Korinto 15:49. Ohin loron, ita lori ilas Adão nian, ne'ebé afeta husi sala no mate. Maibé kuandu Jesus fila fali mai, ita sei lori Kristu Nia ilas iha isin ne'ebé perfeitu no la mate.
Ida-ne'e mak liafuan furak ba ema ne'ebé sofre tamba moras, diasabilidade, kanek, ka efeitu husi idozu (ferik-katuas). Maromak promete katak susar no terus sira-ne'e sei la permanese. Loron ne'ebé di'ak liu sei mai.
Tanba Jesus manán mate, rate la'ós rohan ba ema ne'ebé tau fiar ba Nia. Bainhira Kristu fila fali mai, Nia sei bolu Ninia povu ne'ebé fiél husi sira-nia rate laran (Joao 5:28-29) no fó isin foun ne'ebé merese ba moris rohan-laek nian.
Ohin, mai ita tau ita-nia esperansa ba Jesus no Ninia promesa kona-ba moris-hias nian. Isin ne'ebé ita iha agora temporáriu de'it, maibé isin ne'ebé Maromak sei fó depoisde resuresaun perfeitu no dura ba nafatin.
Maibé antes too iha momentu resuresaun no gloriozu ne'e, mai ita kontinua la'o ho fiél iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment