Jesus hatete: "La iha ema ida bele mai iha Hau, só deit Aman, ne'ebé haruka ona Ha'u, mak dada nia. No Ha'u sei halo nia moris hi'as iha loron ikus". João 6:44
Mate mak buat ne'ebé triste liu iha ita-nia moris. Kuaze ema hotu lakon ona ema ne'ebé sira hadomi. Maibé Biblia fó esperansa furak mai ita. Jesus promete katak sei iha loron moris-hias nian, bainhira nia sei fó moris-hias ba ema sira ne'ebé mate ona.
Maibé Se mak sei moris hi'as fali iha loron resuresaun ne'e?
Iha João 6:44, Jesus hatete katak sira ne'ebé mai ba Nia no simu Nia sei moris hi'as fali iha loron ikus. Ne'e katak ema hotu ne'ebé tau fiar ba Jesus no la'o tuir Nia sei la hela iha rate laran ba nafatin.
Iha Joao 14: 1-3, Jesus fó promesa furak ida tan. Nia hatete: "... Ha'u bá no prepara fatin ba imi, Ha'u sei mai fali, no lori imi ba Ha'u-nia fatin. Nune'e iha fatin ne'ebé Ha'u hela, imi mós bele hela iha ne'eba." Jesus prepara hela uma ba Ninia povu, no loron ida Nia sei fila fali mai hodi lori sira ba ne'ebá.
Apóstolu Paulo esplika saida mak sei akontese bainhira Jesus fila fali mai ba daruak. Iha 1 Tesalonika 4: 16-17, nia hatete katak "Nai rasik sei tuun mai hosi lalehan ho lian maka'as, ho lian hosi anju boot, no ho lian hosi Maromak Nia korneta. No sira ne'ebé mate iha Kristu sei moris hias uluk. Depois ita ne'ebé sei moris hela sei sae ba hamutuk ho sira iha kalohan laran hodi hasoru Nai iha loro leten. No ita sei hamutuk nafatin ho Nai." Ema fiar-na'in sira ne'ebé mate ona ne'ebé tau fiar ba Maromak sei sai husi sira-nia rate. Tuirmai ema sira ne'ebé fiar ba Kristu ne'ebé sei moris momentu Jesus mai, sei hamutuk ho sira ne'ebé foin moris hi'as sei sa'e hamutuk hasoru Nai iha kalohan.
Paulo mós hatete iha 1 Korinto 15 katak ita-nia isin-lolon moris-hias nian sei la hanesan ho ita-nia isin-lolon ohin loron nian. Ohin loron ita-nia isin hetan moras, sai ferik-katuas no mate. Maibé kuandu Jesus mai fali no fó moris-hias ona ba Ninia ema fiar-na'in hotu, sira sei simu isin foun ne'ebé sei nunka moras, nunka sai ferik-katuas, no nunka mate tan.
Moris hi'as ka resuresaun ne'e la bazeia ba ita-nia riku-soin, popularidade, ka podér. Maibé ida-ne'e bazeia de'it ba relasaun di'ak ho Jesus Kristu. Sira ne'ebé simu ona Ninia salvasaun no fiél nafatin ba Nia, sira sei hetan promesa kona-ba moris rohan-laek nian.
Ne'e mak esperansa furak tebes! Rate mak la'os rohan ba ema fiar-na'in sira. Jesus manán mate, no tanba Nia moris hi'as ona, ema ne'ebé tau fiar ba Nia mós sei moris fali bainhira Nia mai fali ba daruak.
Ohin loron, tau fiar ba Jesus. Halo tuir Jesus loroloron no kaer metin ba Ninia promesa sira. Se ita halo nune'e, ita bele haree ba oin, ba loron gloriozu, loron moris-hias nian, ne'ebé furak bainhira Kristu fila fali mai.
Bainhira ita hein hela ba loron furak ne'e, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment