Tanba sala nia kolen mak mate, maibé Maromak Nia prezenti mak moris rohan-laek iha ita-nia Nai Kristu Jesus. Roma 6:23 BK
Ema barak husu: "Se mate mai tanba sala, tanbasá mak bebé sira mate? Serake sira halo ona sala?
Bíblia hanorin katak mate tama mai iha mundu tanba Adão no Eva nia sala. Antes sala tama iha mundu, la iha mate. Roma 5: 12 hatete katak sala tama ba mundu liuhusi ema ida deit, no mate mai liuhusi sala.
Bebé sira la mate tanba sira halo sala barak. Sira mate tanba sira moris iha mundu ne'ebé sala estraga ona. Husi tempu ne'ebé Adão monu ba sala, ema hotu moris mai iha mundu ne'e nakonu ho moras, terus, asidente no mate.
Liurai David hatete: "Tebes, ha'u moris mai iha sala nia laran kedas, hau iha sala ona bainhira hau iha ha'u-nia inan nia kanotak. Salmu 51:5. Ne'e katak ema hotu moris mai ho natureza sala-na'in. Ita la presiza hanorin oan kiik sira oinsa atu egois ka hanoin an de'it ka la obedese, sira moris mai ho natureza ne'e kedas. Natureza sala na'in ne'e hola parte iha ema ida-idak nia moris bainhira sala tama ona ba mundu.
Maibé Biblia mós hatudu katak Jesus hadomi tebes labarik sira. Nia hatete: “Husik labarik kiik-oan sira hakbesik mai Hau, no keta bandu sira. Tanba reinu lalehan mak sira nian.” Marcos 10:14. Jesus nunka duni labarik sira. Nia simu sira no haraik bénsaun ba sira.
Kuandu bebé ida mate, ita bele tau fiar ba Maromak Nia domin no laran-sadi'a. Tamba Maromak ne'e justu, laran-di'ak, no domin na'in. Nia komprende saida mak bebé sira la bele komprende. Ita bele husik sira ho seguru iha Maromak Nia futar liman.
Bebé ida ne'ebé mate, fó-hanoin ita katak sala ka pekadu ne'e sériu tebes. Sala lori ona terus no mate ba mundu tomak. Maibé liafuan di'ak mak ne'e: Jesus mai atu salva ita husi sala no mate.
Loron ida Jesus sei fila fali mai (João 14:1-3). No bainhira nia fila fali mai, Apokalipse 21: 4 hatete katak sei la iha tan mate, triste, tanis, ka moras. Maromak sei halo buat hotu foun.
Maibé molok to'o iha loron ne'eba, ita tau fiar ba Maromak Nia domin. Ita hatene katak Jesus tau matan ba labarik hotu. Tanba Jesus nia sakrifísiu, mate la'ós rohan. Iha esperansa ba moris rohan-laek no ba futuru ne'ebé furak ho Maromak.
Bainhira ita tau fiar ba Jesus, ne'ebé manán sala no mate, ita kontinua la'o iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment