Jesus hatete: "Se imi hela iha Ha'u, no Ha'u-nia liafuan hela iha imi, imi bele husu saida de'it neʼebé imi hakarak, no ida ne'e sei halo ba imi" João 15:7 BK. Iha versíkulu ne'e, Jesus uza ai-knanoik kona-ba ramu uvas ida-ne'ebé iha ligasaun ho uvas-hun. Hanesan ramu/sanak ida hetan moris no forsa husi uvas-hun, ita mós hetan moris espirituál no forsa bainhira ita nafatin iha ligasaun ho Kristu.
Maibé oinsá mak ita bele hela iha Kristu iha ita-nia moris loroloron nian?
Ulukliu, ita hela iha Kristu liuhosi gasta tempu ho Nia loroloron liuhusi orasaun. Orasaun la'ós de'it atu husu Maromak buat ruma, maibé iha orasaun ita ko'alia ho Nia nu'udar belun di'ak ida. Iha relasaun ne'ebé di'ak, presiza komunikasaun regular no ita-nia relasaun ho Jesus krexe, kuandu ita mantein ko'alia ho Nia durante ita-nia atividade loron-loron nian.
Segundu, ita hela iha Kristu liuhusi permiti Ninia Liafuan moris iha ita-nia laran. Jesus hatete: "Hau-nia liafuan hela iha imi." Ita presiza lee Biblia, medita Ninia hanorin sira, no aplika lisaun sira-ne'e iha ita-nia desizaun loroloron nian. Maromak Nia Liafuan fó matadalan mai ita kuandu ita konfundi no fó forsa mai ita kuandu ita hetan tentasaun.
Terseiru, ita hela iha Kristu liuhusi obedese ka halo tuir Ninia hanorin sira. La to'o atu hatene de'it saida mak Jesus hanorin; ita tenke aplika Ninia liafuan sira. Kada desizaun hotu ne'ebé ita halo atu hatudu onestidade, laran-di'ak, fó perdua, pasiénsia, no domin mak evidensia katak Kristu moris iha ita-nia laran.
Ba dala haat, ita hela iha Kristu liuhusi depende ba Nia iha situasaun hotu. Maski ita serbisu, estuda, tau matan ba ita-nia família, ka hasoru susar ruma, ita bele konvida Jesus atu hola parte iha ita-nia moris tomak. Moris ema kristaun nian la'ós de'it kona-ba adorasaun iha loron dahitu ka Sabadu, maibé kona-ba la'o hamutuk ho Kristu iha momentu hotu hosi loron ba loron.
Ikusmai, hela iha Kristu rekere haketak buat ne'ebé separa ita husi Maromak. Buat ne'ebé haketak ita husi Maromak mak hanesan sala ne'ebé ita la konfesa, toman aat, no atividade sira hanesan asesu sosiál media ne'ebé foti ita-nia tempu tomak no halo ita la iha tempu atu hamutuk ho Maromak.
Hela iha Kristu la'ós esperiénsia dala ida de'it, maibé desizaun loroloron nian. Bainhira ita nafatin iha ligasaun ho Jesus liuhusi orasaun, estuda Biblia, fé, no halo tuir Ninia hanorin sira, Nia transforma ita-nia hahalok/karakter no fó fuan espirituál ba ita. Fuan espiritu nian ita bele lee iha Galasia 5:22-23
Bainhira ita hili loron-loron atu hela iha Kristu, ita krexe liután iha Ninia grasa no kontinua la'o ho laran-metin iha Dalan ba Lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment