La Hanoin Ita-an De’it, Maibé Valoriza Ema Seluk

Versu prinsipal: Filipenses 2:3

                            Filipenses 2:3

Keta halo buat ida atu provoka malu ka buka diak ba ita nia aan deit. Maibé ho laran haraik aan, ema ida-idak sei hanoin Ninia maluk mak diak liu fali ninia aan rasik. Filipe 2:3

Ita hotu hakarak ema seluk respeita, valoriza no rona ita-nia hanoin. Maibé dala ruma, ita hakarak sai importante liu ema seluk. Bainhira ema seluk hetan susesu, ita sente inveja/laran moras. Bainhira ema fó ideia ida ne’ebé di’ak liu ita-nian, ita la hakarak simu. Bainhira ita halo serbisu ida, ita hakarak ema hotu haree no fó apresiasaun ba ita.

Maibé iha Filipenses 2:3, apóstolu Paulo hanorin ita atu la halo buat ruma tanba hakarak sai famozu ka atu hatudu katak ita mak ema importante liu. Ita tenke aprende atu moris ho humildade no respeita ema seluk.

Saida mak humildade?

Humildade la signifika katak ita la iha valor ka la iha kapasidade. Humildade mak hatene katak ita iha kapasidade, maibé rekoñese ema seluk mós iha kapasidade no valor. Ita la presiza halo ema seluk ki’ik atu ita bele sai boot.

Oinsá mak ita bele pratika ida-ne’e iha moris loroloron?

1. Iha família: Bainhira ita-nia kaben, oan ka maun-alin ko’alia, rona sira ho respeitu. La hanoin katak ita-nia hanoin mak loos hela de'it.

2. Iha igreja: Bainhira ita serbisu ba Maromak, la buka atu hetan popularidade ka pozisaun aas. Halo serbisu ho fiél, maski ema seluk la haree ka la agradese ba ita.

3. Iha serbisu fatin: Bainhira kolega ida iha ideia ne’ebé di’ak, agradese no apoia nia. La tenta atu foti nia susesu ba ita-nia an.

4. Iha moris loroloron: Bainhira haree ema ida presiza ajuda, la hein atu nia husu ka atu ema seluk haree ita. Ajuda nia tanba ita hadomi no respeita nia.

Jesus mak ezemplu perfeitu ba humildade. Maski Nia mak Maromak nia Oan, Nia mai atu servisu ba ema seluk, la’ós atu ema seluk serbisu ba Nia (Marcos 10:45). Se ita hakarak tuir Jesus, ita tenke aprende atu hadomi ema seluk no la hanoin ita-an de’it.

Pergunta ba ita-an: Ohin, serake iha ema ida ne’ebé ita bele rona, respeita, ka ajuda, maski ita la hetan kolen ka agradese husi nia?

Orasaun: Aman Maromak , ajuda hau atu la hanoin hau-nia an de’it. Fó hau laran ne’ebé hakmatek no humildade atu respeita ema seluk. Ajuda hau atu la buka popularidade, maibé atu halo buat hotu ho domin, hanesan Jesus hatudu mai hau. Iha Jesus Nia naran, ami harohan. Amen.

🙏 MAROMAK FO BENSAUN🙏🏻

Click iha ne'e atu  Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏