Halloween

Selebrasaun Halloween iha Timor-Leste ladún populer kompara hó loron santu sira nian ka bainbain ita bolu dehan loron matebian.

Selebrasaun Halloween popular liu iha America no Europa kompara hó loron matebian nian. Iha Amerika purezemplu, ema gasta orsamentu mazumenus  biliaun 9 ka liu Kada tinan atu selebra Halloween ( boot Liu ita Nia OGE) tinan tinan.

Halloween bainbain ema selebra iha 31 de Outobru.  Saida mak Bíblia ko'alia kona-ba Halloween? Halloween di'ak ka aat?  Karik iha info ruma ne'ebé hatete katak ema Kristaun presiza selebra?

Saida mak Bíblia ko'alia kona-ba  Halloween?

Dahuluk, ita tenke kompriende katak Halloween ne'e kultura ema Europa sira nian no la iha referensia iha bíblia.  Maibé iha prinsipiu balu ne'ebé ita tenke analiza atu hatene seráke Halloween ne'e aliña hó Maromak Nia futarlia ka lae?

Atu kompriende liu oinsá Halloween no loron matebian relasiona hó Bíblia mai ita haree nia definisaun no historia.

Definisaun Halloween

Liafuan Halloween literalmente signifika kalan antes loron santu sira nian ka loron matebian sira nian ne'ebé selebra iha 1 de Novembru kada tinan.

Halloween mós hanesan liafuan badak hosi   "Allhalloween", Kalan loron santu sira nian ne'ebé selebra iha 31 de Outobru tinan-tinan.

Orijin hosi Halloween  komesa ona    tinan  1900  liuba iha Inglatera, Irlandia no Franca Norte.  Selebrasaun ida ne'e hanesan Selebrasaun "Celtic celebration of the new year" ne'ebé hanaran, "Samhain"  ne'ebé sira selebra iha 1 Novemberu. Iha loron ida ne'e sira fiar katak ema mate sira nia klamar sei mai hamutuk ita ema moris. 

Samhain popular nafatin to'o bainhira St. Patrick no misionariu Kristaun seluk to'o iha area neebá. Bainhira populasaun komesa konverte ka muda ba Fiar ba Kristaun Selebrasaun ida ne'e komesa lakon nia popularidade.  Maibé emves igreja eradika ka halakon prátika Jentiu sira nian hanesan  “Halloween” ka Samhain, igreja uza fali loron boot sira ne'e no muda de'it nia sentidu uitoan atu lori  ema Jentiu sira tama ba Relijiaun Kristaun ne'ebé desde papa Konstantin sai Relijiaun Estadu nian.

Tuir fiar tradisionál ema Europa sira nian, katak iha kalan 1 Novemberu, Demonia no espiritu aat sira la'o libre iha rai atu simu hó haksolok sira nia loron boot. Oinsá hó ita nian? Karik sei kiik to'o agora ita rona historia ne'ebé hanesan? Historia ne'e mai hosi ne'ebé? Mai hosi ita nia beiala sira? Lae, ne'e Mai hosi fiar tradisionál ne'ebé adopta mai igreja.

Tuir sira nia fiar, iha kalan neebá, Demonia goza, halo ta'uk, amiesa no halimar buat aat hó ema moris. Dalan ne'ebé sira foti atu evita atu Demonia labele halo ta'uk ka halo presegisaun ba sira mak atu halo oferta ba Demonia saida mak sira gosta liuliu hahaan ne'ebé di'ak no buat ne'ebé midar.

Dalan seluk atu ses hosi abuzu demonia sira nian mak ema tenke halo nia an hanesan Demonia liuhosi hatais hanesan matebian sira no hamutuk hó sira iha kalan matebian sira nian. Liuhosi dalan  ne'e Demonia hanoin katak ema hanesan sira nia maluk no sei la abuza ema. Tanba ne'e mak iha loron Halloween  ema hatais hanesan Diabu ka Demonia.

Iha tradusaun Roma nian, sira mós iha Selebrasaun atu fó onra ba goddess/Dewi  Pomona ne'ebé sira selebra iha 1 Novemberu.

Hosi tempu ba tempu, jerasaun ba jerasaun kostume ida ne'e iha mudansa tuir kultura modernu nian, maibé nia objetivu mantein mak halo oferta  ba Demonia atu labele halo aat ka abuza ema moris.

Pergunta mak ne'e, biblikamente Halloween no loron matebian ne'e tuir Bíblia ka lae? Ema Kristaun bele selebra loron boot sira ne'e ka lae?

Hanesan ema Kristaun ne'ebé kaer metin Bíblia hanesan fundasaun ba fiar nian, ita tenke tetu no analiza seráke Selebrasaun sira ne'e aliña hó Maromak Nia futarlia ka lae?

Bíblia bandu komunikasaun ka relasaun saida de'it hó Demonia, matan dook ka ema mate. Maromak Nia futarlia iha  Levitivo 20:27  katak "Imi tenke oho tiha mane ka feto neʼebé koko atu koʼalia ho ema mate ka siʼik futuru. Povu neʼe tenke tuda mate sira. Sira tenke lori todan ba sira-nia sala" (Os homens ou mulheres que, entre vocês, forem médiuns ou consultarem os espíritos, terão que ser executados. Serão apedrejados, pois merecem a morte”.
Levítico 20:27 NVI)

Deuteronomio 18:9-13  aumenta tan katak  “Bainhira imi tama ona ba rai neʼebé Na'i, imi-nia Maromak, sei fó ba imi, imi labele aprende atu halo tuir hahalok aat husi nasaun sira iha neʼebá. Iha imi-nia leet labele iha ema neʼebé sunu ninia oan-mane ka oan-feto iha ahi, ema neʼebé siʼik futuru,  ema neʼebé halo masonik, ema neʼebé buka sinál oioin atu siʼik futuru,  matan-dook, ema neʼebé fekit ema seluk, ema neʼebé husu ba ema neʼebé koko atu koʼalia ho ema mate ka husu ba ema neʼebé siʼik futuru,  ka ema neʼebé husu ema mate. Tanba Na'i hakribi ema neʼebé halo buat sira-neʼe, no tanba hahalok aat sira-neʼe mak Na'i, imi-nia Maromak, sei duni sai sira husi imi-nia oin. Imi tenke moris ho hahalok loos iha Na'i, imi-nia Maromak, nia oin"

Seráke Sala, atu halo Selebrasaun Halloween no loron matebian nian?
Mai ita haree saida mak Bíblia ko'alia kona-ba topiku ida ne'e iha Efeso 5:11, “Keta hola parte tan iha hahalok folin-laek neʼebé mai husi nakukun; maibé hatudu sai katak hahalok sira-neʼe mak folin-laek"

Maromak nia futarlia iha ne'e konsola ita atu labele asosia hó atividade nakukun ka Demonia nian maibé tenke fó naroman Lia Loos Maromak nian ba ita nia maluk sira.

Ita haree ona tuir historia katak Halloween  no loron matebian la'os maihosi Bíblia maibé igreja mak integra tradisaun Jentiu nian ba loron boot igreja nian.  Agora ita hatene ona Halloween nia definisaun, nia orijin no nia objetivu,  oinsá ema Kristaun modernu responde ba kestaun ne'e?

Maromak bolu ita atu tuir Nia no "Tan neʼe, sai husi sira-nia leet, no haketak imi-nia an’, Na'i dehan, ‘no keta kona buat neʼebé la moos; no haʼu sei simu imi" (2 Korinto 6:17).

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Levitico 20:27

Read More

Ema labele moris deʼit ho paun

Hakerek nanis ona: ‘Ema labele moris deʼit ho paun   maibé ho liafuan hotu neʼebé sai husi Na'i nia ibun " Lukas 4:4

Jesus respondeu: “Está escrito: ‘Nem só de pão viverá o homem” Lucas 4:4 NVI

Hafoin hetan Batismu hosi João Batista, Diabu lori Na'i Jesus ba rai fuik atu tenta Na'i Jesus.  Maibé Na'i Jesus hatene Nia forsa bainhira Nia depende ba Aman Maromak. Na'i Jesus moris hanesan ema (João 1:14), Na'i Jesus hakarak Maromak Nia oan sira depende ba Maromak no  Nia  Promesa sira.

Maromak nia futarlia mak ita nia surik (Ebreu 4:12). No fiar ba Maromak mak ita Nia  liafuan mak ita Nia eskudu (Shield) (Efeso 6:16).

Maromak iha dalan barak atu fornese ka tulun Nia ema sira, tanba ne'e ita tenke depende tomak ba Maromak.

Diabu nia promesa sira ne'e bosok-teen hotu; no bainhira ita permiti nia atu influensia hatudu riku-soi mundu nian no gloria mundu nian nia uza hanesan lasu de'it atu lori ita ba destruisaun.

Tan ne'e ita tenke rejeita kedas iha biban ne'ebé de'it bainhira ita hetan tentasaun  hosi diabu atu hetan buat ruma hanesan riku-soi, haksolok mundu nian hanesan sex etc. Ita tenke buka riku-soi, onra no haksolok iha serbisu no adorasaun ba Maromak mesak de'it.

Kristu sei la adora Diabu tanba de'it Diabu hakarak oferese riku-soi mundu nian, tanba Na'i Jesus hatene katak buat hotu iha mundu Aman Maromak sei fó ba Nia.

Diabu tenta Na'i Jesus atu oho Nia an liuhosi  haksoit tun hosi templu Nia kakuluk,  ho promesa ida katak Maromak Nia anju santu sira sei tane Nia. Diabu uza versu Bíblia nian iha Salmo 91:11 lori tenta Na'i Jesus.

Mai ita labele uza sala eskritura hodi koko Maromak maibé mai ita estuda, buka hatene, buka protesaun hosi Maromak Nia futarlia bainhira ita hetan asalta.

Biarbá Maromak Nia futarlia hela hó ita, tanba ida ne'e mak halo ita moris. Ita nia Na'i Maksoin manan tentasaun tanba Nia uza Maromak Nia futarlia lori defende Nia an no to'o ikus mai Diabu hakotu nia tentasaun. Kristu husik Diabu tenta Nia hó nia forsa tomak no Na'i Jesus manan.

Maromak Nia futarlia dehan "Tan neʼe, hakruʼuk ba Maromak; no kontra hasoru Diabu, no nia sei halai husi imi" Tiago 4:7

Bainhira ita rezisti Diabu nia sei halai hosi ita. Maibé nia ses iha tempu ida no  buka tempu seluk atu tata Na'i Jesus Nia ain-klor maibé Na'i Jesus sei harahun nia ulun, Ge 3:15.  Ida ne'e akontese iha foho kalvariu, Diabu konsege uza ema Judeu balu no autoridade Roma nian lori oho Na'i Jesus maibé Na'i Jesus moris hi'as, manan Sala no manan mate. Iha tempu ikus Na'i Jesus sei harahun Diabu Nia ulun liuhosi soe tama ba ahi infernu.

Loos duni bainhira ita rezisti Diabu nia sei halai hosi ita (Tiago 4:7). Maibé kuidadu nafatin tanba " Imi-nia inimigu, Diabu, laʼo bá-mai hanesan leaun ida  buka atu han ema ruma" 1Pedro 5:8

Mai ita medita Na'i Maromak nia futarlia loron no kalan atu proteje ita nia an hosi diabu nia tentasaun.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.
Atu lee kona-ba topiku seluk-seluk, favor vizita dalanbalalehan.blogspot.com ka like ka vizita webpage Facebook: Dalan ba Lalehan

Lukas 4:4

Read More

Prepara dalan ba Na'i

Foho-leet hotu sei ateru tiha, foho aas no foho-oan hotu tenke halo tetuk, dalan kleʼuk hotu tenke halo loos no dalan aat hotu tenke halo kabeer. Lukas 3:5

Iha tempu uluk, bainhira  emperor ka Liurai ida atu vizita teritoriu ida,  sira haruka ema ida ba uluk atu prepara dalan. Dalaruma, sira tenke halo dalan foun, iha rai fuik ne'ebé liu ladi'ak, tesi ai, ateru. Dala ruma, ai-horis komesa moris iha dalan laran, dala ruma mota estraga dalan,  lisu nakonu iha dalan sira ne'e hotu tenke hadi'a no hamoos.

Iha kultura Timor nian, ida ne'e sei ezisti mesmu menus uitoan ona kompara hó tempu uluk nian. Hau sei lembra, uluk ami sei kiik, antes administradór distritu satán Governadór ida atu mai vizita suku ida, preparasaun hosi komunidade semana ka fulan ida antes tenke halo ona, balu lere duut, balu ateru dalan, sar fo'er etc.

Bainhira profeta Isaias ko'alia kona-ba Na'i Jesus ne'ebé sei mai, nia hatete katak Maromak sei haruka ema ida  ba uluk atu prepara dalan. Bainhira ita lee evanjellu, ita sei haree katak ema ne'ebé Maromak haruka ba uluk atu prepara dalan ba Na'i Jesus mak João Batista. Oinsá João Batista prepara dalan? Iha buat haat ne'ebé nia hanorin atu prepara ema nia laran atu simu Na'i Jesus:

Dahuluk, João Batista hanorin atu sira espera katak Na'i Jesus atu mai.

Daruak, atu sira sente sira nia presiza ba Na'i Jesus atu salva sira hosi Sala ka pekadu.

Datoluk, João Batista hanorin sira atu arepende hosi sira nia sala.

Dahaat, João Batista hanorin atu bainhira Na'i Jesus mai,  sira tenke rona,  hadomi, fiar no halo tuir Nia.

Agora se Na'i Jesus atu mai iha ita nia fatin, iha ne'ebé ita hela ba, seráke ita la kontenti karik ita hetan konvite atu prepara dalan ba Na'i Jesus?

Seráke ida ne'e, la'os hanesan onra boot ida atu hasai fatuk sira hosi nia dalan?   Ba sira ne'ebé hadomi Na'i, sira nia laran sei haksolok prepara dalan ne'ebé kabér ba Na'i Jesus.

Se mak lakoi sai pioneer ba Na'i Jesus, Liurai ba Liurai hotu. Imi hatene ka lae,  Na'i Jesus hakarak loos mai; la'os liuhosi dalan maibé Nia hakarak mai iha uma kain hotu no ita idaidak nia laran la'os atu vizita de'it maibé atu Hela ba.

Entaun, saida mak impede Na'i Jesus atu mai hela hó ita? Bainhira ita la prontu atu simu Nia. Saida mak Na'i Jesus hanaran ba laran sira ne'ebé la hamta'uk Maromak? Nia hanaran laran fatuk (Ezequiel 36:26).

Karik ita la halo tuir Na'i Jesus Nia hanorin no simu Nia hanesan ita nia Salvadór, iha fatuk balu iha iha ita laran ne'ebé presiza hasai. Oinsá?  Liuhosi hosi obedese Nia futarlia no submete ita nia an tomak ba Maromak liuhosi orasaun.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 3:5

Read More