Konvite laran-luak

Haree ba, Hau hamriik iha odamatan no dere. Se ema ida rona Hau nia lian, no loke odamatan, Hau sei tama no haan hamutuk ho nia, no nia sei haan hamutuk ho Hau. Apokalipse 3:20 BK

Bainhira João sai dadur iha illa Patmos tanba nia haklaken Maromak nia liafuan no fó sai ninia esperiénsia ho Jesus, nia hetan vizaun ida. 

Jesus haruka nia hakerek buat ne'ebé nia haree no haruka ba igreja hitu. Maski mensajen ne'e envia ba igreja literál iha tempu ne'ebá, maibé sira nafatin relevante ba ita ohin loron. 

Agora ba kontestu balu, mai ita ko'alia kona-ba Jesus nia mensajen ba igreja iha Laodiseia... 

Jesus hatete katak igreja iha Laodiseia ne'e la manas ka malirin, maibé morna. Sira riku no konfortavel, prosperu no auto-sufisiente, apatétiku la prekupa ho ema seluk. Maski nune'e, Jesus kontinua fó konvite ho laran-luak: 

 "Haree ba, Hau hamriik iha odamatan no dere. Se ema ida rona Hau nia lian, no loke odamatan, Hau sei tama no haan hamutuk ho nia, no nia sei haan hamutuk ho Hau" Apokalipse 3:20 BK

Serake ita haree no sente ida ne'e? 

Ida-ne'e mak konvite ida ba intimidade, ba relasaun kle'an ho Maromak, Kriador, sustentador no redentor ba buat hotu. 

Maibé keta haoin sala, Jesus ne'e laran mamar. Nia lakohi obriga ema ida. Duke halo nune'e, nia book ema-nia laran no fó konvite ba sira... 

... Maibé ita tenke loke odamatan. 

Igreja iha Laodiseia nakonu, maibé espirituálmente mamuk. Sira desorientadu hosi sentimentu seguransa falsu. Sira hetan susesu tuir mundu nia sasukat, maibé sira la susesu tuir Maromak nia sasukat.

Maski nune'e, Jesus kontinua bolu sira. Jesus kontinua dere odamatan ba sira. Nia mós sei bolu no dere odamatan ba ita iha ita-nia tempu agora. Maromak ne'ebé tau planeta sira ba sira-nia fatin no kria foho sira ne'ebé ezisti, hakarak atu besik ita, hamutuk ho ita no salva ita. 

Entaun, se ita rona Maromak bolu, ka ita sente katak nia dere hela ita-nia odamatan laran nian, loke ba ó-nia odamatan

Nia hein hela ho liman nakloke.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Liafuan ne'ebé furak liu

Hahuu fo-foun, Liafuan iha nanis ona. No Liafuan nee hamutuk ho Maromak. No Liafuan nee mak Maromak. João 1:1 BK

Versíkulu ida-ne'ebé iha kbiit boot liu iha eskritura mak hakerek iha evanjellu João: 

"Hahuu fo-foun, Liafuan iha nanis ona. No Liafuan nee hamutuk ho Maromak. No Liafuan nee mak Maromak" João 1:1 BK

Bainhira ita kontinua lee, ita bele hatene ho klaru katak Maromak nia espíritu santu inspira autór atu identifika Jesus Kristu nu'udar "Liafuan". 

Husi liafuan primeiru iha Biblia, ita aprende katak: "Hahuu fo-foun, Maromak kria lalehan no rai" (Jénesis 1:1), agora João hatete: "Hahuu fo-foun, Liafuan iha nanis ona" No la'ós de'it Jesus mak iha ne'ebá, maibé "Liafuan hamutuk ho Maromak". No la'ós de'it Maromak nia Liafuan, maibé "Liafuan mak Maromak". 

Tan ne'e, se iha inisiu Jesus ezisti ona, se Nia hamutuk ho Maromak, no se Nia mak Maromak, entaun ida-ne'e halo Nia la'os de'it ema di'ak ida, Mestri morál nian ka profeta ida. 

João deklara katak Jesus ne'e kompletamente ema no kompletamente Maromak. Ida ne'e ita rona hanesan deklarasaun beik ida, maibé ida ne'e mak buat ne'ebé loos. 

Lia-loos mak Maromak hadomi tebes mundu ne'e to'o Nia husik ninia privelijiu divinu sira iha llLalehan, Nia mai moris hanesan ema, no Nia mate hanesan kriminozu ida, atu nune'e ema ne'ebé nia hadomi bele hetan moris rohan-laek. Ema hanesan ita boot ho ha'u.

Hanoin ba katak Jesus la'ós naran baibain ida hosi istória, maibé nia mak Kriador moris nian.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Laran-sadi'a ba sira ne'ebé iha dúvida fé nian

Hatudu laran luak ba sira nebee duvida hela. Judas 1:22 BK

Iha livru Juda, ita hetan instrusaun simples no kle'an ida: "Hatudu laran luak ba sira nebee duvida hela" Judas 1:22. Liafuan sira-ne'e fó-hanoin ita katak importante tebes atu hatudu laran-sadi'a no kompaixaun ba ema ne'ebé dúvida iha sira-nia fiar ba Maromak. Ne'e inklui ita-nia an rasik! 

Dúvida ne'e hanesan esperiensia komún ida iha ita-nia viajen fé nian. Ida-ne'e bele mosu husi fonte oioin, hanesan pergunta intelektuál sira, problema pesoál sira, ka influénsia husi mundu ne'ebé hale'u ita. Kuandu ita hasoru ema ne'ebé iha dúvida kona-ba fiar, importante tebes atu ita responde ho laran-sadi'a no kompriensaun.

Hatudu laran-sadi'a katak ita hatudu laran-di'ak no pasiénsia ba ema seluk. Ida-ne'e envolve rona sein julga ema, fó apoiu, no fó fatin ne'ebé seguru atu ema ko'alia ho onestu. Kuandu ita hatudu laran-sadi'a ba sira ne'ebé dúvida, ita kria ambiente ida-ne'ebé sira bele hato'o sira-nia pergunta no preokupasaun ho nakloke, sein ta'uk atu ema rejeita ka kondena. 

Nu'udar Kristu nia dixipulu, ita tenke banati-tuir ninia ezemplu. Jesus sempre hatudu laran-sadi'a ba sira ne'ebé luta iha sira-nia fiar. Nia hasoru ema iha sira-nia kondisaun idaidak, hodi fó matadalan no komprensaun. Jesus nunka rejeita sira ne'ebé buka Nia, mesmu sira iha duvida no inserteza.

Kuandu ita hatudu laran-sadi'a ba sira ne'ebé dúvida, ita la'ós de'it ajuda sira iha sira-nia viajen fé nian, maibé mós ita refleta Na'i Salvadór Ninia domin. Ita mós bele hatudu laran-sadi'a ba ita-nia an kuandu ita sente dúvida. 

Iha fatin ba pergunta sira. Iha fatin ba inserteza sira. Dúvida la intimida Jesus, no dúvida la presiza intimida ka halo ita ta'uk ita mós.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More