La iha buat ida mak bele haketak ita

Tanba hau fiar duni katak la iha buat ida - mate ka moris, ka anju sira, ka ukun nain sira, ka buat sira nebee iha agora, ka buat sira nebee atu mai, ka kbiit, ka buat aas, ka buat klean, ka buat seluk-seluk tan iha kriasaun tomak - la iha buat ida nebee bele haketak ita hosi Maromak nia domin, iha Kristu Jesus ita nia Nai. Roma 8:38-39

Paulo nia liafuan iha Roma 8:38-39 asegura katak fiar-na'in sira seguru iha Maromak nia domin liuhosi Kristu. Versikulu ne'e ko'alia ho klaru katak la iha buat ida (luta internal ka esternal) ne'ebé bele haketak ita hosi ligasaun entre fiar-na'in ho sira-nia Salvador. 

Tema grande konflitu entre forsa nakukun no naroman subliña iha testu ida-ne'e. Ita moris iha universu ida ne'ebé iha funu espirituál laran, iha ne'ebá satanas buka atu deskoraje, lohi no destroi ita. Maski nune'e, apóstolu Paulo hatete ho aten-barani katak maski forsa nakukun boot halo nusa mós, la bele halakon Maromak nia domin ba ita. Domin Kristu nian, ne'ebé hatudu liuhusi Ninia moris, mate, no halo interasau/orasaun iha fatin sagradu iha lalehan, nafatin metin. 

Importante liu mak domin ne'e la'ós de'it kona-ba sentimentu, maibé mós kona-ba redensaun. Ohin loron, Kristu kontinua serbí iha santuariu iha lalehan, iha ne'ebé Nia kontinua halo orasaun ba ita (Ebreu 7:25).

"Tanba nee, Nia bele salva too kompletu duni sira nebee hakbesik ba Maromak liu hosi Nia. Tanba Nia sempre moris atu halo orasaun ba sira" Ebreu 7:25

Ita-nia fiar la'ós bazeia ba ita-nia sentimentu ka situasaun, maibé bazeia ba Kristu Nia serbisu ne'ebé hotu ona no kontinua halo advokasia ba ita. 

Kuandu ita hasoru susar, lakon, ka ta'uk, Roma 8 fó-hanoin ba ita kona-ba lia-loos ne'ebé nunka lakon: Maromak nia domin la fraku. Maromak Ninia domin la muda tamba ita-nia falla/monu no lakon iha tempu balu. Maromak Ninia domin ne'e ba nafatin, konsisten, no personal. 

Biarba versikulu ida ne'e hametin ita-nia laran, ohin loron. Tamba ita la'os depende ba ita-nia kbiit rasik, maibé ba Maromak ne'ebé Ninia domin boot - mate no moris la bele halakon domin ne'e. 

Reflesaun: 

Serake ita tau fiar tomak ba Kristu nia domin ohin loron, ka husik sentimentu tauk domina ita? Intrega an ba Maromak no reklama vitoria ne'ebé paulo deskrebe - domin rohan-laek.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Fatuk ida nebee badaen sira rejeita

Imi seidauk lee Eskritura nee ka? ‘Fatuk ida nebee badaen sira rejeita, ida nee sai fatuk ulun iha lidun. Marcos 12:10 BK

Iha Marcos 12:10, Jesus temi Salmo 118 atu konfronta ka hasoru ulun-nain relijiaun sira ne'ebé la simu Nia. Jesus hatudu ninia an nu'udar "fatuk lidun ne'ebé ema rejeita". Ida-nee mak hanesan imajen poderozu ida ne'ebé hatudu oinsá Maromak sempre halo serbisu iha dalan ne'ebé ita la espera. Buat ne'ebé ema soe tiha, Maromak uza nu'udar fundasaun. 

Jesus la'os Mesias ne'ebé Ulun-nain sira espera. Saida mak sira espera? Sira buka podér polítika no glória mundu nian, maibé saida mak Na'i Jesus oferese? Jesus oferese haraik-an, sakrifísiu no konvite atu arrepende an. Sira la simu Nia, maibé Maromak tane aas Nia hodi halo Nia sai nu'udar fatuk salvasaun nian. Agora buat hotu tenke aliña ho Nia no depende ba Nia. 

Iha ita-nia moris rasik, dala ruma ita rejeita buat ne'ebé la tuir ita-nia espetativa - Rejeisaun bele ba pesoál ida, susar ida, ka Maromak nia konvite rasik liuhosi Ninia hanorin sira iha Sagrada Eskritura. Maibé Marcos 12: 10 fó-hanoin ita katak dala barak Maromak harii ninia serbisu ne'ebé boot uza buat ne'ebé ita haree hanesan la vale.

Reflesaun: 

serake iha dalan ruma ne'ebé ita rejeita Maromak nia serbisu tanba ida-ne'e la tuir ita-nia espetativa, latuir ita-nia tradisaun, la tuir ita-nia fiar tradsionál, la tuir buat ne'ebé ita gosta? Husik Jesus, nu'udar fatuk-sasukat ka fatuk fundasaun, aliña Ita-nia laran halo sai loos tuir Maromak Ninia hakarak. Simu no benvindu Nia la'ós de'it hanesan Salvador, maibé hanesan fundasaun ba ita-nia moris tomak. 

Orasaun:  Nai Jesus, obrigadu tanba Ita mak fatuk-sasukat. Perdua ami-nia sala tanba dala Barak ami rejeita Ita-nia planu, ita-nia konvite sira. Ajuda Ami tau fiar ba Ita-nia planu no dezeñu sira no harii ami-nia moris ne'ebé funda iha ita boot de'it. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Moris ne'ebé nakonu ho agradesementu

Tama ba Ninia portaun ho agradese, no tama ba Ninia pátiu hodi hahii Nia! Foo agradese ba Nia, hahii Ninia naran! Salmu 100:4 BK

Serake ita hato'o ita-nia agradesementu, bainhira ko'alia ho Maromak? Mundu ne'ebé hale'u ita la enkoraje ita atu fó agradesementu. Hanorin sira iha mundu ne'e, hanorin ita atu tau matan ba ita-nia an hodi bele hetan buat ne'ebé ita hanoin ita merese hetan. 

Maski nune'e, ema kristaun tenke sai ema ne'ebé agradese liu iha mundu ne'e tanba Maromak fó ona buat hotu mai ita. Tiago 1:17 fó-hanoin ita katak prezente di'ak hotu mai husi Maromak. Ida-ne'e hatudu katak Maromak sempre hatudu laran-di'ak ba ita. 

Maromak la'ós de'it fó ona moris no iis-moris, maibé Nia mós fó ona ba ita prezente gratuita - moris rohan-laek. Maromak fó dalan ba ita atu iha relasaun di'ak ho Nia liuhusi Jesus nia mate no moris-hias. Ida ne'e mesak de'it mós sufisiente ba ita atu moris ho gratidaun no sempre agradese ba Maromak. 

Tanba buat ne'ebé Maromak halo ona ba ita, ita-nia laran tenke kontinua hato'o agradesementu ba Maromak. Maski nune'e, dala barak ita murmura tanba buat sira-ne'e la akontese tuir ita-nia hakarak. Ita murmura tanba ita la iha buat ne'ebé ita hanoin ita merese atu hetan. No bainhira ita murmura no protesta barak liutan, ita-nia laran sai aat liután.

Agradese ba Maromak tamba Salmo 100 fo ba ita ai-moruk ne'ebé bele kura hahalok-aat hanesan protesta no murmura: mak agradesementu. Agradesementu mak hanesan toman espirituál ida ne'ebé ita presiza intensionalmente dezenvolve liuhosi kontinua prátika toman ne'e. Ita bele prátika ida ne'e liuhosi foti tempu kada loron ko'alia ho Maromak, no agradese ba Maromak tanba buat hotu ne'ebé Nia halo ona mai ita. Ita mós bele hatudu ita-nia agradesementu liuhosi fó-hatene ba ema seluk katak ita agradese tebes ba sira-nia kontribuisaun ba ita-nia moris. 

Tan ne'e, bainhira ita hakarak protesta no murmura, hanoin didi'ak kona-ba Maromak Nia domin no laran-di'ak iha ita-nia moris. Duke murmura no protesta kona-ba moris ne'e, di'ak liu espresa ita-nia agradesementu ba Maromak no ba buat hotu ne'ebé Nia fó ona ba ita. Kontinua alista kona-ba buat ne'ebé halo ita agradese ba Maromak no kontinua aumenta ba lista ne'e iha semana tomak. Bainhira ita halo ne'e ona, haree to'ok oinsá ita-nia Hanoin no laran komesa transforma tamba hahalok simples: agradesementu ba buat sira ne'ebé ita iha 

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More