Ba anju hosi igreja iha Laodiseia hakerek: ‘Liafuan hosi Nia ne'ebé Amén, sasin ne'ebé fiel no loos, ne'ebé huun ba Maromak Nia kriasaun. Ha'u hatene buat ne'ebé imi halo, katak imi la malirin ka manas. Ha'u hakarak katak imi malirin ka manas. Maibé imi morna deit, laos manas ka malirin. Nune'e Ha'u sei muta sai imi hosi Ha'u-nia ibun. Tanba imi dehan, “Ha'u riku ona. Ha'u halibur ona riku-soin barak. Ha'u la presiza buat ida.” Maibé imi la hatene katak imi iha terus, laran susar, moris kiak, matan delek no isin molik. Apokalipse 3:14-17 BK
Mensajen ba igreja iha Laodiseia mak konvite sériu ba ema kristaun atu ezamina didi'ak sira-nia kondisaun espirituál. Jesus hatete katak ema sira iha ne'ebá fiar katak espiritualmente sira riku no forte iha lia-loos, maibé iha realidade sira kiak, terus no matan-delek. Sira-nia fiar sai ona morna - sira la kompletamente dedika sira-nia moris no sira mós la kompletamente husik hela sira-nia hahalok mundu nian. Avizu ne'e fó-hanoin ita katak ita presiza regularmente ezamina kondisaun ita-nia fé.
Dala ruma ema kristaun sira hanoin katak sira nia kondisaun fiar nian di'ak hela simplesmente tamba de'it sira ba igreja, hatene Biblia, ka hetan bénsaun barak. Maibé susesu ne'ebé ema haree iha li'ur la signifika katak sira-nia kondisaun espirituál mós di'ak. Maromak haree ita-nia laran, no Nia hatene serake ita-nia domin ba nia ne'e reál no ativu.
Jesus la fó de'it mensajen ne'e atu kondena igreja, maibé atu ajuda sira muda sira-nia hahalok. Ho domin, Nia konvida sira atu simu rikusoin espirituál ne'ebé loos. Nia haruka sira atu sosa osan-mean ne'ebé purifika iha ahi laran atu nune'e sira bele sai riku ne'ebé loos, haruka sira hatais mutin atu taka sira-nia moe, no kose sira-nia matan ho salep matan nian atu nune'e sira bele haree ho klaru (Apokalipse 3:18). Símbolu sira-ne'e reprezenta fiar, hahalok loos, no komprensaun espirituál ne'ebé mai husi Kristu.
Maromak mós fó-hanoin sira katak Ninia hasé ne'e hanesan aktu domin nian. Nia hatete: "Hau koriji no fo disiplina ba sira nebee Ha'u hadomi" Apokalipse 3:19. Fiar ne'ebé loos presiza haraik-an no prontu atu fila fali ba Maromak kuandu ita hatene ita-nia frakeza sira.
Kristu mós fó konvite furak ida: Nia hamriik iha odamatan no dere no hein ema fiar-na'in sira atu loke sira-nia laran ba Nia (Apokalipse 3: 20). Bainhira ita hatán, Nia promete atu hamutuk ho ita no renova ita-nia relasaun ne'ebé di'ak liután.
Ikusmai, Jesus promete katak Nia sei fó rekompensa boot ba sira ne'ebé manán tentasaun. Sira sei tuur hamutuk ho Nia iha Ninia kadunan, hodi goza Ninia vitória (Apokalipse 3:21). Promesa ne'e fó korajen mai ita atu fiél nafatin no komete ita-nia moris tomak ba Jesus.
Cek kondisaun ita-nia fiar, sei ajuda ita atu espiritualmente matan-moris nafatin iha lia-loos. Kuandu ita ezamina ho onestu ita-nia laran, simu Kristu nia korrije, no renova ita-nia komitmentu ba Jesus, ita sei krexe espiritualmente iha ita-nia relasaun ho Maromak no kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
