Mensajen hosi Jesus ba igreja Laodiseia

Hau hatene buat neʼebé imi halo, katak imi la malirin ka manas. Hau hakarak katak imi malirin ka manas. Maibé imi morna de'it, la'os manas ka malirin. Nune'e Ha'u sei muta sai imi hosi Ha'u-nia ibun. Apokalipse 3:15-16 BK

                             Apokalipse 3:16

Mensajen ne'e mós ko'alia ba igreja modernu ohin loron. Jesus hasé ema fiar-na'in sira iha ne'ebá tanba sira morna (la manas maibé mós la malirin) - ne'ebé signifika la kompletamente komete ka dedika sira-nia moris ba Kristu. Sira fiar katak, espiritualmente sira riku no forte iha lia-loos, maibé iha realidade sira fraku no la iha diferente ho ema mundu nian.

Mensajen ne'e mós ko'alia ba ema kristaun ohin loron. Ema kristaun barak ba igreja, lee Biblia, no halo orasaun, maibé sira-nia laran la dedika ba Maromak kompletamente. Sira-nia fiar sai komfortu no sai hanesan atividade rutina de'it, la'os halo ho kompaixaun. Iha tempu uluk liu, profeta Isaias fó avizu ne'ebé hanesan bainhira nia esplika kona-ba sidade ida-ne'ebé fiél ne'ebé ikus mai sai la fiél ba Maromak (Isaias 1:21). 

Maromak Nia resposta ba problema ne'e mak arrependementu. Liuhusi profeta Isaias, Maromak bolu Ninia povu atu fase sira-nia an, hapara halo buat-aat, no aprende atu halo buat ne'ebé di'ak (Isaias 1: 16-20). Hanesan ne'e mós, Jesus no Ninia apóstolu sira bolu ema atu arrepende an no fila fali ba Maromak (Mateus 3: 2; Mateus 4:17). Arrependementu ne'ebé loos, hamosu mudansa iha ita-nia moris, hanesan ai-fuan di'ak ne'ebé mai husi ai-huun ne'ebé di'ak (Mateus 3: 8-10; Mateus 12:33-37). 

Depoisde Jesus fila fali ba lalehan, apóstolu sira kontinua fó sai liafuan ne'e. Apóstolu Pedro hatete ba povu atu arrepende sira-nia sala no hetan batizmu (Apos 2: 38), no depoisde ida ne'e, nia bolu sira atu arrepende sira-nia sala no fila fali ba Maromak atu nune'e sira bele hetan perdua (Apos 3:19). Apóstolu Paulo mós hanorin katak Maromak haruka ema hotu atu arrepende an iha fatin hotu (Apos 17:30). Arrependementu ne'ebé loos, halo ita sente triste tamba ita-nia sala, ne'ebé lori salvasaun no transformasaun ba ita-nia moris (2 Korinto 7: 9-10). 

Bíblia bolu Maromak Nia povu atu hadeer no sai nabilan ho Ninia naroman iha mundu nakukun (Isaias 60: 1-3). Antes Kristu fila fali mai, Maromak Nia glória sei nabilan liuhusi Ninia povu ne'ebé fiél, no ema barak sei hetan konvite atu husik Babilonia espirituál no halo tuir lia-loos (Apokalipse 18: 1-4). 

Ikusmai, Kristu sei prepara igreja ida-ne'ebé moos no fiél no hatais ho roupa lia-loos loos nian (Apokalipse 19: 7-8). Ida-ne'e fó-hanoin ita katak Maromak lakohi ema fiar-na'in ne'ebé morna. Maromak bolu ita atu iha fiar, arrepende an no obedese ba Ninia hanorin sira. 

Hanesan mós karta ne'ebé haruka ba ema Laodiseia tenke fahe ba igreja sira (Koloso 4:16-18), mensajen ne'e mós fahe ba ita ohin loron no atu fahe tutan ba ema barakliután. Se ita rona Ninia lian no hatudu katak ita arrepende ho loos no fiél, ita sei prontu hamriik hamutuk ho Kristu no kontinua la'o ho laran-metin iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏