Ema hotu sei odi imi tanba haʼu-nia naran

Ema hotu sei odi imi tanba haʼu-nia naran.  Maibé ema neʼebé tahan toʼo rohan  mak sei hetan salvasaun. Marco 13:13

João 15:18–25 ko'alia kona-ba parte dahuluk versu ida ne'e.  Ha'u nia naran (Na'i Jesus Nia naran) signifika ita reprezenta Nia reputasaun, autoridade no identidade. Se karik ita hanesan sidadaun Reiñu Lalehan nian, naturalmente sira ne'ebé lakoi tuir Maromak (lakoi halo tuir Maromak Nia futarlia) sei halo sira nia an sai ita nia inimigu.

Ema sira ne'ebé rejeita Na'i Jesus, rejeita Na'i Maromak.  Lalika ta'uk karik ema rejeita Maromak Nia futarlia, ita tenke banati tuir Apostolu sira ne'ebé kumpri Maromak mesmu ema baku sira no sira sente hanesan onra ida, terus tanba Na'i Jesus Nia naran  (Apostolu/Atos 5:17–42).

Mundu naturalmente hafahe an ba grupu fiar nian ne'ebé hanesan. Ema Kristaun balu, iha idea ida katak, bainhira sira simu Kristu iha sira nia moris, sira sei libre hosi problema hotu. Marco 13:13 hatete kontrariu hó idea ne'e. Na'i Jesus fó atensaun katak fiar na'in sira sei hasoru susar ka presegisaun barak   (Mateus 5:10–12, 44; 10:23). Na'i Jesus hatudu katak  "Atan ida la boot liu fali ninia naʼi. Se sira fó-terus haʼu, sira mós sei fó-terus imi. Se sira halo tuir haʼu-nia liafuan, sira mós sei halo tuir imi-nia liafuan (João 15:20). Paulo hatete "
Tuir loloos, ema hotu neʼebé hakarak atu moris tuir Na'i Maromak iha Kristu Jesus sei hetan presegisaun (2 Timoteo 3:12).

Parte ikus hosi Marco 13:13 halo ema balu kestiona kona-ba relasaun entre salvasaun no fé. Seráke ita tenke tahan to'o rohan atu hetan salvasaun?  Loos. Ita sei hatene se mak hetan salvasaun tanba sira tahan hasoru susar oinoin  (Roma 8:29–30; 1 João 2:19). La iha buat ida ne'ebé ita hasoru mak sei bele separa ita hosi Maromak Nia domin  (Roma 8:38–39).

Terus no susar ne'ebé ita hasoru ne'e temporariu, tanba ita moris iha mundu ne'e mós temporariu. Mai husu Na'i Maromak atu horik hó ita no suporta ita hotu, atu bele mantein ita nia fé to'o rohan.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Marco 13:13