March 2026 ~ Dalan ba Lalehan

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 30, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Cek ita-nia kondisaun fé nian

Ba anju hosi igreja iha Laodiseia hakerek: ‘Liafuan hosi Nia ne'ebé Amén, sasin ne'ebé fiel no loos, ne'ebé huun ba Maromak Nia kriasaun. Ha'u hatene buat ne'ebé imi halo, katak imi la malirin ka manas. Ha'u hakarak katak imi malirin ka manas. Maibé imi morna deit, laos manas ka malirin. Nune'e Ha'u sei muta sai imi hosi Ha'u-nia ibun. Tanba imi dehan, “Ha'u riku ona. Ha'u halibur ona riku-soin barak. Ha'u la presiza buat ida.” Maibé imi la hatene katak imi iha terus, laran susar, moris kiak, matan delek no isin molik. Apokalipse 3:14-17 BK

Apokalipse 3:15

Mensajen ba igreja iha Laodiseia mak konvite sériu ba ema kristaun atu ezamina didi'ak sira-nia kondisaun espirituál. Jesus hatete katak ema sira iha ne'ebá fiar katak espiritualmente sira riku no forte iha lia-loos, maibé iha realidade sira kiak, terus no matan-delek. Sira-nia fiar sai ona morna - sira la kompletamente dedika sira-nia moris no sira mós la kompletamente husik hela sira-nia hahalok mundu nian. Avizu ne'e fó-hanoin ita katak ita presiza regularmente ezamina kondisaun ita-nia fé.

Dala ruma ema kristaun sira hanoin katak sira nia kondisaun fiar nian di'ak hela simplesmente tamba de'it sira ba igreja, hatene Biblia, ka hetan bénsaun barak. Maibé susesu ne'ebé ema haree iha li'ur la signifika katak sira-nia kondisaun espirituál mós di'ak. Maromak haree ita-nia laran, no Nia hatene serake ita-nia domin ba nia ne'e reál no ativu.

Jesus la fó de'it mensajen ne'e atu kondena igreja, maibé atu ajuda sira muda sira-nia hahalok. Ho domin, Nia konvida sira atu simu rikusoin espirituál ne'ebé loos. Nia haruka sira atu sosa osan-mean ne'ebé purifika iha ahi laran atu nune'e sira bele sai riku ne'ebé loos, haruka sira hatais mutin atu taka sira-nia moe, no kose sira-nia matan ho salep matan nian atu nune'e sira bele haree ho klaru (Apokalipse 3:18). Símbolu sira-ne'e reprezenta fiar, hahalok loos, no komprensaun espirituál ne'ebé mai husi Kristu.

Maromak mós fó-hanoin sira katak Ninia hasé ne'e hanesan aktu domin nian. Nia hatete: "Hau koriji no fo disiplina ba sira nebee Ha'u hadomi" Apokalipse 3:19. Fiar ne'ebé loos presiza haraik-an no prontu atu fila fali ba Maromak kuandu ita hatene ita-nia frakeza sira.

Kristu mós fó konvite furak ida: Nia hamriik iha odamatan no dere no hein ema fiar-na'in sira atu loke sira-nia laran ba Nia (Apokalipse 3: 20). Bainhira ita hatán, Nia promete atu hamutuk ho ita no renova ita-nia relasaun ne'ebé di'ak liután.

Ikusmai, Jesus promete katak Nia sei fó rekompensa boot ba sira ne'ebé manán tentasaun. Sira sei tuur hamutuk ho Nia iha Ninia kadunan, hodi goza Ninia vitória (Apokalipse 3:21). Promesa ne'e fó korajen mai ita atu fiél nafatin no komete ita-nia moris tomak ba Jesus.

Cek kondisaun ita-nia fiar, sei ajuda ita atu espiritualmente matan-moris nafatin iha lia-loos. Kuandu ita ezamina ho onestu ita-nia laran, simu Kristu nia korrije, no renova ita-nia komitmentu ba Jesus, ita sei krexe espiritualmente iha ita-nia relasaun ho Maromak no kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 29, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Cek ita-nia realidade fiar nian

Hanesan Aman hadomi Ha'u, nune'e mós Ha'u hadomi imi. Hela nafatin iha Ha'u nia domin. João 15:9 BK

João 15:9

Jesus fó-hanoin Ninia dixipulu sira kona-ba lia-loos ne'ebé poderozu: Jesus hadomi tebes sira. Domin ne'ebé Aman Maromak fo ba Oan, Oan-Mane fo tutan ba fiar-na'in sira. Tan ne'e, Jesus mós bolu ita atu nafatin hela iha domin ne'e (João 15:9). Ida-ne'e hanesan cek realidade ba ema kristaun hotu - serake ita moris duni iha Kristu Nia domin, ka ita dook ona husi Nia?

Husi tempu uluk kedas, Maromak kria ema atu moris iha relasaun besik ho Nia. Maromak forma ema husi rai-rahun no huu iis moris ba sira (Genesis 2: 7). Iha jardín Eden, Maromak la'o hamutuk ho Adão no Eva, maibé kuandu sala tama ba mundu, sira subar husi Ninia prezensa tanba ta'uk (Genesis 3: 8-10). Sala harahun ita-nia relasaun di'ak ne'ebé Maromak intende ba ita.

Maibé Maromak la husik Ninia povu. Nia hatete: "Hau hadomi ona ó ho domin rohan-laek" no promete katak sei restaura fali sira (Jeremias 31:3-4). Domin ne'e revela liuhusi Jesus Kristu.

Iha João 15: 1-11, Jesus esplika Ninia an nu'udar uvas-hun ne'ebé loos no Ninia dixipulu sira nu'udar ramu. Hanesan ramu tenke mantein ligadu ho uvas hun atu fo fuan, nune'e mós, ema kristaun tenke mantein ligadu ho Kristu atu bele moris espiritualmente.

Maibé, mensajen Jesus nian ba igreja iha Laodiseia hatudu katak ema fiar-na'in bele lakon ligasaun ne'e. Ema fiar na'in sira iha Laodiseia hanoin katak sira riku no sira sufisiente iha buat hotu, maibé realidade sira kiak no morna espiritualmente (Apokalipse 3:14-22). Kristu bolu sira atu loke sira-nia laran no fila fali ba Nia.

Iha lalehan, kriatura no ansiaun sira kontinua adora Maromak tanba Nia kria buat hotu no merese hetan glória (Apokalipse 4: 9-11). Ida-ne'e fó-hanoin ita kona-ba ita-nia ojetivu ne'ebé loos - atu moris ba Maromak no fó onra ba Nia.

Maromak Nia Espíritu mós ajuda ema kristaun atu moris iha Kristu. Se Espíritu Santu hela iha ita, kbiit ne'ebé halo Jesus moris hi'as husi mate mós sei fó moris ba ita (Roma 8: 9-11). Liuhusi Espíritu Santu, ita bele nafatin iha relasaun di'ak ho Kristu no kontinua krexe iha Ninia domin.

Devosaun ida ne'e bolu ita atu ho onestu ezamina ita-nia moris espirituál. Serake ita hela duni iha Kristu, ka ita-nia fé espiritualmente morna hela? Kuandu ita nafatin hela iha Ninia domin no iha ligasaun ho Nia, ita-nia moris sei fo fuan barak no ita-nia moris sei iha folin liután.

Bainhira ita fila fali ba Kristu loroloron no kontinua nafatin hela iha Ninia domin, ita kontinua la'o ho laran-metin iha Dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 28, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Mensajen hosi Jesus ba igreja Laodiseia

Hau hatene buat neʼebé imi halo, katak imi la malirin ka manas. Hau hakarak katak imi malirin ka manas. Maibé imi morna de'it, la'os manas ka malirin. Nune'e Ha'u sei muta sai imi hosi Ha'u-nia ibun. Apokalipse 3:15-16 BK

Apokalipse 3:16

Mensajen ne'e mós ko'alia ba igreja modernu ohin loron. Jesus hasé ema fiar-na'in sira iha ne'ebá tanba sira morna (la manas maibé mós la malirin) - ne'ebé signifika la kompletamente komete ka dedika sira-nia moris ba Kristu. Sira fiar katak, espiritualmente sira riku no forte iha lia-loos, maibé iha realidade sira fraku no la iha diferente ho ema mundu nian.

Mensajen ne'e mós ko'alia ba ema kristaun ohin loron. Ema kristaun barak ba igreja, lee Biblia, no halo orasaun, maibé sira-nia laran la dedika ba Maromak kompletamente. Sira-nia fiar sai komfortu no sai hanesan atividade rutina de'it, la'os halo ho kompaixaun. Iha tempu uluk liu, profeta Isaias fó avizu ne'ebé hanesan bainhira nia esplika kona-ba sidade ida-ne'ebé fiél ne'ebé ikus mai sai la fiél ba Maromak (Isaias 1:21).

Maromak Nia resposta ba problema ne'e mak arrependementu. Liuhusi profeta Isaias, Maromak bolu Ninia povu atu fase sira-nia an, hapara halo buat-aat, no aprende atu halo buat ne'ebé di'ak (Isaias 1: 16-20). Hanesan ne'e mós, Jesus no Ninia apóstolu sira bolu ema atu arrepende an no fila fali ba Maromak (Mateus 3: 2; Mateus 4:17). Arrependementu ne'ebé loos, hamosu mudansa iha ita-nia moris, hanesan ai-fuan di'ak ne'ebé mai husi ai-huun ne'ebé di'ak (Mateus 3: 8-10; Mateus 12:33-37).

Depoisde Jesus fila fali ba lalehan, apóstolu sira kontinua fó sai liafuan ne'e. Apóstolu Pedro hatete ba povu atu arrepende sira-nia sala no hetan batizmu (Apos 2: 38), no depoisde ida ne'e, nia bolu sira atu arrepende sira-nia sala no fila fali ba Maromak atu nune'e sira bele hetan perdua (Apos 3:19). Apóstolu Paulo mós hanorin katak Maromak haruka ema hotu atu arrepende an iha fatin hotu (Apos 17:30). Arrependementu ne'ebé loos, halo ita sente triste tamba ita-nia sala, ne'ebé lori salvasaun no transformasaun ba ita-nia moris (2 Korinto 7: 9-10).

Bíblia bolu Maromak Nia povu atu hadeer no sai nabilan ho Ninia naroman iha mundu nakukun (Isaias 60: 1-3). Antes Kristu fila fali mai, Maromak Nia glória sei nabilan liuhusi Ninia povu ne'ebé fiél, no ema barak sei hetan konvite atu husik Babilonia espirituál no halo tuir lia-loos (Apokalipse 18: 1-4).

Ikusmai, Kristu sei prepara igreja ida-ne'ebé moos no fiél no hatais ho roupa lia-loos loos nian (Apokalipse 19: 7-8). Ida-ne'e fó-hanoin ita katak Maromak lakohi ema fiar-na'in ne'ebé morna. Maromak bolu ita atu iha fiar, arrepende an no obedese ba Ninia hanorin sira.

Hanesan mós karta ne'ebé haruka ba ema Laodiseia tenke fahe ba igreja sira (Koloso 4:16-18), mensajen ne'e mós fahe ba ita ohin loron no atu fahe tutan ba ema barakliután. Se ita rona Ninia lian no hatudu katak ita arrepende ho loos no fiél, ita sei prontu hamriik hamutuk ho Kristu no kontinua la'o ho laran-metin iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 27, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Moris iha mundu maibé la'ós hosi mundu

.... Sira laos hosi mundu, hanesan Hau mos la'os hosi mundu. João 17:16 BK

João 17:16

Jesus halo orasaun ba Ninia dixipulu sira no dehan katak sira la'ós husi mundu, hanesan Nia la'ós husi mundu (João 17:16). Ida-ne'e katak maski ema kristaun sira moris iha mundu, maibé sira-nia valór, esperansa, no prioridade mai husi Maromak nia reiñu, la'ós husi mundu.

Iha igreja uluk liu, ema fiar-na'in sira serbisu hamutuk bainhira sira moris iha mundu ne'ebé la sempre tuir Maromak Nia hanorin. Paulo temi kona-ba serbisu-nain sira hanesan Epafras, Lucas, Aristarkus no sira seluk ne'ebé serbí iha igreja no tau matan didi'ak ba fiar-na'in sira (Koloso 4:10-14). Ema sira ne'e hela iha mundu maibé dedika sira-nia moris ba Maromak Nia misaun.

Bíblia fó avizu mai ita atu labele hadomi mundu ka buat ne'ebé iha mundu ne'e (1 João 2:15). Kuandu ita-nia laran belit ba hakarak sira iha mundu ne'e, ita komesa la'o dook husi Maromak. Duke halo nune'e, ema kristaun tenke moris diferente, ne'e mak moris tuir Maromak Nia lia-loos.

João 17:16

Jesus mós hanorin Ninia dixipulu sira atu matan-moris nafatin. La iha ema ida mak hatene loron ka oras ne'ebé Jesus sei fila fali mai, tan ne'e ema fiar-na'in sira tenke prontu nafatin (Marco 13: 32-37). Ida-ne'e presiza korajen atu halo orasaun, tanba tentasaun sempre mosu (Marco 14:38).

Maromak Nia grasa hanorin ita atu rejeita buat ne'ebé la tuir Maromak Nia Liafuan no buat ne'ebé mundu nian, no kontrola ita-nia moris tuir Maromak Nia hanorin sira hodi hein Kristu ne'ebé sei fila fali mai (Tito 2: 11-14). Bíblia fó-hanoin ita katak mundu no buat hotu iha mundu ne'e sei lakon bainhira Nai Jesus mai fali ba dala rua (2 Pedro 3: 10-14).

Igreja iha Laodiseia hetan avizu atu labele sai ema ne'ebé morna (la manas maibé mós la malirin) ba Maromak ka sente orgullu tanba hetan susesu iha mundu ne'e (Apokalipse 3:15-21). Ema kristaun tenke haraik-an nafatin, fiél nafatin, no iha komitmentu atu halo tuir Kristu Nia hanorin sira.

Moris iha mundu ne'e maibé la'ós hosi mundu signifika kuida ita-nia laran atu fiél nafatin ba Maromak, matan moris hasoru tentasaun sira, no moris tuir Maromak Nia lia-loos hotu. Kuandu ita halo ida-ne'e, ita-nia moris sai nu'udar sasin ba ema seluk, no ita kontinua la'o ho laran-metin iha dalan ba lalehan.

João 17:16

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 26, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Hamriik perfeitu no kompletu iha Nai

Epafras, nebee hosi imi nia leet no Kristu nia atan ida, foo kumprimentus ba imi. Nia sempre badinas atu halo orasaun ba Maromak kona ba imi, atu imi bele hamriik perfeitu no kompletu tuir Maromak nia hakarak hotu. Tanba hau foo sasin kona ba nia, katak nia iha hanoin makaas kona ba imi, no ba sira nebee iha Laodiseia no iha Hierápolis. Kolose 4:12-13 BK

Kolose 4:12

Moris kristaun la'ós de'it kona-ba hahú ita-nia fiar, maibé atu ita-nia fiar sai forte no maduru. Bíblia hatete katak Epafras mak Kristu nia atan ne'ebé fiél no halo orasaun maka'as ba ema fiar-na'in sira. Nia hakarak sira hamriik perfeitu no kompletu (Koloso 4: 12-13). Ida-ne'e katak ita bele sai maduru espiritualmente no firmi iha ita-nia fiar.

Bíblia hanorin katak ema fiar-na'in sira tenke kontinua tau fiar ba Maromak, tau matan ba sira-nia fiar, no labele husik hela Evanjellu nia esperansa (Koloso 1:23). Kreximentu espirituál presiza komitmentu no perseveransa.

Orasaun iha papél importante tebes iha kresimentu ne'e. Apóstolu Paulo mós halo orasaun atu ema fiar-na'in sira bele hetan koñesimentu kona-ba Maromak nia hakarak, la'o tuir Nai nia hakarak, no sai forsa tamba Nai nia kbiit (Koloso 1: 9-11). Liuhusi orasaun, Maromak ajuda ita atu krexe iha fiar no obedese ba Ninia hanorin sira.

Moris kristaun mós hanesan funu espirituál ida. Bíblia hatete katak ita tenke forsa iha Nai no tau Maromak nia armamentu tomak atu nune'e ita bele hamriik metin hasoru buat-aat hotu (Efeso 6:10-18). Maromak hatene sira ne'ebé Ninian, no Maromak bolu Ninia povu atu hasees an husi hahalok-aat (2 Timoteo 2:19).

Jesus mós bolu ninia dixipulu sira atu krexe iha domin no karakter. Maromak mós haruka ita tenke hadomi ita-nia inimigu sira no sai perfeitu hanesan ita-nia Aman iha lalehan mak perfeitu (Mateu 5:44, 48). Maturidade hanesan ne'e mai pasu pur pasu. Apóstolu Paulo rasik hatete katak nia rasik seidauk sai perfeitu, maibé nia kontinua luta atu atinji ojetivu ida ne'e (Filipe 3:12-15).

Ita la krexe ho ita-nia forsa rasik. Maromak suporta no hametin ninia atan sira, hanesan Nia hamriik hamutuk ho apóstolu Paulo no fó forsa ba nia atu kontinua ninia misaun (2 Timoteo 4:17).

Hmariik perfeitu no kompletu signifika mantein fiél, krexe iha domin, no tau fiar ba Maromak nia forsa loroloron. Bainhira ita kontinua krexe ita-nia fiar iha Kristu no firmi iha ita-nia fiar, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 25, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Konetividade iha igreja

Aristarco ha'u-nia maluk dadur fó kumprimentus ba imi, no Marcos, Barnabé nia primu (imi simu ona liafuan kona ba nia - se karik nia ba to'o imi, simu nia ho di'ak), No mós Jesus, nebee ema bolu Justo. Ema sira ne'e de'it mak hosi grupu sirkunsizaun. Sira mak ha'u-nia maluk servisu na'in sira ba Maromak Nia reinu, no sira fó kamaan mai ha'u. Kolose 4:10-11 BK

Kolose 4:10-11

Maromak nia igreja la'ós atu sai ema izoladu ida. Bíblia hatudu katak igreja iha ligasaun di'ak ba malu hanesan família, iha ne'ebá ema fiar-na'in sira apoia no fó korajen ba malu iha serbisu evanjellu nian.

Iha apóstolu Paulo nia karta, nia komprementa ema fiar-na'in sira husi serbisu-nain ba Evanjellu balu ne'ebé hamutuk ho nia. Aristarkus, Marcos, no Jesus bolu Justus nu'udar maluk serbisu-nain ne'ebé ajuda no fo komfortu ba apóstolu Paulo durante ninia tempu susar sira (Koloso 4:10-11). Serbisu na'in ba Evanjellu sira-ne'e iha relasaun ba malu iha fé no serbisu haklaken nian.

Iha kapítulu hanesan iha versikulu anterior, apóstolu Paulo mós ko'alia kona-ba Tikiku no Onesimo, ne'ebé lori mensajen no hametin igreja sira (Koloso 4: 7-9). Liuhusi sira, ema fiar-na'in sira iha fatin oioin nafatin informadu no hetan korajen. Ida-ne'e hatudu katak komunikasaun no kooperasaun importante tebes iha igreja iha tempu uluk.

Maski nune'e, ligreja nia relasaun la sempre fasil. Iha tempu ne'ebá, Marcos husik hela Paulo no Barnabe durante sira-nia viajen misionáriu (Apos 13: 13). Ikusmai, ida-ne'e hamosu problema entre Paulo no Barnabe (Apos 15:36-40). Maibé istória ne'e mós hanorin katak Maromak bele serbisu liuhosi ema sira ne'ebé la perfeitu no restaura fali sira-nia relasaun ba ninia serbisu misaun nian.

Bíblia mós fó-hanoin ema kristaun atu hamriik metin iha Nai no hamriik hamutuk hasoru dezafiu espirituál sira (Efeso 6: 10-11). Hanesan mós ho soldadu sira ne'ebé iha tropa laran, ema kristaun tenke serbisu hamutuk atu halo Maromak Nia misaun (2 Timoteo 2: 1-4).

Apóstolu Paulo nia ministeriu haklaken nian inklui misionáriu sira ne'ebé fiél hanesan Epafras, Lucas, no Demas, ne'ebé apoia haklaken Evanjellu (Koloso 4: 12-14). Ligasaun sira-ne'e ajuda igreja krexe liután.

Igreja nia konektividade katak fahe misaun ne'ebé hanesan, apoia malu, no serbisu hamutuk ba Maromak nia reiñu. Kuandu ema fiar-na'in sira nafatin iha unidade ho sira-nia fiar no serbí Maromak, igreja sai forte liután no bele ajuda sira atu haklaken Maromak nia mensajen ho efetivu.

Bainhira ita nafatin iha ligasaun di'ak ba malu iha fiar no iha serbisu, ita kontinua la'o hamutuk iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 24, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Lisaun kona-ba haklaken evanjellu

Tíkiko sei fó hatene ba imi kona-ba ha'u-nia atividade hotu. Nia mak alin doben ida ne'ebé ajuda ho fidelidade nu'udar maluk atan iha Nai. Ha'u haruka nia ba imi tanba razaun ne'e, katak imi bele hatene ami-nia situasaun no nia bele fó korajen ba imi-nia fuan laran. Nia ba hamutuk ho Onésimo, ami-nia alin doben ne'ebé fiél. Nia mak hosi imi-nia leet. Sira sei fó hatene ba imi kona ba buat hotu ne'ebé akontese iha ne'e. Kolose 4:7-9 BK

Kolose 4:7

Alkansa ka halakon evanjellu ne'e importante tebes iha ema Kristaun nia moris. Maromak bolu Ninia povu la'ós de'it atu fiar ba Evanjellu, maibé mós atu fahe ba ema seluk. Iha Biblia, ita bele aprende lisaun importante kona-ba haklaken husi ema kristaun sira ne'ebé serbisu hamutuk ho apóstolu Paulo.

Apóstolu Paulo ko'alia kona-ba serbisu-nain ida naran Tíkiko. Nia bolu nia nu'udar irmaun doben ida, nu'udar atan ne'ebé fiél, no nu'udar atan ida iha Nai (Koloso 4: 7). Tíkiko hetan fiar atu lori mensajen no fó korajen ba ema fiar-na'in sira iha igreja oinoin. Apóstolu Paulo mós haruka nia atu ajuda esplika ba membru igreja sira atu komprende kona-ba nia situasaun no hametin sira-nia laran (Efeso 6:21).

Ema fiar-na'in seluk ida ne'ebé temi iha eskritura ne'e mak Onesimus, ne'ebé halo viajen hamutuk ho Tíkiko (Koloso 4:9). Uluk nia mak atan ida-ne'ebé halai tiha ona hosi nia patraun, maibé liuhusi Kristu nia moris transforma ona. Onesimus agora ema bolu nia nu'udar keridu irmaun ida-ne'ebé fiél. Ida-ne'e hatudu katak haklaken evanjellu ba ema seluk bele transforma moris. Kuandu ema simu mensajen Evanjellu, sira bele sai serbisu-nain ne'ebé forte ba Maromak.

Bíblia mós hatudu katak haklaken ne'e bele alkansa liuhusi serbisu ekipa. Ema kristaun barak mak ajuda apóstolu Paulo nia serbisu misionáriu. Porezemplu, Tíkiko mak ema ida entre sira ne'ebé viajen ho apóstolu Paulo iha ninia serbisu haklaken nian (Apos 20: 4). Liutiha tempu balu, apóstolu Paulo haruka nia serbí no ajuda igreja sira iha fatin seluk (2 Timoteo 4:12; Tito 3:12). Ezemplu sira-ne'e hatudu katak Maromak Nia serbisu hala'o liuhusi Maromak Nia atan sira-ne'ebe fiél ne'ebé prontu atu serbí.

Husi istória sira-ne'e ita aprende lisaun balu. Haklaken presiza hatudu fidelidade, koperasaun, no vontade atu ba fatin ne'ebé de'it Maromak haruka ba. Ida-ne'e mós fó-hanoin ita katak ema hotu ne'ebé hetan transformasaun iha sira-nia moris bele sai sasin ba Maromak.

Ohin loron Maromak sei bolu Ninia povu atu fahe Ninia mensajen. Liuhusi liafuan, hahalok, ka korajen, ita bele ajuda ema seluk hatene kona-ba Kristu Nia domin. Kuandu ita ho fiél hola parte iha Maromak Nia misaun, ita kontinua la'o hamutuk iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 23, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Hamriik iha Maromak nia hakarak tomak

Fó agradese iha situasaun saida de'it. Tanba ne'e mak Maromak nia hakarak iha Kristu Jesus kona ba imi. 1 Tesalónika 5:18 BK

1 Tesalónika 5:18 BK

Bíblia hanorin katak parte ida husi Maromak Nia hakarak mak agradese. Iha situasaun hotu-hotu, di'ak ka aat, ita hetan konvite atu fó obrigadu ba Maromak. Agradese ba Maromak hatudu katak ita tau fiar ba Nia no fiar katak Nia serbisu hela iha ita-nia moris.

Igreja iha inisiu iha tempu uluk fó ezemplu barak kona-ba ema ne'ebé serbí Maromak ho fiél. Iha Paulo nia karta, nia ko'alia kona-ba ajuda-na'in balu hanesan Tikiku, Onesimu, Aristarku, Marcos, Epafras, Lucas no Demas (Koloso 4:7-18; Efeso 6:21). Ema kristaun sira-ne'e serbisu hamutuk atu habelar evanjellu no apoia igreja. Sira-nia moris fó-hanoin ita katak hamriik iha Maromak Nia hakarak tomak, dala barak halo liuhusi serbí ema seluk.

Maski nune'e, Maromak Nia serbisu-nain mós dalaruma la konkorda ba malu. Apóstolu Paulo no Barnabe uluk la konkorda kona-ba João Marcos, no sira fahe malu (Apos 15:36-40). Liutiha tempu balu, apóstolu Paulo hakerek katak Demas husik ona nia tanba nia hadomi liu mundu, no Lucas nafatin fiél, no Marcos mós ajuda nia iha serbisu haklaken (2 Timoteo 4:10-11). Ezemplu sira-ne'e hatudu katak ema ida-idak tenke hili serake sira hakarak fiél nafatin ba Maromak nia hakarak ka lae!

Bíblia mós fó-hanoin ita katak mundu ne'e sei la iha ba nafatin. Loron ida mundu ne'e sei lakon, no buat hotu ne'ebé iha ne'e atu di'ak ka aat sei hatudu sai hotu (2 Pedro 3:10-14). Tan ne'e, ita tenke moris santu no moris tuir Maromak Nia hakarak, atu ita prontu nafatin hodi hein Jesus Nia mai ba daruak ne'ebé bele akontese kualkér tempu.

Maromak bolu Ninia povu atu hamriik no sai naroman hodi nune'e ema bele haree Ninia glória iha sira-nia leet (Izaias 60: 1-3). Kuandu ita moris ho laran-di'ak no laran-metin ba Maromak, ita-nia moris sei sai naroman ne'ebé lori ema seluk ba Maromak.

Hamriik iha Maromak Nia hakarak hotu katak tau fiar ba Nia, fó agradese iha situasaun hotu, no serbí Nia ho laran-metin to'o rohan. Bainhira ita moris ho agradese no obedese ba Ninia hanorin sira, ita kontinua la'o loroloron iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 22, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Renova koñesimentu kona-ba Maromak

Tanba buat sira ne'e hotu mak Maromak nia laran nakali sei mai. Uluk imi la'o tuir buat sira ne'e bainhira imi moris hanesan ne'e. Maibé agora imi tenki hasai tiha buat hotu ne'e: laran hirus, laran nakali, hahalok aat, koalia aat no keta husik liafuan fo'er sai hosi imi-nia ibun. Keta bosok malu tanba imi hasai tiha imi-nia aan tuan hamutuk ho hahalok sira ne'e, no imi hatais ona imi-nia aan foun, nebee sai foun fali iha matenek tuir Ninia Kriadór Nia ilas. Agora la iha ema Gregu ka ema Judeu, ema ne'ebé hetan sirkunsizaun ka la hetan sirkunsizaun, ema ho lian seluk, atan ka ema livre; maibé Kristu mak hotu no iha hotu. Kolose 3:6-11 BK

Kolose 3:8

Bíblia hanorin katak moris kristaun mak kona-ba mudansa ida. Maromak bolu ita atu husik ita-nia "hahalok aat" no tau moris foun iha Kristu (Koloso 3: 9-10). Mudansa ne'e la'ós de'it iha li'ur, maibé hahú iha laran no iha neon.

Ita-nia hahalok tuan neʼe iha ligasaun ho pekadu. Bíblia hatete katak ita-nia hahalok uluk nian krúsifika hamutuk ho Kristu atu nune'e ita labele sai tan atan ba sala (Roma 6: 6). Tan ne'e, ita tenke hasai tiha hahalok sala nian hanesan hirus, bosok, no odi (Koloso 3: 8-9; Levitico 19: 11, 18).

Porezemplu, ita presiza kontrola ita-nia hirus. Bíblia hanorin ita atu rona lalais, ko'alia neneik, no labele sai hirus lalais, tanba ema nia hirus la hamosu Maromak nia hahalok loos (Tiago 1: 19-20). Jesus rasik mós hatudu katak, hirus tenke gia hosi lia loos, hirus so tamba kontra hahalok neʼebé la loos. (Mark 3:5).

Maromak bolu ita atu hasai ita-nia pekadu hanesan hasai ropa fo'er. Eskritura hatete katak Maromak hasai tiha ita-nia roupa fo'er no hatais ita ho roupa ne'ebé moos (Zacarias 3: 4). Ida-ne'e hatudu katak Maromak halo transformasaun iha ita-nia moris.

Transformasaun ne'e akontese liuhusi koñesimentu kona-ba Maromak no Ninia lia-loos. Bainhira ita haree Nia, ita transforma ba Ninia ilas husi glória ba glória (2 Korinto 3: 18). Kuandu ita aprende liután kona-ba Maromak, ita sei sai hanesan Nia.

Biblia mós haruka ita atu halakon ita-nia dalan moris uluk nian, hodi hetan moris foun iha ita-nia atitude, ita-nia neon iha lia-loos no moris santu (Efeso 4:22-24).

Iha moris foun ida-ne'e, la iha divizaun, la iha bareira tamba rasa, status sosiál, ka background tanba Kristu mak buat hotu no iha buat hotu (Koloso 3: 11).

Transformasaun ida-ne'e ajuda ita prepara an ba julgamentu ne'ebé sei mai, bainhira ema ne'ebé rejeita Maromak sei koko atu subar an husi Maromak nia prezensa (Apokalipse 6: 16). Maibé sira ne'ebé hetan renovasaun iha Kristu bele hamriik metin nafatin ko konfiansa.

Bainhira ita kontinua krexe iha koñesimentu kona-ba Maromak no husik nia transforma ita-nia moris, ita sei la'o ho laran-metin loroloron iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

Youtube: Hope Channel Timor Leste

#hopechanneltimorleste #AWRTimoLeste

Acacio Cardoso AmaralMarch 21, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Hakotu hahalok mundu nian

Oho de'it imi-nia parte ne'ebé mai hosi mundu: sala seksuál, hahalok la moos, hakarak ne'ebé la loos, kaan buat aat, no kaan sasaan, mak hanesan adora ídulu. Tanba buat sira ne'e hotu mak halo Maromak Nia laran nakali sei mai. Kolose 3:5-6

Kolose 3:5

Bíblia bolu ema kristaun atu hakotu sira-nia hahalok tuan nu'udar ema sala-na'in. Apóstolu Paulo hatete katak ita tenke "hamate" buat hotu ne'ebé partensi ba buat mundu nian (Koloso 3:5). Ida-ne'e katak ita tenke hasees an husi hakarak no toman sala-na'in ne'ebé haketak ita husi Maromak.

Tanbasá mak ida-ne'e importante? Tanba pekadu rezulta ba Maromak Nia julgamentu. Bíblia hatete katak Maromak Nia hirus sei mosu hasoru ema hotu ne'ebé hahalok-aat (Roma 1: 18). Kuandu ema kontinua halo sala, Maromak husik sira halo tuir sira-nia hakarak sala nian, ne'ebé halo sira sai aat liután (Roma 1:24, 26-27). Ida-ne'e hatudu oinsa Maromak haree sala hanesan buat ne'ebé seriu iha Ninia oin.

Maibé Maromak bolu ema fiar-na'in sira atu labele hela nafatin iha hahalok sala. Bíblia hanorin katak kuandu ita simu Kristu, ita-nia hahalok tuan pekador nian krusifika ona hamutuk ho Kristu atu nune'e ita labele sai tan atan ba sala (Roma 6: 1-7). Ita hetan ona moris foun, no Maromak bolu ita atu moris diferente ho ema mundu nian.

Tanba moris foun ne'e, ita tenke tau ita-nia laran ba buat sira iha leten, la'ós ba buat sira iha mundu (Koloso 3: 1). Ita labele fokus ba ksolok temporariu sira, maibé kona-ba buat ne'ebé rohan-laek nian, buat lalehan nian.

Bíblia mós fó-hanoin ita katak loron julgamentu nian sei to'o mai (2 Kor 5:10). Ema ne'ebé la simu Maromak Nia hanorin sei koko atu subar an husi Ninia prezensa, maibé sira sei labele halai ses husi Ninia hirus (Apokalipse 6: 16-17). Maromak Nia liafuan ne'e bolu ita atu hasees an husi sala ne'ebé ita halo agora. Agora kedas, la aban, la semana oin, la fulan oin ka tinan oin. Agora kedas!

La fasil atu hapara hahalok mundu nian, maibé ida ne'e nesesariu. Liuhusi Maromak Nia ajuda, ita bele husik hahalok sala-na'in no moris hodi halo Maromak kontente. Bainhira ita hili moris santu no hateke ba lalehan, ita kontinua krexe iha fé no la'o ho laran-metin iha dalan ba lalehan.

Kolose 3:5

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 20, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Hanoin lalehan nian

Se imi moris hias ona hamutuk ho Kristu, buka buat sira nebee iha leten, iha fatin nebee Kristu tuur iha Maromak nia liman loos. Hanoin deit buat nebee iha leten, laos buat nebee iha mundu. Tanba imi mate ona, no imi nia moris subar ona hamutuk ho Kristu iha Maromak. Bainhira Kristu, nebee ita nia moris, mosu mai, entaun imi mos sei mosu mai hamutuk ho Nia iha glória. Kolose 3:1-4 BK

Koloso 3:1

Bíblia bolu ema kristaun sira atu foka sira-nia moris iha lalehan. Tanba ita moris hi'as ona hamutuk ho Kristu liuhusi fé, nune'e ita-nia moris la'ós ona foka tan ba buat mundu ne'e nian (Koloso 3: 1, Koloso 2:12-13). Agora ita mak Maromak nian, no ita-nia hanoin no hakarak sira tenke dirije ba lalehan.

Ita hanoin kona-ba lalehan, la signifika haluha ita-nia responsabilidade loroloron nian. Maibé ne'e signfika ita haree buat hotu husi Maromak Nia perspetiva. Ita hanoin katak mundu ne'e temporariu, maibé Maromak Nia promesa sira sei iha ba nafatin (Koloso 3: 4).

Salmista fó-hanoin ita atu foti ita-nia matan ba Nai, tanba ita-nia ajuda mai husi Nia, Maromak ne'ebé kria lalehan no rai (Salmo 121: 1-2). Kuandu ita fokus ba Maromak, ita bele hetan forsa, matadalan no dame maski iha tempu susar.

Moris iha rai bele iha dezafiu barak tebes. Karik ita sente kole, deskorajen, ka fraku. Maibé Biblia fó korajen mai ita, atu la lakon esperansa, tanba maski ita-nia moris iha li'ur hetan estraga, maibé ita-nia laran hetan renovasaun hosi loron ba loron (2 Korinto 4:16). Maromak serbisu iha ita-nia laran, prepara ita ba moris rohan-laek.

Ema ne'ebé tau nia hanoin iha lalehan, sira moris ho esperansa. Sira la'ós de'it buka susesu , rikusoin, ka ksolok mundu nian. Sira buka buat ne'ebé halo Maromak kontente. Sira investe iha buat ne'ebé iha folin ba eternidade, hanesan fiar, domin, obedese no serbí Maromak.

Bainhira ita-nia laran foka ba lalehan, ita-nia moris komesa muda. Ita-nia prioridade sira sai klaru liután. Ita-nia desizaun sai matenek liután. Ita-nia esperansa sai forte liután.

Bainhira ita fiksa ita-nia laran ba buat sira ne'ebé iha leten no tau fiar ba Maromak loroloron, ita kontinua krexe iha fé no la'o ba oin iha dalan ba lalehan.

Koloso 3:1

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralMarch 19, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Hala'o moris ho matenek

Moris ho matenek kle'an ho sira ne'ebé iha liur, no uza didi'ak tempu ne'ebé sei iha. Sempre ko'alia ho grasa, no tau masin uitoan, atu nune'e imi bele hatene oinsa atu hatán ba ema ida-idak. Kolose 4:5-6 BK

Kolose 4:5

Bíblia hanorin katak ema fiar-na'in sira tenke moris ho matenek, liuliu iha ema ne'ebé seidauk hatene Maromak (Koloso 4:5). Ema seluk haree ita-nia hahalok, no hahalok sira ne'e bele halo ema hakbesik liután ba Maromak ka halo sira dook liután hosi Maromak.

Eskritura alerta katak kuandu Maromak Nia povu moris iha dalan ne'ebé la loos, bele hafo'er Ninia naran iha ema seluk nia leet (Roma 2:24; Isaias, 52:5). Ida-ne'e signifika katak ita-nia hahalok la'ós de'it kona-ba ita-nia an, maibé mós afeta oinsá ema seluk haree Maromak. Kuandu ita moris arbiru de'it, ida-ne'e bele halo ema ko'alia aat kona-ba lia-loos Maromak nian (2 Pedro 2: 2).

Tan ne'e mak importante tebes atu la'o ho sabedoria ka matenek. Sabedoria signifika hili saida mak loos iha Ita-nia asaun, liafuan, no atitude. Ida-ne'e katak ita uza oportunidade hotu atu refleta Maromak Nia karakter iha ita-nia moris loroloron nian (Koloso 4:5).

Ita-nia liafuan mós importante. Bíblia hatete katak ita-nia liafuan sira tenke nakonu ho grasa "tempera ka tau ho masin" (Koloso 4: 6). Ida-ne'e katak ita-nia liafuan sira tenke di'ak, ajuda ema, no nakonu ho valór moris nian. Ita tenke ko'alia iha dalan ne'ebé bele hametin ema seluk no hatudu lia-loos Maromaknian.

Maromak mós bolu ema fiar-na'in sira atu moris ho laran-moos no hatudu respeitu ba Maromak Nia Liafuan atu nune'e ema labele hakribi Ninia Liafuan (Tito 2:5). Moris tuir Maromak Nia hakarak sai sasin ne'ebé forte. Karik ema la sempre rona ba buat ne'ebé ita hatete, maibé sira sei haree oinsá ita hala'o ita-nia moris.

Moris ho matenek katak moris ho kuidadu, ko'alia ho laran-di'ak, no reprezenta Maromak iha buat hotu ne'ebé ita halo. Kuandu ita-nia moris refleta Maromak Nia lia-loos, ita sai naroman ba ema seluk.

Kuandu ita la'o ho matenek loroloron, ita-nia moris sei fó onra ba Maromak no ajuda lori ema seluk atu la'o iha dalan ba lalehan.

Kolose 4:5

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste