Eskritura prinsipál: 1 Korinto 5: 1-13
Ha'u rona katak iha imi nia leet iha ema ne'ebé halo sala seksuál. Hahalok ne'e, ema Jentiu mós la simu, katak mane ida toba ho ninia aman nia feen. 1 Korinto 5:1
Igreja iha Korinto iha problema boot no sériu. Mane ida komete adultériu ho ninia aman nia feen (1 Korinto 5: 1). Ne'e mak pekadu ne'ebé aat tebes. Maski ema ne'ebé la hatene Maromak mós hatene katak ida-ne'e la loos, ida-ne'e pekadu.
Atu halo situasaun aat liután mak igreja iha Korinto la halo buat ida kona-ba ne'e. Duke triste no ajuda mane ne'e arrepende an, sira ignora pekadu ne'e. Membru igreja balu taka matan no finje katak buat hotu-hotu la'o di'ak hanesan baibain. 1 Korinto 5: 2.
Apóstolu Paulo sente laran-susar tebes. Nia hasé igreja katak nunka tolera pekadu ne'ebé ema halo abertamente iha Maromak Nia povu Nia leet. Ninia ojetivu mak la'ós atu fó kastigu ba mane ne'e, maibé atu ajuda nia hatene Ninia sala, arepende no fila fali ba Maromak (1 Korinto 5:5).
Paulo mós fó avizu importante ida. Nia hatete: " Imi kompriende ka lae katak fermentu uitoan halo masa tomak sae? 1 Korinto 5:6. Ho liafuan seluk, nia hakarak hatete katak: se ita simu sala ne'ebé ema halo abertamente, ida-ne'e neineik-neineik bele influensia ema seluk. Hanesan fermentu kiik ida bele habelar ba masa-trigu tomak, sala ida-ne'ebé la arrepende mós bele afeta igreja tomak.
Serake ida ne'e katak ema kristaun tenke julga no kondena ema? Lae. Ema kristaun hotu mak ema sala-na'in ne'ebé hetan salvasaun liuhusi Maromak Nia grasa. Ita tenke trata ema hotu ho domin, laran-di'ak no hakarak atu restaura fali ema sira-ne'e (Galatin 6: 1). Maibé domin la signfika ita simu de'it ka finje lahatene kona-ba pekadu ne'ebé ema ida halo. Domin ne'ebé loos mak ko'alia lia-loos no fó korajen ba ema atu arrepende an.
Maromak hakarak Ninia igreja sai fatin ne'ebé ema hetan perdua no hahú fali moris foun. La iha pekadu ida ne'ebé boot liu ba Jesus atu fó perdua. "Se ita konfesa ita nia sala, Nia mak fiel no justu no Nia sei fó perdaun ba ita-nia sala, no hamoos ita hosi hahalok aat hotu." 1 João 1:9 BK
Ohin loron, husu ba ita-nia an: "Serake ha'u husik sala ruma ne'ebé ha'u hatene hela nafatin iha ha'u-nia moris?" Keta subar pekadu. Lori pekadu sira ne'e ba Jesus. Nia prontu atu fó perdua, hamoos no transforma ita-nia laran.
Igreja ne'ebé saudavel mak la'ós igreja ida-ne'ebé la iha ema ida mak halo sala. Igreja ne'ebé saudavél mak igreja ida-ne'ebé ema ho onestu konfesa sira-nia sala ba Maromak, simu Maromak Nia Perdaun no ajuda malu atu la'o hamutuk ho Jesus.
Bainhira ita hadook an husi sala no moris santu liuhusi Maromak nia grasa, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment