Oinsá mak ita bele hatudu katak kazamentu mak prezente husi Maromak?

Eskritura prinsipál: Genesis 2: 18-24 

                                Jénesis 2:18

Nai Maromak dehan, “Mane hela mesak ne'e la di'ak. Hau sei halo maluk ida hodi ajuda nia.” Nai Maromak kria animál fuik hotu iha rai no manu hotu iha loro leten. Nia lori sira ba mane ne'e atu haree mane ne'e fó naran saida ba sira. No naran saida de'it ne'ebé mane fomó, ne'e mak ida-idak nia naran duni. Mane ne'e fó naran ba animál hakiak hotu, ba manu sira iha loro leten, no ba animál fuik hotu iha rai. Maibé nia la hetan maluk ida hodi ajuda nia. Nune'e Nai Maromak halo mane ne'e toba dukur loos. Bainhira nia toba dukur, Maromak foti ruin knosen ida hosi nia no taka fatin nee ho isin. No Nai Maromak halo feto ida hosi ruin knosen ne'ebé Nia foti hosi mane ne'e. Depois Nia lori feto ne'e ba mane. Mane nee dehan, “Ida nee mak ruin hosi ha'u-nia ruin, no isin hosi ha'u-nia isin. Hau sei hanaran nia ‘Feto’ tanba foti nia hosi Mane.” Tanba ne'e mane ida sei husik ninia inan-aman, no hela hamutuk ho ninia feen, no sira sei sai isin ida de'it. Jénesis 2:18-24

Ohin loron, ema barak hanoin katak kazamentu ne'e old-fashioned ona. Ema balu hanoin katak kazamentu ne'e la importante ona. Ema seluk fali hanoin katak ema bele moris hamutuk de'it la presiza kazamentu. Maibé saida mak Biblia hatete? 

Bíblia hatete katak kazamentu ne'e Maromak Nia ideia. Ida-ne'e la hahú ho governu ka tradisaun ema nian. Ne'e hahú iha jardín Eden. Maromak kria Adão no Eva no tau sira hamutuk nu'udar feen no la'en (Jenesis 2:18-24). Ne'e katak kazamentu mak prezente espesiál ida husi Maromak. 

Bíblia mós hatete katak: "Fò onra ba moris kaben nian no keta halo fo'er kama kaben nian. Tanba Maromak sei fó kastigu ba sira ne'ebé halo sala seksuál no sala adultériu." Ebreu 13:4. Maromak hakarak ema atu respeitu no proteje kazamentu. 

Oinsá mak ita bele hatudu ba mundu katak kazamentu ne'e mak Maromak Nia prezente? 

Primeiru, liuhosi hadomi ita-nia la'en ka feen. La'en tenke hadomi ninia feen hanesan Kristu hadomi igreja (Efeso 5:25). Feen tenke hatudu respeitu ba ninia la'en (Efeso 5:33). Kuandu la'en no feen hadomi malu, respeitu malu, no tau matan ba malu, ema bele haree Maromak Nia domin iha sira-nia uma. 

Segundu, liuhusi fiél ba malu. Kazamentu harii bazeia ba konfiansa. La'en no feen sira tenke fiél ba malu. Fidelidade lori dame no ksolok ba família (Mateus 19: 6). 

Terseiru, liuhosi rezolve problema sira ho orasaun no perdua. Família ida-idak dalaruma la konkorda ba malu. Maibé duke hakilar no hakanek malu, ka rende an, família kristaun sira tenke halo orasaun hamutuk, fó perdua ba malu, no husu Maromak Nia sabedoria (Koloso 3: 13-14). 

Ba dala haat, liuhusi hanorin ita-nia oan sira kona-ba Maromak. Ema kristaun nia uma tenke sai fatin ne'ebé sira lee Biblia, hasa'e orasaun, no fahe Maromak Nia domin ba malu (Deuteronomio 6: 6-7). 

Família kristaun ne'ebé kontente mak hanesan evanjelizasaun ka sermaun ida-ne'ebé forte liu iha mundu. Karik ema nunka lee Biblia, maibé sira sei haree oinsá ita hala'o ita-nia moris loroloron. Kuandu sira haree dame, domin, fidelidade no laran-di'ak iha ita-nia uma, sira sei hatene katak Maromak Nia dalan mak di'ak liu hotu. 

Ohin loron, husu ba ita-nia an: "Serake hau-nia família hatudu katak kazamentu mak Maromak Nia prezente?" Se Jesus mak sai sentru ba ita-nia uma-laran, ita-nia moris kazamentu nian sei sai naroman ba ema seluk. 

Kazamentu la'ós old-fashioned ka idea primitivu ida. Kazamentu mak prezente ne'ebé Maromak fó husi jardín Eden. Kuandu ita halo tuir Maromak Nia planu, ita-nia uma kain sai fatin domin, esperansa, no bénsaun. 

Bainhira ita fo onra ba Maromak Nia prezente kazamentu nian no tau Jesus iha sentru ba ita-nia uma kain, ita kontinua la'o hamutuk iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

 Click  iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

#GodsWord #hopechannel #hopechanneltimorleste #awrtimoleste #RTL#dalanbalalehan.blogspot.com