La bele sai ema ne'ebé adora ídulu hanesan sira balu, ne'ebé hanesan hakerek nanis ona, “Povu ne'e tuur hodi haan-hemu, no hamriik hodi halimar.” Ita keta halo sala seksuál hanesan sira balu halo, no ema nain rihun rua-nulu resin tolu (23.000) monu mate iha loron ida de'it. 1 Korinto 10:7-8.
Ema barak hanoin: "Nee mak sala ki'ik oan de'it. Ne'e sei la hakanek ha'u." Maibé Biblia hanorin katak sala ida dala barak lori ita ba sala ka pekadu seluk tan.
Paulo fó-hanoin ema kristaun iha Korinto kona-ba saida mak akontese ba ema Izrael sira iha rai-fuik maran. Bainhira Moises iha Foho Sinai leten, povu Israel halo estatua karau-oan hosi osan-mean no adora karau-oan ne'e duke Maromak (Exodus 32:1-6). Sira han, hemu, selebra ho festa boot, no lakleur tan sira monu ba sala seksuál (1 Korinto 10: 7-8).
Lisaun saida mak ita bele aprende husi ida-ne'e?
Festa dalabarak involve alkohol no bainhira ema lanu ona, ema sai moe la iha no sala seksuál baibain akontese. Pekadu raramente akontese mesak de'it. Bainhira ema hadook an husi Maromak, sira komesa neineik-neineik loke an ba pekadu seluk. Ema ne'ebé para halo orasaun bele para mós lee Biblia. Tuirmai, nia sei komesa hadomi liu buat mundu nian liu fali Maromak. Depois, sala seluk komesa tama ba ninia moris.
Paulo mós alista kona-ba pekadu sira hanesan adora estátua ka ídulu, lanu-teen, kaan-teen, na'ok-teen no halo sala seksuál hamutuk (1 Korinto 5: 10-11; 6: 9-10). Tanbasá? Tanba pekadu sira-ne'e hotu dada ema dook husi Maromak. Pekadu sira ne'e estraga ita-nia relasaun ho Maromak no dala barak estraga ita-nia família no ita-nia futuru.
Ohin loron, parese ita la hakru'uk ba estatua karau-oan hosi osan-mean ida. Maibé buat saida de'it ne'ebé troka Maromak Nia fatin iha ita-nia laran bele sai ídulu ida. Karik la'os estatua karau oan maibe estatua iha forma seluk, Karik osan, tua, droga, jogu/games, media sosiál, haksolok mundu nian, ka inklui mós ita-nia serbisu. Kuandu buat sira-ne'e sai importante liu fali Maromak, sira lori ita dook husi Maromak.
Liafuan di'ak mak ne'e: Jesus bele halo ita livre. Bainhira ita hakbesik nafatin ba Jesus liuhusi orasaun no lee Biblia, Espíritu Santu fó forsa mai ita atu hatete "Lae" ba tentasaun (Galasia 5:16). Maromak mós promete: "Tentasaun hotu nebee ita hasoru ne'e, baibain hasoru ema seluk. Maromak mak fiel, no Nia sei la husik imi atu hetan tentasaun ne'ebé liu fali imi-nia kbiit. Maibé bainhira tentasaun mai, Nia sei fó dalan ida hodi sai, atu nune'e imi bele tahan tentasaun ne'e." 1 Korinto 10:13
Ohin loron, husu ba ita-nia an: "Serake iha buat ruma iha ha'u-nia moris ne'ebé troka Maromak?" Keta hein sala ki'ik ida sai sala barak liután. Fila fali ba Jesus agora. Nia prontu atu fó perdua ita, hamoos ita-nia sala, no fó moris foun ba ita (1 Joao 1:9).
Moris ne'ebé seguru liu mak moris ne'ebé tau Maromak hanesan prioridade dahuluk loroloron. Bainhira Jesus mak iha ita-nia laran, Nia proteje ita husi sala sira ne'ebé bele destroi ita.
Bainhira ita tau fiksa ita-nia laran ba Jesus, la'ós ídulu mundu ne'e nian, ita kontinua la'o ho seguru iha Dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment