Monu ba terus, Nai la husik ita mesak

Ema haleu ami iha sor-sorin, maibé sira la kaer metin ami. Dalan atu sai la iha, maibé ami la lakon esperansa. Ema haterus ami, maibé Maromak la husik ami. Sira riba ami, maibé ami la rahun. 2 Korinto 4:8-9

                           2 Korinto 4:8-9

Paulo hatene saida mak terus. 

Ema hatama nia iha komarka tanba nia haklaken kona-ba Jesus (Efeso 3: 1). Maromak hatete nanis ona ba nia katak nia sei hetan terus tanba ninia serbisu ba Kristu (Apos 9:16). 

Paulo nia moris la fasil. Ema baku nia, rejeita nia, dadur nia, no dala ruma iha perigu mate nian. Maibé nia la rende. 

Tanbasá? Tanba nia hatene katak Maromak la husik nia. 

Paulo hatete katak ema kristaun mak hanesan " sanan rai" - sanan halo hosi rai-mean baibain (2 Korinto 4: 7). Sanan rai-mean la forsa no ladún iha valór boot. Maibé buat ne'ebé folin-boot bele rai hela iha nia laran. 

Paulo dehan katak ita fraku, maibé Maromak poderozu.

Ohin loron, ida-ne'e katak sá ba ita? 

Dala ruma la'o tuir Jesus bele hamosu problema. 

Karik Ita-nia família la komprende kona-ba Ita-nia fiar. 

Karik Ita-nia kolega sira hamnasa Ita tanba Ita lakohi hamutuk ho sira halo buat ruma ne'ebé sala. 

Karik ita lakon oportunidade atu serbisu tanba ita hili onestidade duke bosok. 

Karik ema ko'alia aat kona-ba Ita tanba Ita halo tuir Maromak nia hanorin. 

Karik ita serbí Maromak, maibé ema la hafolin ita-nia serbisu. 

Iha momentu sira hanesan ne'e, hanoin-hetan Paulo nia liafuan: 

"Hetan terus, maibé Maromak la husik hela ami." 

Ema bele rejeita Ita, maibé Maromak sei la abandona Ita. 

Ema bele komprende sala Ita, maibé Maromak hatene Ita-nia laran. 

Karik ita lakon buat ruma tanba ita hili buat ne'ebé loos, maibé ita la lakon Maromak. 

Paulo mós hatudu buat ida ne'ebé importante ba ita: terus la signifika katak Maromak husik hela ita. Paulo hatete: "Ami sempre lori Nai Jesus nia mate iha ami nia isin atu nunee Jesus nia moris bele mosu mai iha ami nia isin." 2 Korinto 4:10

Ita-nia esperiénsia susar sira bele sai oportunidade atu hatudu Jesus Nia karakter. 

Kuandu ema ruma insulta Ita, hatán ho laran-di'ak. 

Kuandu ema ruma hatudu hahalok la loos ba Ita, keta buka atu selu fali. 

Kuandu ema rejeita ita, kontinua halo buat ne'ebé loos. 

Kuandu ita sente kole, halo orasaun no husu Maromak atu fó forsa. 

Kuandu Ita sente mesamesak, hanoin-hetan katak Maromak besik hela ho ita. 

Paulo mós hatudu katak Maromak bele lori ema hamutuk fali iha situasaun susar sira. Onesimus ne'ebé haketak an husi ninia patraun iha tempu balu, sai nu'udar alin doben ida iha Kristu (Filemon 15-16; Koloso 4:9). Paulo mós bolu Onesimus nu'udar Kristu Nia atan no halo orasaun ba ema fiar-na'in sira (Filipe 1: 1-3; Koloso 1: 1-2). 

Mensajen ne'e klaru: 

La'o tuir Jesus, la signifika ita libre hosi problema. Maibé ida-ne'e signifika katak ita sei nunka hasoru problema mesak de'it. 

Karik ema hanehan ita, maibé ita sei la rahun.

Karik sai konfuzaun, maibé Ita la presiza lakon esperansa. 

Ema bele fó terus ba ita, maibé Nai sei la husik ita.

Ita bele monu, maibé Maromak sei foti ita. 

Entaun, buat saida de'it ne'ebé ita hasoru ohin loron, kontinua tau fiar ba Jesus. 

Ita-nia terus la'os rohan ba istoria moris nian. Maromak sei hamutuk nafatin ho ita. 

Kuandu ita mantein fiél bainhira hasoru susar oioin, ita bele kontinua la'o ho fiar iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Saida mak signifika adora Maromak ho espíritu no lia-loos?

Maromak mak Espíritu, no sira neʼebé adora Nia tenki adora iha espíritu no iha lia loos. João 4:24

                                  João 4:24

Saida mak signifika hosi Jesus Ninia lia-fuan "Adora Maromak iha espíritu no lia-loos"? 

Jesus hatete liafuan sira-ne'e bainhira Nia ko'alia ho feto Samaria ida. Nia husu kona-ba fatin ne'ebé loos atu adora Maromak. Ema Judeu sira adora iha Jeruzalein, no ema Samaria sira adora iha Foho Gerizim (João 4:20). 

Jesus hatudu ba nia katak adorasaun ne'ebé loos la'os kona-ba iha fatin ne'ebé ita halo adorasaun ba. Adorasaun ne'ebé loos mak kona-ba ita-nia relasaun di'ak ho Maromak no kondisaun ita-nia laran. 

Saidamak signifika hosi adora "Iha espíritu"? 

Adora Maromak ho espíritu katak adora Nia ho ita-nia laran tomak, la'ós de'it ho ita-nia isin. 

Ita bele tuur iha igreja, kanta knananuk, hakne'ak, no halo orasaun, maibé karik ita-nia laran dook husi Maromak. 

Jesus fó avizu kona-ba adorasaun hanesan ne'e: "Povu ne'e fó onra mai Ha'u ho sira-nia ibun tutun; maibé sira-nia laran dook hosi Ha'u." Mateus 15:8

Tan ne'e, adorasaun la'ós de'it ba igreja kada semana. Maibé adorasaun mak fó ita-nia laran ba Maromak. 

Bainhira ita kanta, kanta ho laran. 

Kuandu ita halo orasaun, ko'alia ho onestu ba Maromak. 

Bainhira ita rona Biblia, rona ho vontade atu halo tuir. 

Kuandu ita fó oferta, fó ho laran tomak. 

Agora, saida mak adora iha "Lia-loos"? 

Adora Maromak iha lia-loos katak adora Nia tuir Ninia Lia-fuan no lia-loos kona-ba Jesus. 

Jesus hatete: "Ita-nia liafuan mak lia-loos" (João 17:17). 

Ita labele adora Maromak konformi ita hakarak. Ita presiza hatene saida mak Biblia hanorin no halo tuir. 

Porezemplu, se Maromak Nia Liafuan hatete: " Labele fó sasin falsu" (Exodo 20:16), ita labele adora Maromak iha loron Sábadu no depois bosok ema durante semana serbisu nian. 

Se Maromak Nia Lia-fuan hanorin ita atu fó perdua (Efeso 4: 32), ita labele adora Maromak bainhira ita odi hela ema seluk.

Se Maromak Nia Lia-fuan hanorin ita atu tau matan ba ema kiak no mukit sira (Tiago 1:27), ita-nia adorasaun tenke inklui mós ajuda ema ne'ebé terus. 

Oinsá mak ida-ne'e haree iha ita-nia moris loroloron nian? 

Iha igreja: Keta partisipa de'it. Rona, halo orasaun, kanta, no partisipa ho Ita-nia laran tomak.

Iha uma: Adora Maromak liuhusi orasaun família nian, lee Biblia, no hadomi malu. 

Iha serbisu fatin: Adora Maromak liuhusi hatudu onestidade, serbisu maka'as no justu. 

Iha negósiu: Keta bosok kliente sira ka foti lukru liuhusi manipulasaun. Negosiu ne'ebé onestu mós bele sai hanesan aktu adorasaun ida. 

Bainhira ema ruma hakanek Ita: Hili perdua. Ida-ne'e hatudu katak ita-nia adorasaun muda ita-nia laran. 

Bainhira ema ida la haree: nafatin halo buat ne'ebé loos. Adorasaun ne'ebé loos kontinua bainhira ita sai husi igreja. 

Roma 12: 1 hatete katak ita tenke oferese ita-nia moris tomak ba Maromak nu'udar sakrifísiu moris nian. Ne'e katak adorasaun la'ós de'it buat ne'ebé ita halo ba oras ida ka rua iha igreja. Ita-nia moris tomak bele sai adorasaun. 

Entaun husu ba ita-nia an ohin: "Serake, ha'u adora Maromak ho ha'u-nia ibun tutun de'it, ka ha'u adora Nia ho ha'u-nia laran no ha'u-nia moris tomak?" 

Adorasaun ne'ebé loos la'ós atu hatudu ba ema katak ita ema ne'ebé relijiozu. Ne'e mak kona-ba hadomi Maromak, hatene Ninia lia-loos, no husik Nia transforma ita-nia moris. 

Kuandu ita-nia laran, liafuan, no hahalok sira aliña ho Maromak Nia lia-loos, ita adora Maromak duni iha espíritu no lia-loos.

Kuandu ita adora Maromak ho ita-nia laran no moris tomak no halo tuir Ninia Liafuan kada loron, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Saida mak signifika hosi "Maromak ba ema moris la'os ba ema mate"

Eskritura Prinsipal:

‘Hau mak Abrão nia Maromak, no Isak nia Maromak, no Jacó nia Maromak.’? Nia la'os Maromak ba ema mate, maibé Maromak ba ema moris. Mateus 22:32

                          Mateus 22:32

Saida mak signifika hosi Jesus Ninia liafuan sira-ne'e? 

Ulun-nain relijiaun sira bolu ema Saduseu sira mai hasoru Jesus hodi husu pergunta kona-ba moris-hias nian. Ema Saduseu sira la fiar katak ema mate sei moris hi'as fali (Mateus 22:23). Sira koko atu fo impresaun katak hanorin kona-ba moris-hias nian hanesan dutrina ema beik nian.

Jesus hatán ba sira hodi hatudu liafuan ne'ebé Maromak hatete ba Moises: 

 "Hau mak Abrão nia Maromak, Isaac nia Maromak, no Jacó nia Maromak." - Mateus 22: 32 

Abrão, Isaac no Jacó mate ona tinan barak ona antes Maromak fó sai liafuan sira-ne'e ba Moises. Maibé Maromak sei bolu Nia aan nu'udar sira-nia Maromak. 

Tuirmai Jesus dehan: "Maromak ne'e la'ós ema mate nia Maromak, maibé ema moris nian."

Serake ida-ne'e signifika katak Abrão, Isaac no Jacó moris no ba ona lalehan? 

Lae. Ita presiza lee versikulu ne'e hamutuk ho versikulu sira seluk iha Biblia. Bíblia hatete katak ema mate sira "la hatene buat ida" (Eclesiastes 9:5). Jesus hatete katak mate mak hanesan toba-dukur bainhira Nia ko'alia kona-ba Lazaro (João 11: 11-14). 

Tan ne'e, Jesus la hanorin katak Abrão, Isaac, no Jacó moris hela iha fatin ruma depoisde mate. Maibé, Jesus hanorin kona-ba moris-hias ne'ebé serteza. 

Maromak promete ba Abrão, Isaac, no Jacó. Tan ne'e, sira-nia mate fiziku nian la halakon Maromak Nia promesa sira. Maromak sei fó fali moris-hias ba sira banhira Jesus fila fali mai (João 5:28-29; 1 Tesalonika 4:16-17). 

Jesus dehan: "Hau mak moris-hias no moris." João 11:25 

Ida-ne'e fó esperansa furak mai ita. 

Ohin loron, ida-ne'e signifika sáida ba ita? 

Primeiru, mate la'ós rohan. 

Kuandu ema ne'ebé fiar ba Jesus mate, ita triste. Ita lakon sira. Maibé ita la presiza fiar katak mate sei manán ba nafatin. Jesus promete katak "Keta admira kona-ba ida ne'e, tanba oras sei mai bainhira ema hotu neʼebé iha rate laran sei rona Ninia lian, no sira sei sai mai. Ema ne'ebé halo di'ak, sei hadeer fali no tama ba moris. No ema ne'ebé halo aat, sei hadeer fali no tama ba kastigu. João 5:28-29

Segundu, Maromak Nia promesa sira nunka mate. 

Karik ita hein hela Maromak atu hatán ba orasaun ruma. Karik moris ne'e susar. Hanoin-hetan Abrão, Isaac no Jacó. Sira mate ona, maibé Maromak Nia promesa sira sei kontinua nafatin. 

Terseiru, ohin loron, ita tenke prepara an ba loron moris-hias nian. 

Ita la hatene bainhira mak ita-nia moris sei remata. Entaun keta hein to'o loron aban atu la'o tuir Jesus. 

Ohin loron:

Fó perdua ba ema. 

Dame malu ho ema

Konfesa Ita-nia sala sira. 

Halo orasaun

Lee Maromak Nia Liafuan. 

Ajuda ema ne'ebé presiza 

Fahe lia-fuan di'ak nian ba ema no 

Ohin loron fó ita-nia laran ba Jesus. 

Jesus sei mai fali, no sira ne'ebé tau fiar ba Nia sei moris hi'as fali (lee 1 Korinto 15: 20-23; 1 Tesalonika 4:16). 

Mateus 22:32 fó-hanoin ita katak Maromak Nia relasaun ho Ninia povu la remata iha rate. Karik mate bele haketak ita ba tempu balu, maibé Maromak Nia promesa kona-ba moris hi'as sei sai realidade no ita sei hasoru malu ho ema sira ne'ebé ita hadomi iha loron moris-hias nian.

Entaun kuandu ita lakon ema ne'ebé ita hadomi tamba mate, keta lakon esperansa. 

Ita-nia Maromak mak Maromak ne'ebé moris. Jesus mate, Jesus moris-hias, no Jesus sei mai fali. 

Bainhira ita tau fiar ba Maromak ne'ebé moris no prepara ita-nia laran ba loron moris-hias nian, ita kontinua la'o ho laran-metin iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

click iha  ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More