Maromak mak Espíritu, no sira neʼebé adora Nia tenki adora iha espíritu no iha lia loos. João 4:24
Saida mak signifika hosi Jesus Ninia lia-fuan "Adora Maromak iha espíritu no lia-loos"?
Jesus hatete liafuan sira-ne'e bainhira Nia ko'alia ho feto Samaria ida. Nia husu kona-ba fatin ne'ebé loos atu adora Maromak. Ema Judeu sira adora iha Jeruzalein, no ema Samaria sira adora iha Foho Gerizim (João 4:20).
Jesus hatudu ba nia katak adorasaun ne'ebé loos la'os kona-ba iha fatin ne'ebé ita halo adorasaun ba. Adorasaun ne'ebé loos mak kona-ba ita-nia relasaun di'ak ho Maromak no kondisaun ita-nia laran.
Saidamak signifika hosi adora "Iha espíritu"?
Adora Maromak ho espíritu katak adora Nia ho ita-nia laran tomak, la'ós de'it ho ita-nia isin.
Ita bele tuur iha igreja, kanta knananuk, hakne'ak, no halo orasaun, maibé karik ita-nia laran dook husi Maromak.
Jesus fó avizu kona-ba adorasaun hanesan ne'e: "Povu ne'e fó onra mai Ha'u ho sira-nia ibun tutun; maibé sira-nia laran dook hosi Ha'u." Mateus 15:8
Tan ne'e, adorasaun la'ós de'it ba igreja kada semana. Maibé adorasaun mak fó ita-nia laran ba Maromak.
Bainhira ita kanta, kanta ho laran.
Kuandu ita halo orasaun, ko'alia ho onestu ba Maromak.
Bainhira ita rona Biblia, rona ho vontade atu halo tuir.
Kuandu ita fó oferta, fó ho laran tomak.
Agora, saida mak adora iha "Lia-loos"?
Adora Maromak iha lia-loos katak adora Nia tuir Ninia Lia-fuan no lia-loos kona-ba Jesus.
Jesus hatete: "Ita-nia liafuan mak lia-loos" (João 17:17).
Ita labele adora Maromak konformi ita hakarak. Ita presiza hatene saida mak Biblia hanorin no halo tuir.
Porezemplu, se Maromak Nia Liafuan hatete: " Labele fó sasin falsu" (Exodo 20:16), ita labele adora Maromak iha loron Sábadu no depois bosok ema durante semana serbisu nian.
Se Maromak Nia Lia-fuan hanorin ita atu fó perdua (Efeso 4: 32), ita labele adora Maromak bainhira ita odi hela ema seluk.
Se Maromak Nia Lia-fuan hanorin ita atu tau matan ba ema kiak no mukit sira (Tiago 1:27), ita-nia adorasaun tenke inklui mós ajuda ema ne'ebé terus.
Oinsá mak ida-ne'e haree iha ita-nia moris loroloron nian?
Iha igreja: Keta partisipa de'it. Rona, halo orasaun, kanta, no partisipa ho Ita-nia laran tomak.
Iha uma: Adora Maromak liuhusi orasaun família nian, lee Biblia, no hadomi malu.
Iha serbisu fatin: Adora Maromak liuhusi hatudu onestidade, serbisu maka'as no justu.
Iha negósiu: Keta bosok kliente sira ka foti lukru liuhusi manipulasaun. Negosiu ne'ebé onestu mós bele sai hanesan aktu adorasaun ida.
Bainhira ema ruma hakanek Ita: Hili perdua. Ida-ne'e hatudu katak ita-nia adorasaun muda ita-nia laran.
Bainhira ema ida la haree: nafatin halo buat ne'ebé loos. Adorasaun ne'ebé loos kontinua bainhira ita sai husi igreja.
Roma 12: 1 hatete katak ita tenke oferese ita-nia moris tomak ba Maromak nu'udar sakrifísiu moris nian. Ne'e katak adorasaun la'ós de'it buat ne'ebé ita halo ba oras ida ka rua iha igreja. Ita-nia moris tomak bele sai adorasaun.
Entaun husu ba ita-nia an ohin: "Serake, ha'u adora Maromak ho ha'u-nia ibun tutun de'it, ka ha'u adora Nia ho ha'u-nia laran no ha'u-nia moris tomak?"
Adorasaun ne'ebé loos la'ós atu hatudu ba ema katak ita ema ne'ebé relijiozu. Ne'e mak kona-ba hadomi Maromak, hatene Ninia lia-loos, no husik Nia transforma ita-nia moris.
Kuandu ita-nia laran, liafuan, no hahalok sira aliña ho Maromak Nia lia-loos, ita adora Maromak duni iha espíritu no lia-loos.
Kuandu ita adora Maromak ho ita-nia laran no moris tomak no halo tuir Ninia Liafuan kada loron, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment