Ema neʼebé fiél iha buat kiʼik sei fiél mós iha buat boot, no ema neʼebé la fiél iha buat kiʼik sei la fiél iha buat boot. Lukas 16:10
Versikulu ida ne'e realistíku tebes. Na'i Jesus dehan se ita bele halo Na'i Maromak satisfaz iha buat ne'ebé ki'ik, ita mós sei halo Na'i Maromak satisfaz iha buat boot.
Na'i Maromak observa Ka haree ita-nia laran. Se ita ho laran hakarak prátika Na'i Ninia lia-loos iha buat ne'ebé ki'ik, bainhira buat boot mosu mai mesmu ita senti todan Na'i Maromak sei proteje ita atu ita hamriik firmi nafatin. Dala-barak ita foti asaun bazeia-ba ita-nia hakarak rasik iha buat ne'ebé ki'ik no hanoin katak Na'i Maromak la prekupa.
Ezemplu, fahe Na'i Maromak Ninia Lia-fuan. Dalaruma ita hanoin katak fahe Na'i Maromak Ninia Lia-fuan tenke hamriik iha palku leten, iha seminariu ne'ebé boot no iha audiens ne'ebé barak mak foin iha valór. Ita haluha tiha katak ita-nia hahalok loronloron, saida mak ita ko'alia, saida mak ita hatais, oinsa ita han, hemu bele mós sai testamuña Ka sasin katak ita ne'e naroman ninia oan ka nakukun ninia oan. Ita-nia hahalok loronloron hatudu ba ema katak ita ne'e Na'i Maromak Ninia oan Ka Diabu ninia oan. Sira ne'ebé Espiritu Maromak direze mak sira ne'ebé sai Maromak Ninia oan (Roma 8:14)
Loronloron, iha momentu hotu ita bele sai sasin ba Na'i Maromak. Bainhira Na'i Maromak aranja sirkumtansia Ka situasaun balu ba ita iha ita-nia moris, Nia haree ita iha fatin sekretu, Nia haree ita hosi fatin aas, haree-ba ita-nia laran, ita-nia neon, no ita-nia konsiderasaun, haree ba oinsá ita foti asaun. Iha asaun sira ne'e seraké halo atu fo gloria ba Maromak ka lae?
Na'i Maromak ko'alia mai ita iha 1 Korinto 10:31 dehan "Tan neʼe, se imi han, hemu, ka halo buat seluk, halo buat hotu-hotu ba Maromak nia glória"
Bainhira ita fiél iha buat ne'ebé ki'ik Na'i Maromak sei fo fiar ba ita buat ne'ebé boot atu Na'i Maromak hetan gloria.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Lukas 16:10 |
