Oh foo agradese ba Nai, bolu ba Ninia naran, foo sai Ninia hahalok iha povu nia leet! Salmu 105:1 BK
Moris la sempre fasíl. Ita hotu hasoru problema, moras, lakon, no susar. Maibé, maski iha tempu susar, Biblia hanorin ita atu agradese no hahi'i Maromak nafatin. Salmu 105: 1 haruka ita atu fó agradese ba Nai no fó-hatene ema seluk kona-ba Ninia hahalok di'ak sira. Ida-ne'e la'ós de'it bainhira buat hotu la'o di'ak, maibé mós bainhira ita hasoru susar no terus.
Salmu 105 konta istória kona-ba povu Izrael. Uluk sira sai atan iha rai-Ejitu. Moris susar tebes ba sira. Maibé Maromak la haluha Ninia promesa sira. Nia uza Moises no Arão lori sira sai husi rai-Ejitu. Maromak halo milagre barak, hanesan halo mota sai raan, haruka manduku ne'ebé barak tebes no hatun udan zelu fatuk. Maski sira ta'uk no hamlaha iha rai-fuik maran, maibé Maromak fó ai-han (mana ) no bee ba sira. Nia dirije sira ho kalohan iha tempu loron no ahi iha kalan.
Liuhusi susar sira ne'e hotu, Maromak nafatin fiél ba sira. Tan ne'e mak hakerek-nain ba Salmo 105 hatete katak ita tenke agradese no hahi'i Maromak. Maski iha tempu susar, Maromak nafatin serbisu ba ita-nia di'ak. Nia iha planu ba ita. Nia nunka husik Ninia povu mesak.
Kuandu ita hasoru susar ruma, ita bele hanoin-hetan buat ne'ebé Maromak halo ona ba ita-nia moris. Hanesan Maromak ajuda ona ema Izrael, Nia mós bele ajuda ita ohin loron. Ita bele agradese ba Nia tanba Ninia domin, tanba Jesus, no tanba Ninia forsa ne'ebé fo mai ita loroloron. No ita mós bele fó-hatene ema seluk katak Maromak ne'e di'ak tebes.
Mai ita kontinua tau fiar, agradese, no hahi'i Maromak, maski iha situasaun saida de'it. Maromak sempre di'ak.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment