HUSIK JUSTISA SULI HANESAN MOTA

Maibee husik justisa suli tuun hanesan bee, no hahalok loos hanesan mota nebee suli hela deit. Amos 5:24 BK

Versíkulu ne'e mai husi profeta Amos, ne'ebé ko'alia ba povu Izrael nia reinu parte norte. Iha tempu ne'ebá, ema barak mak riku no iha uma ne'ebé di'ak, maibé sira-nia hahalok la justu. Sira hakanek ema kiak, hetan osan iha dalan ne'ebé la loos, no sira la hanoin kona-ba ema ne'ebé kiak. Maski sira ba templu no fó sakrifísiu, maibé Maromak la kontente. Tanbasá? Tanba sira halo tuir relijiaun, maibé sira-nia laran nakonu ho hahalok injustisa. Adorasaun hanesan ne'e falsu.

Maromak hatete ho klaru ba sira: Nia lakohi adorasaun ne'ebé falsu. Nia hakarak ema atu hatudu hahalok ne'ebé justu, laran-di'ak, no halo buat ne'ebé loos. Tan ne'e mak profeta Amos hatete katak justisa tenke suli hanesan mota, sempre muda, forte no nakonu. 

Mensajen ne'e mós ita bele hetan iha Testamentu Foun. Tiago 1:27 hatete katak "Relijiaun nebee moos no la foer iha Aman Maromak nia oin mak nee: atu tau matan ba oan kiak no feto faluk iha sira nia terus, no kuidadu aan katak ita la sai foer hosi mundu" Tiago 2:26 hatete katak fiar ne'ebé la iha asaun fiar ne'e mate. Ida ne'e signifika katak ita la bele dehan de'it katak ita hadomi Maromak. Ita tenke hatudu ita-nia domin ba Maromak liuhusi oinsá ita hatudu hahalok-di'ak ba ema seluk, liuliu ba ema kiak no ema kbiit-laek sira. 

Tan ne'e, ohin loron, Maromak hakarak nafatin ita atu hatudu hahalok ne'ebé justu, laran-di'ak no laran-loos. Ba igreja ne'e di'ak, maibé se ita bosok, lohi, ka haluha ema kiak no mukit sira, ita-nia adorasaun la folin buat ida. 

Mai ita husu Maromak atu ajuda ita moris ho justisa no laran-di'ak loroloron, atu nune'e ita-nia moris bele sai hanesan mota ne'ebé lori buat di'ak ba ema hotu ne'ebé hale'u ita. 

Orasaun: Nai, ajuda ami atu moris ho justisa, domin, no tau matan ba ema seluk. Halo ami-nia fiar sai loos liuhusi ami-nia asaun sira. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏