Se ita hanoin deit buat isin nian ita mate. Maibee se ita hanoin deit buat Espíritu nian ita hetan moris no dame. Roma 8:6 BK
Ita-nia hanoin/pensamentu iha influensia boot tebes iha ita-nia moris. Buat ne'ebé ita hanoin bele lori ita atu halo buat di'ak ka aat. Maromak Ninia lia-fuan iha Roma 8: 6 hatete katak se ita husik ita-nia hahalok isin-nian (hahalok mundu nian ka hahalok pekadu nian) kontrola ita-nia hanoin, ida-ne'e sei lori ita ba mate (lee hahalok isin nian iha Galasia 5:19-21). Maibé se ita husik Espiritu Santu dirije ita-nia neon, ita sei iha dame iha ita-nia moris (lee fuan hosi Espiritu nian iha Galasia 5:22-23).
Kuandu ita hanoin kona-ba buat di'ak sira ka buat ne'ebé tuir Maromak Ninia hanorin iha Sagrada Eskritura, ida ne'e halo Maromak kontente. Maromak Ninia lia-fuan iha Filipe 4: 8 hatete: "Ikus mai, maun-alin sira, buat hotu nebee tuir lia loos, buat hotu nebee iha onra, buat hotu nebee loos, buat hotu nebee moos, buat hotu nebee furak, buat hotu nebee bele dehan diak, no se iha buat ruma nebee lao diak, no se iha buat ruma nebee bele hahii, hanoin kona ba buat sira nee" Filipe 4:8 BK. Hanoin sira-ne'e mak halo ita iha dame no hametin ita-nia fiar.
Dala ruma hanoin-aat koko atu tama iha ita-nia neon hanesan hirus, ta'uk, zelozu/laran-moras, ka odi. Maibé ita tenke luta hasoru ita-nia hanoin aat sira ne'e liuhosi halo orasaun, lee Biblia, no husu ajuda husi Maromak. Maromak Ninia lia-fuan iha 2 Korinto 10: 5 hatete: "Ita bele sobu rahun hanorin hotu no hanoin aas nebee ema harii hasoru Maromak nia matenek. Nunee ita bele kaer hanoin hotu atu halo tuir Kristu" 2 Korinto 10:5 BK. Ida ne'e signifika katak ita la husik hanoin aat mantein iha ita-nia neon, maibé tenke soe tiha hanoin aat sira ne'e no hili atu hanoin kona-ba Maromak nia dalan sira.
Espíritu santu ajuda ita atu iha hanoin ne'ebé loos. Kuandu ita konvida Jesus ba ita-nia laran, Ninia Espiritu moris iha ita-nia laran. Espiritu Santu ajuda ita atu hanoin kona-ba hanoin ne'ebé moos, laran-di'ak no dame. Hanoin sira ne'e halo ita hakbesik liután ba Maromak.
Orasaun: Aman Maromak, ajuda ami atu iha hanoin ne'ebé di'ak. Favór, dirije ami-nia neon ho Ita-nia espíritu santu. Hanorin ami atu rejeita hanoin ne'ebé aat no simu hanoin sira ne'ebé hanesan Ita-nia hakarak. Hodi Jesus nia naran, Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment