ENTREGA ITA NIA SUSAR BA NAI

Entrega ita nia susar ba Nai, no Nia sei sustenta ita; Nia sei nunka husik ema nebee moris loos atu monu. Salmu 55:22 BK

Moris ne'e nakonu ho luta. Dala ruma ita sente kole, laran-taridu, no ta'uk. Salmu 55: 22 fo ba ita promesa furak ida. Versikulu ne'e hatete katak ita bele fó ita-nia problema no todan hotu ba Maromak. Ita la presiza lori todan sira ne'e mesak de'it. Maromak ne'e poderozu no domin boot. Nia sei lori ita liuhusi ita-nia terus no susar sira. 

Versíkulu ne'e hatete katak Maromak sei sustenta ita. Ne'e signifika katak Maromak sei fó forsa mai ita atu kontinua la'o ba oin. Nia sei la husik sira ne'ebé tau fiar ba Nia atu monu. Kuandu moris sente todan, ita la presiza ta'uk. Ita bele fiar katak Maromak sempre besik no sei ajuda ita. 

Apóstolu Pedro fó-hanoin ba ita kona-ba lia-loos ne'ebé hanesan iha 1 Pedro 5: 5-7. Nia hatete katak ita tenke haraik-an no tau fiar ba Maromak. Nia haruka ita atu soe ita-nia todan hotu ba Maromak tanba "Nia tau matan ba ita". Maromak la dook hosi ita. Nia haree ita-nia matan-been, rona ita-nia orasaun, no hatene ita-nia laran. 

Maibé ita tenke haraik-an. Ne'e signifika katak ita admite ka rekoñese katak ita la bele halo buat hotu ho ita-nia forsa mesak. Ida-ne'e katak ita mai ba Maromak hanesan oan ida mai hasoru inan-aman ho fiar an no husu ajuda. Bainhira ita halo ida-ne'e, Maromak promete atu tane ita iha tempu ne'ebé loos. 

Tan ne'e, ohin loron, buat saida de'it ne'ebé halo ita prekupa - ta'uk, moras, problema família nian, ka triste intrega hotu ba Maromak. Hatete: "Nai, ha'u fó ha'u-nia todan hotu ba Ita." No fiar katak Nia sei tau matan ba ita, tanba nia hadomi ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏