Tanba hau hanoin katak ita la bele kompara terus iha tempu agora ho glória nebee ita sei haree aban-bainrua. Roma 8:18 BK
Iha Roma kapítulu 8, Paulo hakerek karta ba ema kristaun sira ne'ebé hasoru susar barak. Iha versíkulu anterior, nia fó-hanoin sira katak agora sira mak Maromak nia oan. Iha versíkulu 14 to'o 17, Paulo hatete katak se Maromak Ninia Espiriu Santu mak dirije ita, ita mak Maromak nia oan. No se ita mak oan, ita mós sai simu heransa ka liman-rohan - ida ne'e signifika katak ita mós sei simu buat furak ida husi Maromak Iha futuru.
Maibé molok glória ne'e mai, ita sei hasoru terus oinoin. Moris iha mundu bele nakonu ho sofrementu, terus no moras. Ema balu kiak, moras, mesamesak, ka hetan tratamentu aat. Paulo mós hetan terus barak, tanba ema baku nia, sulan nia ba komarka, no ema rejeita ka la simu nia. Maibé iha Roma 8:18, nia hatete katak glória ne'ebé Maromak prepara ona ba ita iha futuru mak boot tebes, tan ne'e ita-nia terus agora la kompara ho gloria ne'ebé ita sei simu iha lalehan.
Glória ne'e la'ós de'it ita sei iha lalehan iha futuru. Maromak mós haka'as an daudauk atu ajuda muda ita atu sai hanesan Jesus iha mundu ida ne'e. Maski ita hasoru susar oioin, maibé Maromak nia Espiritu hamutuk ho ita, ajuda ita, fó komfortu mai ita, no fó esperansa mai ita.
Tan ne'e, kuandu ita hasoru susar iha ita-nia moris, hanoin ida-ne'e: susar sei la dura ba nafatin. Maromak iha buat ne'ebé di'ak liu iha futuru. Loron ida, sei la iha tan triste, no la iha tan matan-been, sei la iha tan mate (Apokalipse 7:17; 21:4). Ita sei hamutuk ho Jesus ho haksolok no dame ba nafatin.
Kontinua kaer metin Maromak Ninia promesa sira. Labele rende!. Tamba Maromak Nia promesa ne'e loos duni. Buat di'ak liutan sei mai!
Orasaun: Nai, obrigadu, tanba Ita prepara ona futuru furak ida ba ami. Ajuda ami atu nafatin fiar metin bainhira iha susar laran no ajuda ami hanoin katak Ita-nia glória boot liu fali ami-nia terus. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment