Haksolok iha tempu hotu

Haksolok nafatin ba iha Nai. Dala ida tan ha'u dehan, Haksolok ba! Filipe 4:4 BK

Filipe 4:4 

Iha versíkulu ne'e, apóstolu Paulo hatete katak ita tenke haksolok nafatin. Ida-ne'e fasil bainhira ita moris iha situasaun di'ak, maibé susar ba ita kuandu ita sente moras, lakon, ka sente laran-tun ka desapontadu. Saida mak halo apóstolu Paulo nia liafuan nee signifikativu tebes mak: Nia hakerek liafuan sira-ne'e bainhira nia iha komarka laran. Maski Paulo hetan terus, maibé nia sei kontente nafatin ho Nai. 

Apóstolu Paulo hanorin ita katak haksolok ne'ebé loos la mai husi ita-nia situasaun, maibé maihusi ita-nia relasaun ho Jesus. Ema, osan, ka komfortu ne'ebé ita simu bele halo ita kontente ba tempu balu, maibé Nai de'it mak fó ksolok ba nafatin maski iha tempu susar. Kuandu ita hateke nafatin ba Jesus, ita hanoin-hetan ninia domin, ninia promesa sira, no ninia prezensa hamutuk ho ita, ita la prekupa ho situasaun saida de'it mak ita hasoru.  

Ita bele haksolok iha tempu di'ak sira tanba Maromak nia bénsaun, no ita bele haksolok iha tempu susar sira tanba ita hatene katak buat hotu Maromak mak kontrola. Roma 8:28 fó-hanoin ba ita hanesan ne'e: "Ita hatene katak buat hotu halao hamutuk hodi halo diak ba sira nebee hadomi Maromak, ba sira nebee Maromak bolu tuir Ninia planu". Iha tempu hotu: kuandu ita haksolok ka triste, bele halo ita hakbesik liután ba Maromak. 

Tan ne'e, ohin, hili atu haksolok iha Nai. Agradese ba ninia fidelidade, maski buat hotu la perfeitu. Haksolok la'ós kona-ba buat ne'ebé akontese haleu ita, maibé kona-ba se mak hela iha ita-nia laran. Kuandu Jesus mak ita-nia fonte ba ksolok, tempu hotu-hotu sai pasu ba oin atu la'o iha dalan ba lalehan. 

Orasaun: Nai, obrigadu, tanba Ita mak ami-nia ksolok ne'ebé loos. Ajuda ami atu haksolok iha ami-nia moris tomak, iha situasaun kontente ka susar, tanba ami hatene katak Ita hamutuk ho ami. Hakonu ami-nia laran ho Ita-nia dame no ksolok bainhira ami la'o hamutuk ho Ita iha dalan ba lalehan. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏