Tanba ho Maromak la iha buat ida ne'ebé la bele. Lucas 1:37
Anju Gabriel ko'alia liafuan sira-ne'e ba Maria bainhira nia rona katak nia sei tuur-ahi ba Jesus. Maria mak feto-klosan ida-ne'ebé simples, atu hahoris Salvador, haree hanesan imposivél. Nia la iha podér, la iha pozisaun espesiál, no la iha planu ba milagre hanesan ne'e. Maibé anju ne'e fó-hanoin nia katak Maromak bele halo buat ne'ebé ema la bele halo.
Versíkulu ne'e hanorin ita buat importante ida kona-ba Maromak: Ninia kbiit la iha limitasaun. Nia bele halo liu fali ema nia forsa, siénsia, logika, no ka saida de'it mak ita bele imajina. Buat ne'ebé imposivél ba ita mak buat ne'ebé Maromak bele halo.
Iha Biblia laran, ita lee Maromak fera tasi, kura ema moras, halo ema mate moris hi'as fali, no muda sira-nia laran. Nia fó oan ba feto sira ne'ebé idade ona, proteje Ninia povu husi perigu, no lori esperansa ba sira ne'ebé la iha esperansa. Ninia podér sei hanesan nafatin to'o ohin loron.
Karik agora dadauk ita hasoru situasaun ne'ebé ita sente katak imposivél - problema ne'ebé boot demais, ka moris ne'ebé todan liu nakonu ho problema. Lembra Lukas 1:37. Maromak la limita ba Ita-nia situasaun. Ita-nia frakeza sira la hanetik Nia. Nia mak Maromak ne'ebé ko'alia no milagre sira akontese.
Ita-nia serbisu mak la'os atu komprende oinsá Maromak halo Ninia serbisu. Maibé Ita-nia serbisu mak atu tau fiar katak Maromak bele halo buat hotu. Kuandu ita tau ita-nia moris iha Ninia liman, Nia bele loke odamatan, muda situasaun, no lori esperansa ba fatin nakukun sira.
Ohin loron, intrega ita-nia prekupasaun hotu ba Maromak. Fiar katak Maromak bele halo buat hotu. La'o ba oin ho fé, hatene-ba katak Maromak ne'ebé bele halo buat ne'ebé imposivél la'o hamutuk ho ita iha dalan ba lalehan.
Orasaun: Nai, obrigadu tanba Ita Maromak ne'ebé bele halo buat ne'ebé imposivél. Ajuda ami atu tau fiar ba Ita-nia podér, maski iha situasaun ne'ebé la iha esperansa. Fó ba ami fé atu fiar katak Ita bele halo buat boot ne'ebé imposivél bainhira ami la'o tuir hela Ita iha dalan ba lalehan. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment