Onestu ba Maromak

Oh Maromak, buka hatene ha'u no koñese ha'u-nia fuan laran. Koko ha'u ba, no hatene ha'u-nia hanoin. Salmu 139:23 BK

Salmu 139:23

Dala ruma ita haka'as an atu subar ita-nia sentimentu ne'ebé loos, maski ho Maromak. Ita finje katak ita di'ak hela, mesmu realidade ita la di'ak, ka ita koko atu taka ita-nia sala no ita-nia prekupasaun sira hosi Maromak. Maibé versíkulu ne'e fó-hanoin ita katak ita la presiza subar buat ida husi Maromak. Nia hatene ona buat hotu kona-ba ita - hanesan ita-nia hanoin, ta'uk, sala no hakarak sira. 

Liurai David, ne'ebé hakerek salmu ne'e, husu Maromak atu buka-hatene ninia fuan-laran. Nia hakarak Maromak atu hateke kle'an ba nia laran no hatudu ba nia buat ne'ebé la loos. Liurai David la ta'uk atu ko'alia onestu ba Maromak, tanba nia fiar katak Maromak hadomi nia no hakarak ajuda nia sai di'ak liután. 

Onestu ba Maromak signifika katak ita bele hakbesik ba Maromak ho situasaun real ne'ebé ita hasoru. Kuandu ita sente ta'uk, ita bele fó-hatene ba Nia. Kuandu ita halo sala, ita bele konfesa. Kuandu ita sai konfuzaun ka laran kanek, ita bele hato'o ba Maromak liuhusi orasaun. Maromak nunka rejeita ita-nia orasaun. 1 Joao 1: 9 hatete: "Se ita konfesa ita-nia sala, Nia mak fiél no justu no Nia sei fó perdaun ba ita-nia sala, no hamoos ita hosi hahalok aat hotu" 

Kuandu ita loke ita-nia laran ba Maromak, nia hamoos ita-nia laran, fó dame mai ita, no ajuda ita la'o tuir Ninia lia-loos. Onestu ba Maromak lori kurativu no hametin ita-nia relasaun ho nia. 

Tan ne'e, ohin loron, keta subar ita-nia sentimentu - ko'alia ho onestu ba Maromak. Husik Nia buka-hatene Ita-nia laran no dirije Ita-nia hakat sira iha dalan ba lalehan. 

Orasaun: Nai, Ita hatene ami-nia laran di'ak liu fali ami. Favór buka hatene ami-nia laran, fó perdua mai ami, no lori ami ba Ita-nia lia-loos hotu. Ajuda ami atu sempre onestu ba Ita no la'o ho laran-metin iha dalan ba lalehan. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏