Rona lai, Maromak mak ha'u-nia salvasaun, ha'u sei fiar no ha'u la tauk, tanba Nia mak Nai ne'ebé ha'u-nia kbiit no ha'u-nia kanta, no Nia sai ona ha'u-nia salvasaun. Isaias 12:2 BK
Isaias 12: 2 mak versíkulu furak ida kona-ba esperansa. Maromak promete ida-ne'e ba Ninia povu durante tempu susar sira. Sira hasoru perigu, ta'uk, no tempu la serteza sira. Maibé Maromak fó-hanoin sira katak Nia rasik mak sei sai sira-nia salvasaun - Maromak ida ne'ebé salva, proteje no fó forsa.
Iha versíkulu ne'e, profeta Isaias hanorin ita atu tau fiar tomak ba Maromak. Nia hatete: "Hau sei tau fiar no la ta'uk." Ida-ne'e la dehan katak moris sei sempre fasil. Maibé ida ne'e signfika maski ita hasoru buat saida de'it, ita kaer-metin Maromak Nia promesa sira. Ita kaer metin ba Ninia Liafuan hanesan fatuk ne'ebé metin iha tempu hasoru anin-fuik.
Maromak promete katak nia sei sai ita-nia salvasaun, ne'ebé signifika nia sei salva ita husi sala no husi situasaun hotu ne'ebé tenta halakon ita. Nia promete katak Nia sei sai ita-nia forsa kuandu ita sente fraku. No Maromak promete katak Nia sei defende ita, no nia sei halo funu kontra forsa nakukun nian ne'ebé ita labele halo ho ita-nia forsa rasik.
Kuandu sentimentu ta'uk tenta tama iha ita-nia laran, hanoin-hetan versikulu ne'e. Kuandu ita-nia problema sira sente todan liu, hanoin-hetan katak Maromak mak ita-nia forsa. Kuandu ita la hatene kona-ba moris nee atu sai oinsá los, hanoin-hetan katak Maromak mak ita-nia salvasaun. Ninia promesa sira nunka falla.
Kaer-metin ba Maromak nia promesa sira, signifika hili tau fiar ba Maromak ninia lia-fuan sira liu fali ita-nia sentimentu ta'uk sira. Ne'e signifika katak ita tau fiar katak Maromak hamutuk ho ita, nia suporta ita, no Nia sei lori ita liuhosi tempu susar hotu iha ita-nia moris.
Kaer-metin ba Ninia promesa sira ohin loron. Husik Ninia lia-loos enxe ita-nia laran ho dame no korajen. Kuandu ita tau fiar ba Maromak Nia salvasaun, ita la'o ho aten-barani no la'o ho seguru iha dalan ba lalehan.
Orasaun: Nai, obrigadu ba Ita-Boot Nia promesa sira ne'ebé nunka falla. Ajuda ami tau fiar ba Ita ho ami-nia laran tomak no kaer metin ba Ita-nia Liafuan bainhira ami ta'uk. Sai ami-nia forsa no ami-nia salvasaun bainhira ami la'o iha dalan ba lalehan. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment