Tanba la'os imi rasik ko'alia, maibé imi nia Aman nia Espíritu sei koalia liu hosi imi. Mateus 10:20 BK
Kuandu Jesus haruka Ninia dixipulu sira ba haklaken Evanjellu, nia fó avizu ba sira katak sira sei hasoru opozisaun. Ema balu sei rejeita sira, pergunta sira, ka ema balu sei ataka sira. Karik dixipulu sira sente ta'uk no hanoin kona-ba saida mak sira bele hatete ka oinsá atu defende sira-nia an.
Maibé Jesus fo ba sira promesa furak ida: katak sira sei la ko'alia mesak de'it. Maromak nia Espíritu, Espíritu santu, sei ko'alia liuhusi sira.
Versíkulu ne'e fó-hanoin ita katak Maromak la bolu ita atu serbí Nia ho ita-nia kbiit rasik. Kuandu ita fahe Ninia Liafuan, fó komfortu ba ema ruma, halo orasaun ba ema ruma, ka fó-hatene ema seluk kona-ba Jesus, Espíritu Santu fó liafuan ne'ebé loos mai ita iha tempu ne'ebé ita presiza. Maski ita sente fraku, moe, ka seidauk prepara an, maibé Maromak fo forsa nafatin.
Ita-nia "Aman Nia Espíritu" hatudu katak Maromak besik ho ita. Nia la dook hosi ita. Nia hela iha ita-nia leet. Nia ajuda ita. Hanesan aman ida-ne'ebé hadomi ninia oan sira, Maromak mós dirije ita-nia hanoin, ita-nia liafuan, no ita-nia asaun. Kuandu ita sadere ba Maromak, Nia uza ita-nia liafuan simples sira hodi book ema-nia laran no muda ema-nia moris.
Entaun keta ta'uk atu ko'alia kona-ba Ita-nia fiar. Keta hanoin barak kona-ba ko'alia ho perfeitu. Tau fiar de'it ba Maromak. Loke ita-nia laran, no husik Espíritu Santu serbisu liuhosi ita. Nia bele halo ita-nia liafuan ki'ik sira sai bénsaun boot ba ema ne'ebé presiza esperansa.
Bainhira ita husik Maromak Nia Espíritu ko'alia liuhosi ita, ita fó naroman ba ema seluk, no ita ajuda sira atu la'o iha dalan ba lalehan.
Orasaun: Aman, obrigadu tanba fó Ita-nia espíritu santu mai ami. Ajuda ami tau fiar ba Ita kuandu ami ko'alia Maromak Nia lia-fuan no sadere ba Ita-nia forsa, la'ós ami-nian forsa rasik. Uza ami-nia liafuan atu haraik bénsaun ba ema seluk no dirije sira iha dalan ba lalehan. Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment