Oinsá hasoru ta'uk?

Bainhira hau tauk, hau tau fiar iha O. Salmu 56:3 BK

Salmo 56:3

Dala ruma ema hotu sente ta'uk. Karik ita ta'uk kona-ba moras, perigu, futuru, ka saida mak ema sei hatete kona-ba ita. Ta'uk bele halo ita-nia laran sai fraku no ita-nia neon la hakmatek. Maibé iha versíkulu badak no poderozu ne'e, liurai David hatete saida mak ita tenke halo bainhira ita ta'uk: TAU FIAR BA MAROMAK. 

Liurai David hatene oinsá mak sentimentu ta'uk. Nia hakerek salmu ne'e bainhira inimigu sira duni tuir nia, no ninia moris iha perigu laran. Maibé liurai David la husik ta'uk kontrola nia, maibé nia hili atu tau fiar ba Maromak. Nia fiar katak maski problema ne'e boot tebes, maibé Maromak boot liu problema sira ne'e.

Fiar ba Maromak la signifika katak ita-nia ta'uk sei lakon kedas, maibé ne'e signifika katak ita la hasoru tan ta'uk sira ne'e mesak de'it. Kuandu ita halo orasaun no fó-hatene ba Maromak kona-ba buat ne'ebé ita sente, nia fó aten-barani no dame mai ita. Ninia promesa sira fó-hanoin ita katak Nia sempre hamutuk ho ita, proteje no dirije ita. 

Bainhira sentimentu ta'uk mai, keta halai husi Maromak, maibé halai ba Nia. Loke ita-nia Biblia no hanoin-hetan ninia liafuan sira ne'e: "Keta ta'uk, tanba Ha'u hamutuk ho imi; lalika hakfodak, tanba Ha'u mak imi-nia Maromak. Ha'u sei haforsa imi, no Ha'u sei ajuda imi. Ha'u sei kaer imi ho Ha'u-nia liman loos ne'ebé hala'o hahalok loos" Isaias 41:10. Halo tuir Ninia Liafuan sira no moris ho fiél maski susar. Fé sai forsa liutan kuandu ita kontinua obedese ba Maromak mezmu ita ta'uk. 

Tan ne'e, bainhira ita sente ta'uk, para no halo orasaun. Fó-hatene ba Maromak kona-ba sentimentu ne'e, no hili atu tau fiar ba Maromak. Nia sei kaer metin ita, fó kmaan ba ita-nia laran, no fó dame ba ita, bainhira ita la'o hamutuk ho Nia iha dalan ba lalehan. 

Orasaun: Nai, kuandu ami ta'uk, ajuda ami atu tau fiar ba Ita. Fó-hanoin ami katak Maromak boot liu fali ami-nia ta'uk no sempre besik. Fó aten-barani mai ami atu halo tuir Ita-nia hanorin sira hosi Sagrada Eskritura no kontinua la'o ho laran-metin iha dalan ba lalehan. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏