February 2026 ~ Dalan ba Lalehan

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 28, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Sai hanesan Nia

Halo tuir Maromak, nu'udar Ninia oan doben sira. Efezu 5:1 BK

Efezu 5:1

Labarik sira dala barak kopia ka halo tuir sira-nia inan-aman. Sira repete fali sira-nia liafuan, halo tuir sira-nia hahalok ka asaun sira, no koko atu iha halohalok hanesan sira. Iha versíkulu ne'e, apóstolu Paulo fó instrusaun ne'ebé simples maibé kbiit boot ba ema kristaun sira, hodi dehan: imita Maromak!.

Instrusaun ida-ne'e hanesan identidade ida. Maromak bolu ita nu'udar "oan doben sira". Ita la imita Maromak atu sai Ninia oan, tanba ita Maromak Ninia oan nanis ona. Ninia domin ba ita mak sai fundasaun ida. No hosi domin ne'e suli dalan foun moris nian. Dalan ne'ebé tuir Maromak Nia hanorin.

Atu sai hanesan Maromak signifika refleta Maromak Nia karakter. Ida ne'e katak hatudu laran-di'ak bainhira ema seluk hakanek ita. Ida-ne'e katak fó perdua ba ema ne'ebé halo sala ba ita. Ne'e katak hadomi la'ós de'it bainhira tempu fasil, maibé mós bainhira tempu susar. Hanesan Maromak hatudu ona laran-sadi'a mai ita, ita mós tenke hatudu laran-sadi'a ba ema seluk.

Ita haree imajen Maromak ne'ebé klaru liu iha Jesus Nia moris. Nia hatudu kompaixaun, laran-sadi'a, haraik-an, pasiénsia, no sakrifísiu. Liuhosi hahalok sira-ne'e Nia hatudu hahalok Maromak nian. Kuandu ita halo tuir Kristu Nia ezemplu, ita aprende oinsá atu la'o tuir ita-nia Aman iha lalehan.

Imita Maromak la signifika ita sai perfeitu. Maibé, ne'e signifika ita krexe daudaun iha Maromak Nia dalan. Hosi loron ba loron, Espíritu Santu forma ita-nia laran atu nune'e ita-nia hanoin, liafuan no hahalok sira komesa refleta liután Maromak Nia karakter.

Ohin loron, husu ba ita-nia an: serake ema seluk bele haree Maromak Nia domin iha ita? Serake ita-nia desizaun sira refleta lia-loos no grasa?

Nu'udar Maromak Nia oan doben sira, mai ita hakarak sai hanesan ita-nia Aman ne'ebé moris ho domin, fó perdua, no fó naroman iha mundu ne'ebé nakukun. No bainhira ita halo ida ne'e ita la'o hela iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 26, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Mestre lalehan nian

Maibé Ajudadór, katak Espíritu Santu, ne'ebé Aman sei haruka mai hodi Ha'u-nia naran, Nia sei hanorin buat hotu ba imi, no halo imi hanoin hetan buat hotu ne'ebé Ha'u dehan ona ba imi. João 14:26 BK

João 14:26 BK

Antes Jesus fila fali ba lalehan, nia fó komfortu ba Ninia dixipulu sira. Nia hatete ba sira katak sira sei la mesak de'it. Maromak sei haruka Espíritu Santu atu ajuda sira. Espíritu Santu mak sei sai sira-nia Mestre.

Promesa ne'e mós ba ita ohin loron.

Espíritu santu nu'udar ajuda-na'in. Nia hanorin ita saida mak loos. Nia ajuda ita komprende Maromak Nia Liafuan. Dala ruma kuandu ita lee Biblia, susar ba ita atu komprende. Maibé Espíritu Santu ajuda ita atu komprende. Espiritu Santu loke ita-nia laran no ita-nia neon.

Espíritu mós fó-hanoin ita kona-ba Jesus Nia liafuan. Karik Ita kuaze atu ko'alia buat ruma ne'ebé sala, no derrepente de'it Ita hanoin-hetan versíkulu ida kona-ba laran-di'ak. Karik Ita sente ta'uk, no Ita hanoin-hetan promesa katak Maromak sei kuida Ita. Ne'e mak maneira Espíritu Santu ajuda ita.

Ita la presiza edukasaun aas atu Espíritu Santu bele hanorin. Ita presiza de'it laran ne'ebé prontu. Se ita halo orasaun no husu, Nia sei dirije ita. Espiritu Santu hanorin ita liuhusi Biblia, liuhusi orasaun, no liuhusi lian ne'ebé nonook ko'alia ba ita-nia laran.

Kuandu ita sente konfuzaun, husu Nia atu fo sabedoria. Kuandu ita sente fraku, husu Nia atu fó forsa. Kuandu la hatene saida mak ita tenke halo, husu ba Espíritu Santu atu hatudu dalan ne'ebé loos.

Ita la la'o mesak de'it. Mestre lalehan nian la'o hamutuk ho ita loroloron hodi dirije ita la'o tuir dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 25, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Maromak sei hamaran matan-been

Maromak sei hamaran matan been hotu hosi sira nia matan. La iha tan mate, no la iha tan laran susar, tanis ka moras. Tanba buat sira nebee uluk nian liu tiha ona. Apokalipse 21:4 BK

Apokalipse 21:4

Liafuan murak ne'e mai iha Eskritura nia rohan, bainhira Maromak hatudu lalehan foun no mundu foun ninia furak. Depoisde luta, presegisaun, triste, no funu hotu ne'ebé ita hasoru iha istória mundu nian, ita hetan imajen moris rohan-laek furak iha Lalehan ne'ebé fo ksolok no komfortu.

Nota oinsa mensajen ne'e hato'o ho laran mamar: Nia sei halakon matan-been hotu. La'ós anju ida. Maibé Maromak rasik hakbesik an atu fó komfortu ba Ninia povu.

Kada matan-been konta istória ida. Matan-been monu tamba lakon ema ne'ebé ita hadomi. Matan-been tun tamba desapontadu, traisaun iha uma-kain, traisaun iha serbisu fatin, laran-susar, laran - moras, la iha justisa, no moris mesamesak. Iha mundu ne'e, ita la bele sees hosi susar sira-ne'e. Maibé versíkulu ne'e fó-hanoin ita katak moras, susar, terus, matan-been la permanente.

Mate sei la iha tan. Triste sei lakon. Ema nia laran-susar ne'ebé todan sei hasai kompletamente. Buat ne'ebé agora ita hasoru hanesan rahun, susar no terus sei restaura fali.

Promesa ne'e la hamenus terus ohin loron nian. Maibé promesa ne'e fó perspetiva ida. Susar sira ne'ebé ita hasoru ne'e reál - maibé susar sira-ne'e temporariu de'it. Tristeza ne'ebé ita sente ne'e kle'an tebes, maibé tristeza sira ne'e sei la permanese.

Ba ema fiar-na'in sira, esperansa ne'e reál,tamba esperansa ne'e maihusi Maromak nia karakter ne'ebé fiél. Maromak ne'ebé la'o hamutuk ho ita liuhusi terus laran sei prepara ita ba futuru ne'ebé di'ak liu.

Se ita nakonu ho matan-been ohin, kaer metin ba promesa ne'e. Maromak haree ema ida-idak nia matan-been. Nia kontinua sura matan-been sira ne'e. No tempu sei to'o mai bainhira Ninia liman rasik sei hamaran matan-been hotu.

Maibe molok, to'o iha loron ne'eba, ita moris iha esperansa. Ita tahan ho fé. Ita hein momentu gloriozu ne'e, bainhira tristi sei troka ho ksolok rohan-laek iha mundu no lalehan foun. Maibe molok to'o loron neebá mai ita kontinua la'o dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 24, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Fila fali no moris

Dehan ba sira, Hanesan Hau moris hela, hatete Nai Maromak, Hau lakohi ema aat mate, maibé Ha'u hakarak ema aat fila hosi Ninia hahalok ne'e hodi nia bele moris hela. Fila fali mai, fila fali mai hosi imi nia hahalok aat. Nusaa mak imi tenki mate, Oh uma kain Israel? Ezekiel 33:11 BK

Ezekiel 33:11

Liafuan sira-ne'e hatudu Maromak Nia laran.

Liuhusi profeta Ezequiel, Nai la ko'alia julgamentu ho laran-malirin, maibé nia ko'alia ho laran-manas. Nia la haksolok ho kastigu. Nia la haksolok iha destruisaun pekador. Duke halo nune'e, Nia husu ba Ninia povu: Fila fali no moris. Ne'e mak arrependementu.

Arrepende an la'ós de'it kona-ba sente triste ba hahalok sala sira. Arepende mak kona-ba fila fali - muda diresaun. Arepende mak hili atu la'o dook husi sala no la'o besik ba Maromak. Versíkulu ne'e repete lia-fuan: "Filal! Fila fali ba! - Hatudu urjensia. Ne'e mak lian husi Aman ne'ebé hadomi Ninia oan sira atu oan sira fila antes buat aat halo sira monu.

Dala ruma ita hanoin katak Maromak lakohi fó perdua, ita hanoin katak ita tenke konvense Nia atu hatudu laran-sadi'a. Maibé versikulu ne'e hatudu buat ne'ebé kontrariu. Maromak dezezu ita atu arrepende an tanba nia hakarak ita moris. Ninia avizu la'ós ameasa atu duni ita, maibé atu dada ita fila ba uma.

Sala/pekadu promete liberdade maibé husik ita sai atan ba hahalok sala. Pekadu promete ksolok maibé lori buat ne'ebé flon la iha ka buat mamuk. Maromak Nia liafuan bolu ita fila atu hetan moris ne'ebé loos - moris ne'ebé iha dame, moris ne'ebé restaura fali, no moris ne'ebé renova fali relasaun di'ak ho Maromak.

Komvite atu fila ne'e ba ema hotu-hotu. La iha pasadu ne'ebé nakukun liu. La iha fallansu ne'ebé boot liu. Maromak Nia laran nafatin hanesan: Nia hakarak ita atu fila fali no moris.

Ohin loron, se ita sente iha konviksaun ka konvensidu, labele ignora!. Konviksaun mak evidénsia ba Maromak Nia domin ba ita. Hatán ka responde lalais!. Hasees buat ne'ebé haketak ita husi Maromak. Komesa ho hakat ida ba Ninia diresaun - ita sei deskobre katak, Nia hein hela ita.

"Fila no moris" la'ós de'it ukun-fuan ida. Ne'e mak promesa ida. Kuandu ita fila fali ba Maromak, maromak sei simu ita - ita sei hetan laran-sadi'a, grasa no bénsaun barak iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 22, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Bainhira "Nai, Nai" de'it la sufisiente

La'os ema hotu ne'ebé dehan mai Ha'u, ‘Nai, Nai,’ sei tama ba reinu lalehan, maibé nia deit ne'ebé halo tuir Ha'u-nia Aman iha lalehan Nia hakarak. Mateus 7:21 BK

Mateus 7:21

Jesus Nia liafuan sira-ne'e nia ko'alia iha rohan hosi sermaun iha foho leten. Iha posibilidade katak ita, ko'alia liafuan ne'ebé loos, fó sai ita-nia fiar hosi liur de'it, maibé iha laran, ita la halo tuir buat ne'ebé ita ko'alia ho ibun.

Bainhira ita dehan "Nai, Nai" hatudu rekoñesimentu no antuasismu. Maibé Jesus hatete ho klaru katak ema ne'ebé hakarak tama ba reinu lalehan la'ós de'it ho liafuan ne'ebé loos. Fiar ne'ebé loos hatudu ninia an liuhusi moris ne'ebé obedese ba Aman nia hakarak sira.

Maromak la buka deklarasaun ka liafuan ne'ebé mamuk. Nia buka laran ne'ebé hakarak entrega ba Maromak.

Obedese ne'e la'ós kona-ba buat ne'ebé perfeitu, maibé kona-ba diresaun moris nian. Ida-ne'e kona-ba desizaun hodi hili halo tuir Kristu, atu aliña ita-nia moris tuir ninia hanorin sira, no atu hatán ba konviksaun espíritu santu iha ita-nia laran. Kuandu ita bolu duni Maromak nu'udar "Nai", ita rekoñese katak Nia mak ukun ita-nia desizaun, atitude no ita-nia prioridade sira hotu.

Versíkulu ne'e konvida ita atu ezamina didi'ak ita-nia fiar. Serake Ita-nia asaun refleta ita-nia liafuan sira? Serake Ita-nia moris loroloron demonstra fé ba Maromak? Serake ita rona lalais no prontu atu halo tuir Maromak, maski ita la komfortavél?

Novidades di'ak mak ne'e: obedese mosu tamba relasaun di'ak ho Maromak. Ita obedese la'os atu manan salvasaun, maibé ita obedese tamba ita partensi ba Maromak. Ita obedese tamba ira hetan ona salvasaun. Obedese hanesan rezultadu hosi salvasaun ne'e rasik. Laran ne'ebé transformadu iha dezezu hakarak atu halo kontente Maromak ne'ebé salva nia.

Se iha fatin balu ne'ebé ita-nia liafuan no hahalok la han malu, keta laran-taridu. Lori realidade sira ne'e ba Nai ho haraik-an. Husu Maromak atu forma ita-nia laran sai loos atu nune'e ita liafuan no asaun ka hahalok bele han malu.

Biarba Ita sai ema sira ne'ebé la'os ko'alia de'it, maibé hatudu liuhosi asaun saida mak ita ko'alia ona. Biarba ita sai ema Kristaun neʼebé la'os bolu de'it "Nai, Nai" maibé ita mós ho kontente atu la'o tuir Ninia hakarak iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 21, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Bainhira riku-soin sai bareira

Depois Jesus dehan ba Ninia eskolante sira, “Tebes Ha'u dehan ba imi, katak susar duni ba ema riku atu tama ba reinu lalehan. Dala ida tan, Hau dehan ba imi, fasil liu ba kuda kamelu ida atu tama liu hosi daun kuak duké ema riku ida atu tama ba Maromak nia reinu.” Mateus 19:23-24 BK

Mateus 19:23-24

Jesus ko'alia liafuan sira-ne'e bainhira mane joven ida ne'ebé riku husik hela Jesus ho triste. Mane ne'e hakarak moris rohan-laek, maibé kuandu Jesus husu atu husik ninia rikusoin no la'o tuir Kristu, nia lakoi. Ninia rikusoin nonook sai ona ninia na'i.

Jesus rasik la kondena rikusoin. Eskritura nunka hanorin katak osan ne'e aat. Maibé eskritura fó avizu katak domin ba osan bele kaer metin ita-nia laran. Rikusoin bele hamosu iluzaun moris seguru, indeendensia no kontrola moris - buat ne'ebé so Maromak de'it mak bele fó.

Kuandu ita iha buat barak, fasil atu tau fiar ba buat ne'ebé ita iha duke tau fiar ba Maromak ne'ebé sustenta ita. Rikusoin bele halo ita sente katak ita la presiza Maromak. Riku-soin konvense ita katak ita auto-sufisiente. Maibé tama ba reiñu lalehan la'ós liuhusi riku-soin ne'ebé ita hetan, maibé liuhusi haraik-an no sadere de'it ba Maromak.

Imajen Kuda-kamelu ida-ne'ebé la'o liu hosi daun kuak ne'e intensionalmente dramatik. Ida-ne'e hatudu katak imposivél ba ema atu hetan salvasaun bainhira sira kaer metin ba riku-soin, la'os Kristu. Buat ne'ebé ita kaer-metin no lakohi husik bele sai hanesan bareira ida entre ita ho Maromak.

Maibé istória ne'e la remata ho buat ne'ebé imposivél. Liutiha versíkulu balu, Jesus fó-hanoin ba Ninia dixipulu sira katak “Ba ema, la bele; maibee ba Maromak, buat hotu bele.” Mateus 19:26. Maski ita-nia laran kaer metin ba rikusoin, ita bele sai livre ho Maromak Nia grasa.

Versíkulu ne'e konvida ita atu halo reflesaun ho onestu. Saida mak ita sadere ba? Saida mak ita ta'uk liu atu lakon? Serake ita sei halo tuir Kristu, se obedese ba Maromak halo ita la komfortavél, halo ita lakon dignidade, no kauza ita-nia estabilidade finanseiru nakdoko?

Rikusoin sai hanesan bareira bainhira sira troka ita-nia fiar ba Maromak. Maski nune'e, kuandu riku-soin sira tau iha Maromak nia liman, riku-soin bele sai nu'udar instrumentu atu hatudu laran-luak, hatudu laran-sadi'a no apoiu serbisu reinu lalehan nian.

Ohin, husu ba Nai atu buka-hatene Ita-nia laran. Espera katak la iha buat ida mak bele sai bareira entre ita ho ita-nia devosaun ba Maromak, maski bareira ne'e rikusoin, ambisaun, ka seguransa moris nian. Rikusoin ne'ebé loos la hetan iha buat ne'ebé ita iha, maibé iha Ida ne'ebé ita la'o tuir iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 20, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Demora maibé la haluha

Nai la demora atu kumpri Ninia promesa, hanesan ema balu hanoin Nia demora ne'e. Maibé Nia hatudu pasiénsia ba ita. Nia lakohi atu ema ida lakon, maibé Nia hakarak atu ema hotu arepende. 2 Pedro 3:9 BK

2 Pedro 3:9

Karik Ita perna hein buat ruma no husu: "Tanbasa mak kleur los seidauk to'o mai?" Karik Ita-Boot halo orasaun atu husu buat ruma no Maromak seidauk hatán. Karik ita hein hela Jesus atu fila fali mai, maibé Nia la mosu mai to'o agora.

Versíkulu ohin loron esplika tanbasá Jesus demora atu mai. Maromak la lentu ka neineik hanesan ita hanoin. Nia la haluha Ninia promesa sira. Nia la tarde. Nia hein ho razaun ida, razaun furak ida. Razaun ne'e mak:

Maromak hatudu pasiénsia. Nia seidauk mai tanba Nia hadomi ema. Nia lakohi ema ida lakon ba nafatin. Nia lakohi ema ida atu mate rohan-laek. Nia la hakarak ema ida lakon. Nia hakarak fó tempu barak liután atu ema ses hosi hahalok sala nian no fila fali ba Ninia dalan. Nia fo tempu barak liután ba ema atu hatete "sin/loos" ba Ninia domin

Hanoin to'ok kona-ba ema ne'ebé Ita hadomi no seidauk hatene Jesus. Karik membru família ida. Belun ida. Viziñu ida. Maromak hatudu pasiénsia tanba Nia hakarak sira mós hetan salvasaun. Nia hadomi sira hanesan Nia hadomi ita.

Ida-ne'e muda oinsa ita hanoin kona-ba Nai Nia demora. Duke ita hirus, Ita bele agradese ba Maromak tanba Nia hatudu pasiénsia ba ita. No ita bele uza tempu ne'e atu fó-hatene ema seluk kona-ba Ninia domin. Maromak demora atu ema bele hetan dalan ba lalehan.

Loron ida, Jesus sei fila fali mai. Ita bele serteza ba promesa ne'e. Maibé molok to'o iha tempu ne'ebá, Maromak hatudu pasiénsia. Nia fó tempu ba ema atu fila fali ba Nia. Nia lakohi atu ema ida mate. Ne'e inklui ema ne'ebé Ita hadomi. No ida-ne'e inklui mós ita.

Orasaun: obrigadu tanba hatudu pasiénsia mai ami. Obrigadu tanba ita demora atu fó tempu mai ami atu hatene Ita. Ajuda ami atu uza ami-nia tempu ho didi'ak hodi fó-hatene ema seluk kona-ba Ita-nia domin. Ami halo orasaun ba ema ne'ebé ami hadomi no seidauk hatene Ita. Favór ajuda sira atu hetan dalan ba lalehan antes tarde liu. Hodi Jesus nia naran, Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 19, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Terus ohin, di'ak ba aban

Iha momentu nee, ita senti dixiplina ne'e halo susar ba ita no la halo ita kontenti. Maibé tuir mai, disiplina fó rezultadu dame nian ne'ebé hahalok loos ba sira ne'ebé simu treiñu hosi dixiplina ne'e. Ebreu 12:11 BK

Ebreu 12:11

Hakerek-nain husi libru Ebreu ko'alia ho onestu kona-ba dixiplina. Nia la finje katak dixiplina ne'e sente di'ak. Iha momentu ita hetan dixiplina ne'e, halo ita sente laran-kanek. Karik ita hetan koresaun, hetan susar, ka konviksaun espirituál nian, sira ne'e halo ita la komfortavél.

Maibé versíkulu ne'e fó ita promesa furak ida: laran-kanek ka terus la'ós istória nia rohan. "Sei Iha loron aban"

Maromak Nia dixiplina la'ós kastigu ba Ninia ema sira, maibé treinamentu ba sira ne'ebé Nia hadomi. Hanesan inan-aman ne'ebé halo koresaun ba sira-nia oan nia kreximentu, ita-nia Aman iha lalehan mós forma ita-nia karakter liuhosi dixiplina ba ita-nia di'ak. Nia haree buat ne'ebé ita la bele haree - karakter ne'ebé Nia forma, forsa ne'ebé Nia harii no dame ne'ebé nia prepara ba ita.

Terus iha ojetivu, se ita tau iha Maromak Nia liman. Dixiplina halo ita haraik-an. Dixiplina halo ita fila fali ba dalan loos. Dixiplina hasa'e ita-nia dependensia ba Maromak liután. Maski ita la komfortavél, maibé ida-ne'e prodús moris loos no dame" ba ba loron aban.

Ita bele haree katak koileta maihusi sira ne'ebé " treinadu". Dixiplina bele halo ita sai aat ka di'ak liu. Se ita kontra, ita bele lakon ninia fuan. Maibé se ita tau fiar ba Maromak liuhusi terus sira ne'e, ikusmai ita sei haree ita-nia fiar krexe, estabidade iha ita-nia espíritu, no paz iha ita-nia laran.

Dame loron aban nian dala barak sai hosi terus ohin nian. Lisaun sira ne'ebé ita aprende ho matan-been sai nu'udar forsa ba susar sira ne'ebé ita sei hasoru iha futuru. Maromak la estraga buat ida, inklui ita-nia tempu luta sira.

Se ita la'o iha tempu susar nia laran, korajen nafatin. Sentimentu la komfortavél agora sei iha folin ba loronaban. Ita-nia Aman mak kontrola buat hotu. Kaer-metin Ninia promesa sira, submete ba Maromak Nia matadalan sira, no tau fiar ba Ninia dixiplina ne'ebé nakonu ho domin.

Liutiha tempu balu, buat ne'ebé hakanek ita sei prodús moris loos no dame ne'ebé so Maromak de'it mak bele fó, hodi hametin ita-nia hakat sira iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 18, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Destinu bei'ala sira neʼebé nunka rona Evanjellu

Tanba bainhira ema Jentiu sira, ne'ebé la iha lei, halo tuir de'it buat ne'ebé lei haruka, sira sai lei ba sira nia aan rasik, maski sira la iha lei. Sira hatudu katak hahalok hosi lei ne'e hakerek ona iha sira nia fuan laran. Sira nia konsiénsia mos fó sasin, no sira nia hanoin mós akuza sira no mós defende sira. Tuir evanjelhu ne'ebé hau haklaken, ida ne'e sei akontese iha loron ne'ebé Maromak tesi lia ba ema nia segredu liu hosi Jesus Kristu. Roma 2:14-16 BK

Roma 2:14

Iha Roma kapítulu 2, apóstolu Paulo ko'alia kona-ba lia-loos importante ida: Maromak nia ukun-fuan ka lei morál la'ós de'it hakerek iha Eskritura, maibé mós hakerek iha ema nia laran. Maski ema ne'ebé nunka simu Maromak nia Ukun-Fuan, maibé sira mós iha konxiensia - atu hatene kona-ba buat ne'ebé loos no sala.

Apóstolu Paulo esplika katak kuandu ema ne'ebé la hatene Maromak nia ukun-fuan, maibé sira hili nafatin atu halo buat ne'ebé loos, sira demonstra katak lei Maromak nian hakerek iha sira-nia "fuan-laran". Sira-nia konxiensia du'un sira bainhira sira halo sala ka defende sira bainhira sira halo buat ne'ebé loos. Ida-ne'e hatudu katak Maromak tau ona lei morál ba ema hotu iha sira-nia laran.

Ema kristaun barak hasoru pergunta ida ne'ebé konmún: Oinsa ho ita-nia bei'ala sira ne'ebé nunka rona Jesus nia naran? Oinsá ho ema sira ne'ebé moris antes Evanjellu to'o iha sira-nia rai, maibé ho laran-moos halo tuir sira-nia konxiensia no buka atu halo buat di'ak?

Roma 2 fó-hanoin ita kona-ba lia-loos rua ne'ebé fó komfortu ba ita.

Ba dahuluk liu, Maromak perfeitamente justu. Versíkulu 16 hatete katak Maromak sei julga ba segredu hotu-hotu iha ema-nia laran liuhusi Kristu. Ninia julgamentu sei halo ho kuidadu. Nia haree buat ne'ebé ema ida la haree - ne'e mak motivu ka razaun ba asaun hotu, oportunidade no naroman ne'ebé ema ida simu.

Segundu, Maromak hatudu laran-sadi'a no hakarak ba ema atu hatán ba naroman ne'ebé sira simu. Eskritura sempre hanorin katak kuandu ema ida responde ho laran-moos ba lia-loos, Maromak fó naroman liután iha Ninia tempu no dalan. Maromak ne'e justu, nia la fó kastigu ba ema ne'ebé nunka iha oportunidade rona ka simu lia-loos iha sira-nia moris.

Hahalok di'ak de'it sei la bele salva ema ida, salvasaun sempre bazeia ba Maromak nia grasa. Maski nune'e, Roma 2 afirma katak Maromak haree ho serius ema idaidak nia responde ba lia-loos ne'ebé sira simu iha sira-nia laran. Ema-nia konxiensia atu buka moris loos, ho haraik-an responde ba naroman ne'ebé simu, ida ne'e refleta laran ne'ebé buka Maromak.

Ikusmai, ita tau fiar ita-nia bei'ala sira ba Maromak Nia karakter. Nia domin boot liu fali ita-nian. Nia justu liu fali ita. No liuhusi Kristu, Binia julgamentu sira mak loos no laran-sadi'a.

Maromak Nia liafuan sira-ne'e la'ós de'it fó komfortu ba ita kona-ba tempu uluk, maibé ida-ne'e mós bele dezafia ita ohin loron. Ita ne'ebé hatene evanjellu hetan naroman boot liután. Ita-nia responsabilidade boot liután. Mai ita moris ho fiél tuir lia-loos ne'ebé hakerek iha Eskritura no fahe lia-fuan di'ak ho kompaixaun.

Ukun-fuan ne'ebé hakerek iha laran hatudu katak Maromak nunka dook husi ema. Nia sempre besik, ko'alia liuhusi konxiensia, kriasaun, no ikusmai liuhusi Kristu, ne'ebé dirije ema hotu nia laran hodi la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 17, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Nakonu ho koñesimentu kona-ba Ninia glória

Tanba mundu ne'e sei sai nakonu ho matenek kona ba Nai Nia glória, hanesan tasi nakonu ho bee. Habakuk 2:14

Habakkuk 2:14

Profeta Habakkuk moris iha tempu susar. Violénsia, injustisa no korrupsaun hale'u nia. Nia pergunta: Too bainhira mak hahalok-aat sira sei hotu? Maibé iha tempu susar ne'e nia aran, Maromak fó promesa boot ida: "Mundu nee sei sai nakonu ho matenek kona ba Nai Nia glória"

Versikulu ne'e fó-hanoin ita katak buat-aat sei la permanese. Maski nakukun domina ba tempu ida, maibé ikusmai Maromak Nia glória sei nabilan iha fatin hotu. Hanesan bee taka tasi hotu, nune'e mós loron ida Nia glória sei taka rai tomak, la iha rohan, no ba nafatin.

"Konesimentu" ne'ebé ko'alia iha versíkulu ne'e la'ós de'it informasaun. Ne'e mak rekoñesimentu, kompriensaun, no respeitu. Ida-ne'e katak ema sei haree no rekoñese didi'ak Maromak ne'ebé mak santu, ukun-na'in ka soberanu, laran-loos no nakonu ho majestade.

Agora mós, ita bele haree parte balu hosi Ninia glória. Ita bele haree ida-ne'e iha Ninia kriasaun, iha orasaun neʼebé hetan resposta, iha moris ne'ebé transformadu, no Maromak Nia glória klaru liu bele haree iha Jesus Kristu. Maibé loron ida, Maromak sei la subar Ninia glória no ema sei la husu tan pergunta. Ema sei hatene ida-ne'e iha mundu tomak.

Promesa ne'e fó esperansa iha tempu la serteza sira. Kuandu ita hasoru situasaun ne'ebé justu iha mundu ne'e, ita bele hanoin-hetan katak Maromak serbisu no kontrola buat hotu. Maromak Nia hakarak sei alkansa no la'o ba oin. Ninia glória avansa daudaun ona.

Nu'udar ema fiar-na'in, Maromak bolu ita atu refleta glória ne'e agora. Liuhusi ita-nia adorasaun, obedese ba Ninia hanorin sira, no fó sasin, ita bele ajuda habelar koñesimentu kona-ba Maromak. Ita-nia moris sai ki'ik maibé refleta Maromak nia kmanek ne'ebé boot.

Ohin, korajen nafatin. Maski ita haree saida de'it mak akontese hale'u ita, maibé kapítulu ikus partensi ba Maromak. Ninia glória sei hakonu mundu kompletamente. Molok to'o loron ne'ebá, espera katak ita-nia moris sei nabilan ho koñesimentu kona-ba Ninia kmanek ne'ebé boot bainhira ita la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 16, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Oinsá mak ita hatudu domin ba Maromak?

No ida ne'e mak domin, katak ita la'o tuir Ninia ukun fuan sira. Ida ne'e mak ukun fuan ne'ebé ita rona hori uluk kedas katak ita tenki la'o iha ukun fuan ne'e. 2 João 1:6 BK

2 João 1:6

Domin mak liafuan ne'ebé ita uza beibeik, maibé eskritura fó definisaun ne'ebé klaru. Iha karta badak ne'e, apóstolu João fó-hanoin ema fiar-na'in sira katak domin ba Maromak la'ós de'it hatudu ho emosaun ka liafuan de'it. Ita hatudu domin ne'e liuhusi obedese ba Maromak Nia ukun-fuan sira.

Apóstolu João la'o ona hamutuk ho Jesus. Nia rona Nai Jesus hanorin katak domin no obedese mak buat rua ne'ebé la bele haketak. Hadomi Maromak mak valoriza Maromak Nia hakarak liu fali ita-nia hakarak rasik. Hadomi Maromak mak aliña ita-nia moris ho Ninia lia-loos no halo tuir Ninia mandamentu loroloron.

La'o tuir Maromak Ninia mandamentu sira, signifika la'os hatene de'it mandamentu sira-ne'e. Halo tuir mandamentu ne'e katak ita pratika ka halo tuir mandamentu sira ne'e iha ita-nia moris loroloron hanesan hatudu laran-di'ak mesmu difisíl, fó perdua kuandu ema hakanek ita, ko'alia lia-loos ho domin, no hili hahalok santu duke halo kompromisu. Obedese mak domin iha asaun.

Kuandu ita dedika ita-nia laran ba Maromak, obedese ba Maromak Nia ukun-fuan la'os buat todan ida. Kuandu ita komprende katak Maromak hadomi tebes ita, halo tuir Ninia mandamentu sira hanesan ita-nia resposta gratidaun nian. Ita la halo tuir Ninia ukun-fuan sira atu manan Nia domin, maibé ita halo tuir tanba ita iha ona domin ne'e.

Apóstolu João mós liga domin ba Maromak ho domin ba ema seluk. Kuandu ita la'o iha Ninia lia-loos, ita refleta Maromak Nia karakter. Ema bele haree ita-nia domin liuhusi pasiénsia, laran-sadi'a no fidelidade. Ho ida-ne'e, ita-nia moris loroloron nian sai nu'udar sasin ba ita-nia devosaun ba Maromak.

Entaun, oinsá mak ita hatudu domin ba Maromak? La'ós liuhusi knananuk sira de'it mak ita kanta ka halo orasaun de'it, maibé liuhusi halo tuir Ninia mandamentu sira ho fiél. Pasu pur pasu, Ita hili atu la'o tuir Maromak Nia lia-loos sira.

Kuandu ita-nia moris aliña tuir Ninia Liafuan sira, ita-nia domin sai klaru, no ita sei kontinua la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 15, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Haree buat ne'ebé la bele haree liuhusi kriasaun

Tanba maski ema la haree ho matan buat ne'ebé Maromak nian, katak Ninia kbiit rohan-laek no Ninia karakter nu'udar Maromak, sira sei bele hatene mo-moos. Tanba dezde Nia kria mundu, ema bele kompriende buat sira ne'e liuhosi buat neʼebé Nia halo ona. Nune'e ema la iha razaun atu la fiar. Roma 1:20 BK

Roma 1:20

Iha Roma kapítulu 1, apóstolu Paulo esplika katak Maromak fó sai ona Ninia an ba ema. Maski Maromak mak espíritu no ita labele haree ho matan, maibé Ninia atributu sira ne'ebé la bele haree hatudu liuhusi mundu ne'ebé ita haree. Kriasaun ne'e rasik sai nu'udar sasin ba ninia Kriador.

Bainhira ita haree lalehan nia luan, tasi nia kle'an, foho nia furak, ka ita-nia isin-lolon nia dezeñu ne'ebé komplexu, ita haree evidénsia kona-ba intelejensia, podér, no orden hosi Maromak. Komplexidade furak sira-ne'e hatudu buat ne'ebé di'ak liu fali buat ne'ebé ita bele komprende. Sira fó sai Maromak Nia podér eterna no Maromak nia natureza divinu.

Apóstolu Paulo hanorin katak revelasaun liuhosi kriasaun ne'e mak buat ne'ebé hatudu ho klaru tan ne'e ema hotu "la iha razaun" atu la fiar Maromak. Kriasaun sempre ko'alia kona-ba Maromak Nia podér boot. Problema ne'e la'ós katak Maromak nonook de'it, maibé ema barak hili atu la rona. Duke fó hahi'i ba Kriador, ema barak hanoin de'it kona-ba kriasaun, buat ne'ebé Maromak kria ona.

Ba ema fiar-na'in sira, kriasaun hametin sira-nia fiar. Loron matan sa'e iha dadeer fo hanoin kona-ba Maromak Nia fidelidade. Tempu ne'ebé muda hatudu Ninia orden no sabedoria. Fitun sira iha lalehan kalan hatudu Maromak nia kbiit ne'ebé la iha rohan. Kada natureza nia beleza fó sai Maromak Nia podér.

Maski nune'e, kriasaun la'ós de'it hatudu Maromak Nia podér, maibé mós konvida ita atu hahi'i Maromak. Kuandu ita haree Maromak nlNia liman iha buat ne'ebé nia halo ona, ita-nia laran nakonu ho agradesementu. Ita komesa haree buat ne'ebé ita labele haree liuhusi buat ne'ebé ita haree.

Ohin, foti tempu balu hodi haree mundu ne'ebé hale'u ita. Husik kriasaun foti ita-nia neon ba Maromak ne'ebé dezeñu buat hotu. Bainhira ita haree Ninia podér boot no majestade hatudu liuhosi natureza, husik ida-ne'e halo ita-nia fiar sai boot liután no hakbesik liután ba Nia, hodi gia ita-nia hakat sira iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 14, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

Laran ne'ebé nakonu ho domin lalehan

No esperansa la halo ita moe, tanba Maromak fakar tiha Ninia domin ba ita-nia fuan laran liu hosi Espíritu Santu ne'ebé Nia fó ona ba ita. Roma 5:5 BK

Roma 5:5

Serake Ita pernah sente laran mamuk? Sente hanesan buat ruma lakon? Ema barak koko atu hakonu laran mamuk ne'e ho osan, halimar, ka ho kolega. Maibé ida ne'e la dura ba tempu naruk. Sentimentu laran mamuk sempre mai fali.

Maromak kria ita ho fatin espesiál ida iha ita-nia laran ne'ebé so Nia de'it mak bele enxe. Nia hakarak enxe fatin ne'e ho buat furak ida, ne'e mak Ninia domin. Versíkulu ohin loron hatete katak "Maromak fakar tiha Ninia domin ba ita-nia fuan laran liu hosi Espíritu Santu." Hanoin to'ok kona-ba liafuan "fakar". Fakar ne'e signifika Maromak la'ós de'it fó domin uitoan mai ita. Nia fakar sai Ninia domin hanesan bee balde boot ida ne'ebé fakar sai bee ne'ebé barak liu fali saida mak ita presiza.

Oinsá mak Nia halo ida-ne'e? Nia fó Ninia Espíritu Santu mai ita. Kuandu ita tau fiar ba Jesus, Ninia Espíritu sei mai atu moris iha ita-nia laran. No Espíritu Santu Ninia serbisu mak atu hakonu ita ho Maromak Nia domin. Domin ne'e la hanesan ho domin ema nian ne'ebé lakon mosu. Domin Maromak Nian ne'e metin. Domin Maromak Nian ne'e forte tebes. Domin Maromak Nian ne'e nunka hotu.

Domin ne'e muda buat hotu. Kuandu ita sente mesamesak, Maromak Nia domin fó-hanoin ita katak Nia hamutuk ho ita. Kuandu Ita sente triste, Ninia domin fó komfortu ba Ita. Kuandu ita sente fraku, Ninia domin fó forsa mai ita. Kuandu ita sente katak ita falla, Ninia domin hatete ba ita katak ita mak Ninia oan no Nia sei nunka husik ita.

No tuir mai ne'e mak parte furak liu. Kuandu ita-nia laran nakonu ho Maromak Nia domin, ida-ne'e naturalmente sei fakar sai ba ema seluk mós. Ita sei sente katak ita sai ema ne'ebé iha laran-di'ak, pasiénsia no domin liután. La'ós tanba ita-nia esforsu maka'as, maibé tanba Maromak Nia domin iha ita-nia laran suli sai barak liután.

Dalan ba lalehan mak viajen laran nian. Dalan ba lalehan la'ós de'it kona-ba halo tuir ukun-fuan ka fiar buat ne'ebé loos. Maibé ida ne'e kona-ba ita-nia laran ne'ebé nakonu ho domin lalehan nian. Domin ne'e mak ita-nia kombustivel ba viajen ne'e. Ne'e mak ita-nia komfortu iha tempu susar. No ida-ne'e mak provas katak ita la'o duni hamutuk ho Jesus iha dalan ba lalehan.

Orasaun: Nai, dala ruma ami-nia laran sente mamuk. Ami husu ohin, hakonu ami ho Ita-nia domin. Husik Ita-nia Espíritu Santu ajuda ami no fó domin lalehan nian mai ami. Ajuda domin ne'e atu suli sai no book ema hotu nia laran ne'ebé ami hasoru. Obrigadu ba hadomi ami iha dalan ba lalehan. Hodi Jesus nia naran, Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste

Acacio Cardoso AmaralFebruary 13, 2026 No comments

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

🙏🌹🙏🌹🙏🌹🙏🌹🙏🌹🙏

La moe lori Nia naran

Maibé se ema ida hetan terus nu'udar ema Kristaun, nia lalika sai moe. Nia bele fó glória ba Maromak tanba nia lori naran ne'e. 1 Pedro 4:16 BK

1 Pedro 4:16

Iha 1 Pedro kapítulu 4, apóstolu Pedro ko'alia ba ema kristaun sira ne'ebé hetan terus tanba sira-nia fiar. Iha versíkulu anterior, nia fó-hanoin sira katak terus tanba halo sala la fo onra, maibé terus ba Kristu ne'e diferente. Sofre tamba Kristu lori bénsaun. Tuirmai apóstolu Pedro fó instrusaun ne'ebé klaru: Keta moe se imi hetan terus nu'udar ema kristaun.

Naran "Kristaun" signifika partensi ba Kristu. Iha inisiu, dala ruma ema uza liafuan Kristaun hodi goza dixipulu sira. Maski nune'e, apóstolu Pedro hatudu muda liafuan ne'e hanesan sinál atu fó onra. Atu lori Kristu nia naran la'ós buat ne'ebé atu subar, maibé atu fó glória ba Maromak.

Dala barak moe ne'e mai tanba ita ta'uk ema rejeita, kritika, ka lakon. Karik ita sente iha presaun laran atu nonook nafatin kona-ba ita-nia fiar ka atu presaun tamba halibur hamutuk ho hahalok mundu ne'e. Maibé apóstolu Pedro fó-hanoin ita katak ita-nia identidade iha Kristu la'ós buat ida ne'ebé ita tenke sente moe ka triste. Se ita hasoru susar oioin tanba ita la'o tuir Jesus, ita fahe Jesus Ninia terus.

Jesus rasik, ema la simu no goza. Maski nune'e, nia fiél nafatin ba Aman nia hakarak. Kuandu ita tahan susar sira tanba nia, ita refleta Ninia korajen no domin. Ita-nia fidelidade ne'ebé hakmatek sai nu'udar sasin ba ema seluk.

Fó glória ba Maromak bainhira hetan terus, la signifika ita gosta terus. Ida ne'e katak ita hatudu respeitu ba Maromak liuhusi oinsa ita responde ba terus ne'e. Ita hili perdua duke hirus, fé duke ta'uk, no esperansa duke desperadu, ita hatudu katak Kristu moris duni iha ita-nia laran.

Atu lori Ninia naran mak priviléjiu ida. Ida-ne'e liga ita ho Salvador ne'ebé fó ninia moris ba ita. Mai ita hamriik metin no la moe, hodi tau fiar katak Maromak haree ita-nia fidelidade no sei fó kolen ba ita iha ninia tempu ne'ebé perfeitu.

Bainhira ita la moe lori Ninia naran, ita-nia moris nabilan ho ninia glória no hatudu ba ema seluk atu la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Facebook : Hope Channel Timor-Leste

#hopechanneltimorleste #AWRTimoLeste