No esperansa la halo ita moe, tanba Maromak fakar tiha Ninia domin ba ita-nia fuan laran liu hosi Espíritu Santu ne'ebé Nia fó ona ba ita. Roma 5:5 BK
Serake Ita pernah sente laran mamuk? Sente hanesan buat ruma lakon? Ema barak koko atu hakonu laran mamuk ne'e ho osan, halimar, ka ho kolega. Maibé ida ne'e la dura ba tempu naruk. Sentimentu laran mamuk sempre mai fali.
Maromak kria ita ho fatin espesiál ida iha ita-nia laran ne'ebé so Nia de'it mak bele enxe. Nia hakarak enxe fatin ne'e ho buat furak ida, ne'e mak Ninia domin. Versíkulu ohin loron hatete katak "Maromak fakar tiha Ninia domin ba ita-nia fuan laran liu hosi Espíritu Santu." Hanoin to'ok kona-ba liafuan "fakar". Fakar ne'e signifika Maromak la'ós de'it fó domin uitoan mai ita. Nia fakar sai Ninia domin hanesan bee balde boot ida ne'ebé fakar sai bee ne'ebé barak liu fali saida mak ita presiza.
Oinsá mak Nia halo ida-ne'e? Nia fó Ninia Espíritu Santu mai ita. Kuandu ita tau fiar ba Jesus, Ninia Espíritu sei mai atu moris iha ita-nia laran. No Espíritu Santu Ninia serbisu mak atu hakonu ita ho Maromak Nia domin. Domin ne'e la hanesan ho domin ema nian ne'ebé lakon mosu. Domin Maromak Nian ne'e metin. Domin Maromak Nian ne'e forte tebes. Domin Maromak Nian ne'e nunka hotu.
Domin ne'e muda buat hotu. Kuandu ita sente mesamesak, Maromak Nia domin fó-hanoin ita katak Nia hamutuk ho ita. Kuandu Ita sente triste, Ninia domin fó komfortu ba Ita. Kuandu ita sente fraku, Ninia domin fó forsa mai ita. Kuandu ita sente katak ita falla, Ninia domin hatete ba ita katak ita mak Ninia oan no Nia sei nunka husik ita.
No tuir mai ne'e mak parte furak liu. Kuandu ita-nia laran nakonu ho Maromak Nia domin, ida-ne'e naturalmente sei fakar sai ba ema seluk mós. Ita sei sente katak ita sai ema ne'ebé iha laran-di'ak, pasiénsia no domin liután. La'ós tanba ita-nia esforsu maka'as, maibé tanba Maromak Nia domin iha ita-nia laran suli sai barak liután.
Dalan ba lalehan mak viajen laran nian. Dalan ba lalehan la'ós de'it kona-ba halo tuir ukun-fuan ka fiar buat ne'ebé loos. Maibé ida ne'e kona-ba ita-nia laran ne'ebé nakonu ho domin lalehan nian. Domin ne'e mak ita-nia kombustivel ba viajen ne'e. Ne'e mak ita-nia komfortu iha tempu susar. No ida-ne'e mak provas katak ita la'o duni hamutuk ho Jesus iha dalan ba lalehan.
Orasaun: Nai, dala ruma ami-nia laran sente mamuk. Ami husu ohin, hakonu ami ho Ita-nia domin. Husik Ita-nia Espíritu Santu ajuda ami no fó domin lalehan nian mai ami. Ajuda domin ne'e atu suli sai no book ema hotu nia laran ne'ebé ami hasoru. Obrigadu ba hadomi ami iha dalan ba lalehan. Hodi Jesus nia naran, Amen.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment