Sai hanesan Nia

Halo tuir Maromak, nu'udar Ninia oan doben sira. Efezu 5:1 BK  

Efezu 5:1

Labarik sira dala barak kopia ka halo tuir sira-nia inan-aman. Sira repete fali sira-nia liafuan, halo tuir sira-nia hahalok ka asaun sira, no koko atu iha halohalok hanesan sira. Iha versíkulu ne'e, apóstolu Paulo fó instrusaun ne'ebé simples maibé kbiit boot ba ema kristaun sira, hodi dehan: imita Maromak!. 

Instrusaun ida-ne'e hanesan identidade ida. Maromak bolu ita nu'udar "oan doben sira". Ita la imita Maromak atu sai Ninia oan, tanba ita Maromak Ninia oan nanis ona. Ninia domin ba ita mak sai fundasaun ida. No hosi domin ne'e suli dalan foun moris nian. Dalan ne'ebé tuir Maromak Nia hanorin.

Atu sai hanesan Maromak signifika refleta Maromak Nia karakter. Ida ne'e katak hatudu laran-di'ak bainhira ema seluk hakanek ita. Ida-ne'e katak fó perdua ba ema ne'ebé halo sala ba ita. Ne'e katak hadomi la'ós de'it bainhira tempu fasil, maibé mós bainhira tempu susar. Hanesan Maromak hatudu ona laran-sadi'a mai ita, ita mós tenke hatudu laran-sadi'a ba ema seluk. 

Ita haree imajen Maromak ne'ebé klaru liu iha Jesus Nia moris. Nia hatudu kompaixaun, laran-sadi'a, haraik-an, pasiénsia, no sakrifísiu. Liuhosi hahalok sira-ne'e Nia hatudu hahalok Maromak nian. Kuandu ita halo tuir Kristu Nia ezemplu, ita aprende oinsá atu la'o tuir ita-nia Aman iha lalehan. 

Imita Maromak la signifika ita sai perfeitu. Maibé, ne'e signifika ita krexe daudaun iha Maromak Nia dalan. Hosi loron ba loron, Espíritu Santu forma ita-nia laran atu nune'e ita-nia hanoin, liafuan no hahalok sira komesa refleta liután Maromak Nia karakter. 

Ohin loron, husu ba ita-nia an: serake ema seluk bele haree Maromak Nia domin iha ita? Serake ita-nia desizaun sira refleta lia-loos no grasa? 

Nu'udar Maromak Nia oan doben sira, mai ita hakarak sai hanesan ita-nia Aman ne'ebé moris ho domin, fó perdua, no fó naroman iha mundu ne'ebé nakukun. No bainhira ita halo ida ne'e ita la'o hela iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏