Maibé, se imi senti la di'ak hodi serví ba Nai, hili ohin kedas see mak imi sei serví: se karik maromak sira ne'ebé imi-nia bei-ala sira serví iha Mota Eufrates nia sorin ba, ka maromak sira hosi ema Amoreu sira, mak rai nain ba rai iha nebee imi hela agora. Maibé, ha'u ho ha'u-nia família sei serví ba Nai. Josué 24:15 BK
Iha Josue nia moris rohan, nia halibur povu Izrael hodi fo opsaun 2 ba sira atu hili. Sira bele hili atu la'o tuir maromak falsu husi nasaun seluk, ka sira bele serbí Maromak ida ne'ebé loos. Josue hatete ho korajen no fiar metin: "Maibé, ha'u ho ha'u-nia família sei serví ba Nai."
Serví Maromak hahú ho desizaun ida. Josue la hein atu haree saida mak ema seluk sei halo. Nia mak hili ulukliu. Nia fó matadalan ba Ninia família.
Ohin loron, família barak rona lian barak hodi dada sira ba dalan oioin. Mundu ne'e fó "maromak" hanesan osan, susesu, ksolok, no komforu". Maibé família ida-ne'ebé serví Nai hili dalan ne'ebé diferente. Sira hili halo orasaun duke foti-an. Sira hili obedese ba Maromak duke popularidade. Sira hili fiar duke ta'uk.
Serbí Nai la dehan katak família ne'e perfeitu. Maibé ne'e katak familia ne'e iha komitmentu. Sira lee Maromak Nia Liafuan hamutuk. Sira halo orasaun ba malu. Sira fó perdua lalais. Sira koko atu fó glória ba Maromak iha sira-nia moris loroloron nian: iha uma, iha serbisu, iha eskola.
Inan-aman sira iha papél importante. Labarik sira aprende liuhusi haree. Bainhira sira haree inan-aman pratika fé ho laran-moos no domin, ida-ne'e sei marka ka book sira-nia laran.
Ohin loron, Josue nia liafuan sei dezafia ita. Se mak ita-nia umakain sei serví? Desizaun atu serví tenke halo ho objetivu ne'ebéloos.
Biarba ita hatudu aten-barani hodi hatete: "la prekupa ema seluk atu hili saida de'it atu serví, maibé ami-nia uma-kain sei serbí Nai." No bainhira ita halo ida ne'e, Maromak sei dirije, proteje no haraik bénsaun ba família ida-ne'ebé la'o ho laran-metin hamutuk ho Nia iha Dalan ba Lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment