Maibé iha imi-nia fuan laran, fó onra ba Nai Kristu ne'ebé santu. Imi tenki prontu nafatin atu hataán ema ne'ebé husu imi atu esplika esperansa ne'ebé iha imi-nia laran. Maibé hatán ho laran maus no respeitu.1 Pedro 3:15 BK
Iha 1 Pedro 3: 13-14, apóstolu Pedro ko'alia ba ema fiar-na'in sira ne'ebé hasoru presaun no susar tanba sira-nia fiar. Nia fó-hanoin sira katak maski sira hetan terus tanba halo buat ne'ebé loos, maibé sira hetan bénsaun. Nia hatete atu sira labele ta'uk tamba ameasa ka opozisaun sira. Ida ne'e hatúr kontestu hosi versíkulu 15 iha ne'ebé, apóstolu Pedro fó instrusaun ne'ebé klaru.
Apóstolu Pedro hatete: "Maibé iha imi-nia fuan laran, fó onra ba Nai Kristu ne'ebé santu. Imi tenki prontu nafatin atu hataán ema ne'ebé husu imi atu esplika esperansa ne'ebé iha imi-nia laran. Maibé hatán ho laran maus no respeitu". "Fó onra ba Nai Kristu ne'ebé santu" iha ita-nia laran katak tau uluk Kristu, hodi hahi'i Nia nu'udar Nai ba ita-nia moris. Kuandu Jesus ukun duni ita-nia laran, ita-nia moris sei refleta esperansa, dame no konfiansa, maski iha tempu susar sira.
Esperansa ne'ebé ema haree hamosu pergunta. Ema bele husu tanbasá mak ita hakmatek nafatin iha susar laran, fiél nafatin iha susar laran, ka haksolok nafatin iha tempu ne'ebé la serteza. Apóstolu Pedro fó korajen ba ema kristaun sira atu prontu atu hatán, la'ós ho argumentu ka foti-an, maibé ho laran-mamar no respeitu. Ita-nia sasin la'ós de'it kona-ba buat ne'ebé ita hatete, maibé oinsá ita hatete.
Prontu atu hatán la signifika ita hatene buat hotu. Maibé ne'e signifika ita hatene se mak ita fiar ba no tanbasá. Ita-nia esperiénsia privadu kona-ba Jesus, ne'ebé funda iha Eskritura, dala barak sai nu'udar sasin ne'ebé podér boot liu. Esplikasaun ho haraik-an kona-ba Maromak Nia grasa, perdaun, no promesa sira, ida-ne'e bele hatudu ba ema seluk kona-ba Kristu.
Versíkulu ne'e mós fó-hanoin ita katak preparasaun ne'e importante tebes. Estuda beibeik Maromak nia Liafuan, orasaun, no relasaun ne'ebé krexe ho Kristu, ajuda ita fahe ita-nia fiar ho matenek no domin. Esperansa ne'ebé funda iha Kristu labele helik, maibé nia sei nabilan liuhusi ita-nia liafuan no hahalok sira.
Nu'udar ema fiar-na'in, ita hetan xamada ka bolu atu moris ho esperansa ne'ebé ita bele esplika no fahe ho ema seluk. Kuandu ita fo onra ba Kristu iha ita-nia laran, ita sei prontu atu ko'alia kona-ba nia, gia ema seluk ho laran-di'ak kona-ba dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment